測試1

2020年11月22日星期日

【希臘快閃3】塞薩洛尼基Thessaloniki美食巡禮

所謂「食色,性也」,係塞薩洛尼基Thessaloniki只得短短兩三日,想搵個艷遇嚟同大家分享下都無 (根本就唔關日子事,係樣既問題.......)

咁就唯有分享下呢度有咩好食啦~

希臘菜出名正到暈,而呢處話哂都係海邊,話哂都係第二大城,當然多好野食啦!

連著名的外國廚師食家Rick Stein 都曾係節目度大讚塞薩洛尼基係希臘的美食天堂!

講真呢幾日食左既好野都唔少,就係度同大家分享下啦~


希臘seafood risotto


+++++++++++++++++++++++++++++++++++++++++++++


延伸閱讀 : 《【希臘快閃1】 塞薩洛尼基Thessaloniki一天漫遊》

https://garcia-in-germany.blogspot.com/2020/08/Thessaloniki01.html


+++++++++++++++++++++++++++++++++++++++++++++


 內容概要 :

  1. 燒八爪魚
  2. Fish and Clips
  3. 三角吉士酥Trigona Panoramatos  
  4. 希臘式青瓜乳酪醬Tzatziki
  5. 海鮮意大利飯
  6. 熱朱古力


1. 燒八爪魚

八爪魚幾乎可算係到希臘既必食item! 稱佢為希臘國菜也不為過~

一段既八爪魚料理,日本會輕灼切片刺身,韓國會直接用把口嚟殺佢,香港會椒鹽,但最有趣都係我係馬爾他食過用蕃茄酸豆慢火燉到佢入口即化

而希臘都有差不多既做法,不過比較常見既都係用炭火輕燒,再加香草同橄欖油only


希臘八爪魚


我超~ 咁簡單我自己都整到啦~ 果兩條鬚收我10歐半? 

要觸手我睇妖獸都市得啦!

(搵到果d觸手相都太18禁,都係用住銀魂先啦~)


Wa但條觸手點會咁正ga!!!??

又香又軟,鮮味十足! 係我食過最好味既八爪魚! 我直情想叫多碟呀!!

同樣簡單既食材同煮法竟然會有咁美味既效果,就好似全世界最好味既雲吞麵一定係香港一樣,去希臘一定要食燒八爪魚呀!!!!


  • 推薦餐廳 :  Marathos ladadika
  • 價格 :  約10歐元

塞薩洛尼基餐廳Marathos ladadika

塞薩洛尼基餐廳Marathos ladadika



2. Fish and Clips


係Rick Stein既節目中曾長篇介紹過呢間Fish and Clip店~

而呢間店似乎亦好proud of呢件事,將呢位英國名廚既介紹分成9集,每日不停輪流廣播

咁小弟都係抱住觀摩既心態嚟呢度,眼見在場既人數都唔少,分分鐘要等位tim,我諗味道都有返d保證ge~


九品芝麻官


塞薩洛尼基餐廳Mpakaliarakia tou Aristou

塞薩洛尼基餐廳Mpakaliarakia tou Aristou

塞薩洛尼基餐廳Mpakaliarakia tou Aristou - Rick Stein


由於佢係即點即炸,上菜都要d時間,話哂全世界應該只有澳牛係即叫即做都可以光速起菜

總之20分鐘後有野食~

畫板咁大個淺盤,紙上放著一大舊厚身魚肉,外層炸到金黃色,墊底的厚薯片仲略為冒泡,熱辣辣非常吸引!


塞薩洛尼基餐廳Mpakaliarakia tou Aristou - Fish and chips


炸魚外層脆皮屬於硬脆型,有d似街市炸蕃薯,但乾身唔油膩,調味亦一流~

魚肉切開時d汁標哂出嚟,肉質彈牙有魚味,的確非常不俗!

但我覺得最精華都係果一大陀蒜蓉沙律醬!

成部相機咁大球,以為食唔哂啦,點知好味到我幾乎碟都lam埋! 死啦呢餐我會肥幾多磅ar…….

為左平衡返,我唯有放棄個麵包啦,對唔住ar........ (其實根本食唔哂啦)

塞薩洛尼基餐廳Mpakaliarakia tou Aristou - Fish and chips



  • 餐廳資料 : Mpakaliarakia tou Aristou
  • 價格 : 約12-14歐元

塞薩洛尼基餐廳Mpakaliarakia tou Aristou


3. Trigona Panoramatos  三角吉士酥

三角吉士酥呢個名係我作的,因為搵唔到中文名~

Anyway, Trigona Panoramatos係Thessaloniki著名既希臘甜品,大街小巷士多巴士站都搵得到佢既蹤影,但最出名的,無疑係呢間小店舖「Trigona Elenidi」

呢間店Rick Stein都有介紹過,但我真係估唔到多人到我要排半個鐘大長龍! 

比錢買舊西餅ja wor! 仲要目測唔止遊客,係本地人都排埋一份!


Trigona Elenidi - Trigona Panoramatos

好不容易入到鋪內就知咩事了

一來每個人都起碼買兩三打,十足散水餅派全公司咁

二來佢個吉士醬係即order即”唧”

三來店員手腳好慢+做野無系統,落單唧cream包裝收錢完全無分工,另加做到攰休息撓手吹兩嘴,完全不用理會外面條龍排Iphone咁長,咁既工作態度真係........好令人羨慕呀!!!!!


Trigona Elenidi - Trigona Panoramatos

Trigona Elenidi - Trigona Panoramatos


好不容易買到了!

Ee我後面無哂人ge????? 咩事???? 比速龍食左????

原來我手上既已經係當日最後一個三角吉士酥,賣哂啦明天請早!~

下晝4點ja wor,間鋪明明話收22:00,好彩我行快一步je...........


Trigona Elenidi - Trigona Panoramatos


講左咁多前題,終於可以講下個吉士酥係咩味啦~~~~

超好味!!!!!!!!!!!!!!!!!

一向希臘同土耳其甜品一個共通點,就係甜到食一個都驚有糖尿!

不過呢個Trigona Panoramatos做得岩岩好! 

極甜但唔會”嗱”喉,係甜得舒服的~ 三角酥的千層脆皮鬆化到入口即碎,蜜味濃郁 ; 吉士醬軟綿幼滑,幾與吃牛油無異,但又帶有栗子香味!

兩種食材一脆一滑,在口內造出多種層次,真係超勁好味!!!!

點解我會只買左一個ga???????

Trigona Elenidi - Trigona Panoramatos

Trigona Elenidi - Trigona Panoramatos

Trigona Elenidi - Trigona Panoramatos

Trigona Elenidi - Trigona Panoramatos



  • 餐廳資料 : Trigona Elenidi 
  • 價格 : 約1.3歐元一個




4. 希臘式青瓜乳酪醬Tzatziki


呢個簡直係希臘菜既100%必食item! 

個base只係將青瓜絲、蒜、橄欖油、黑椒+鹽撈埋希臘乳酪,用麵包或Pita(一種麵包類餅)蘸嚟食,已經係一款口味清新的前菜~ 我習慣蘸薯條tim~

簡單的配搭,但味道真係非常唔簡單呀! 

由我第一次係柏林食希臘菜已對此驚為天人念念不忘! 希臘人甚至每餐都有佢既存在就知唔小野!

每間希臘餐廳都一定會有Tzatziki,就好似漢堡包店一定有薯條,公司一定會有擦鞋仔,男人手機一定有AV,定律嚟ga嗎!

Tzatziki

Tzatziki


不過不止每間餐廳的Tzatziki味道及用料甚有些微不同,連價格都可以差天共地!

由4歐至2歐至隨免費麵包附送都有!

但不論咩價格都好,都一定一定一定要食! 信我! 味道絕對唔會令妳後悔!

不過........其實Tzatziki大家自己係屋企都整到的,呢d材料去U字頭超市就買到.......

Hey餐蛋飯夠自己煮到啦,你又去茶記比$50?~

Tzatziki
(左邊個盅就係我於另一餐廳"Loupino"免費附送既Tzatziki前菜,一樣超好味!)

Tzatziki
(某日家中自製Tzatziki配法包,同行的朋友們非常滿意,而個沙律係無關係的~)




5. 海鮮意大利飯

呢個risotto係我係塞薩洛尼基last night 求其撞入一間餐廳內亂order的

當初只係諗呢度話哂都係海港,海鮮應該靠得住啦~

Wa何止靠得住呀! 直頭嚇死妳呀!

希臘risotto


睇相好似唔多,但其實大蝦、青口同鏡貝都超大份量! 而且鮮味十足!

但最過份都係個飯,食得出係濃到濃情化不開的龍蝦高湯慢煮出來,每一啖都好似有十隻龍蝦係妳口內爆炸一樣!!

我好想要多d飯呀!!!! 超好味呀!!!! 但我超驚聽日腳痛呀!!!!!!!!

希臘risotto
(呢餐同時係我今次行程於希臘的最後一餐,滿足到一個頂點~)



Loupino



6. 熱朱古力


我成日覺得係歐洲coffee shop一定要飲熱朱古力!

點解? 因為係香港叫熱朱,十之八九上枱既係叮左30秒既水汪汪維記,好d既會加一堆綿花糖甜死妳!

但係歐洲,9成會係一杯香濃幼滑,如絲綢般的朱古力醬~

就好似將成排吉百利溶左倒落杯內,果種濃濃既可可滋味真係會令人感到無上幸福!

當然卡路里都係無上咁高啦~

Hot Chocolate


位於Egiptou街既Coffee World係我求其走入去的,裝修簡單,卻帶歐洲家庭的感覺~

我仲無呢啦間同班店員和老細打成一片~

係一間非常推薦的溫暖咖啡廳~



  • 餐廳資料 : Coffee World
  • 價格 : 約3歐元


******此咖啡廳的故事,請參考#過客列傳】15. - 溫情咖啡廳 https://bit.ly/39YN4DX

Thessaloniki Coffee World

Thessaloniki Coffee World

Thessaloniki Coffee World

Thessaloniki Coffee World


========================


如果對以上都無咩興趣,係Thessaloniki又唔知去邊度食飯好,其實只要走到Egiptou至Katouni街道一帶就無死錯人的~

下面的地圖有mark~

Thessaloniki Egiptou

Thessaloniki Egiptou

Thessaloniki Egiptou


好啦我係Thessaloniki既美食巡禮就差不多了~

有無發現其實全部都係海鮮同甜品呢~

其實我都有order過肉類,只係表現就係張家輝唱歌咁,普普通通啦........
咁呢度係希臘海邊嗎,想食肉既去德國啦~
會掛念就承認太掛念,我可是一邊打呢篇文一邊漓口水回想起希臘菜既種種美味呢.......

好~ 下回講下我去左Thessaloniki咩周邊地方先!




====================================

IG果邊間中會有d和Blog及fb page不一樣的相片和story,大家有興趣既去follow下支持下啦~





==============================

  • 相關篇章 :


================================

我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~




=================================


  • Email : funggarcia@gmail.com





文章同時刊於以下平台,請各位多多支持呀!!!!!!!!!!!!!











2020年11月9日星期一

鯉魚門石礦場︱夕陽下的芒草群【發掘香港2.5】

我錯了!!!!!!!!!!!!!!!!!!

上次介紹的城市步行,由觀塘行至鯉魚門,我竟然唔知道條路線仲可以有後續!

上網睇返,先知道天后廟不是終站而是中途站! 前方仲有著名的鯉魚門石礦場!!! 更係香港其中一個著名的芒草欣賞地點~
想起上回的維港日落美景,如果再加埋金黃色的芒草,諗起都覺美不勝收!

秋意漸濃,就一於繼續上次的旅程,再到鯉門尋找夕下的芒草群啦~

 

+++++++++++++++++++++++++++++++++++++++++++++

 

  • 延伸閱讀 : 城市步行︱鯉魚門的絕美日落【發掘香港2

https://garcia-in-germany.blogspot.com/2020/10/LeiYueMunsunset.html

 

+++++++++++++++++++++++++++++++++++++++++++++

 

鯉魚門石礦場芒草




行程概要 :

  • 油塘站至鯉魚門天后廟
  • 天后廟至鯉魚門石礦場



油塘站至鯉魚門天后廟

今次行程重點不在步行,純志在睇草影相,所交通一切從簡~

坐地鐵去到油塘站穿過「大本營」落茶果嶺道就可以了~

平時無咩幾可嚟油塘站,一上電梯就見到呢個海景~

Wa~~~~~~~~~~~~~~~~~~ 睇落好熱呀~~~~~~~~~~~~~~~

 

油塘站

 

沿茶果嶺道行約10分鐘,又見到你啦鯉魚門避風塘~

 

鯉魚門避風塘


 

同上次一樣,先穿過海鮮村到達燈塔~

上回都有講呢個小沙灘係最佳的觀賞日落位置,今日我到達時仍然鋤禾日當午既感覺~

純粹紀念就影返張啦~

 

鯉魚門燈塔
(再次來到,都覺得其實真係好靚)

 

再向前行到達天后廟~


天后廟

天后廟


天后廟至鯉魚門石礦場

開頭我以為前行路線係廟前大石旁的山路,原來步入天后廟內就會發現左方一條大路可繼續向前走!

真係唔入門都唔知仲有路!

有時諗人生都係咁 ------------ 遠睇以為是絕路放棄,只要繼向前切身體驗,就會發現原來柳暗花明又一村,明暗花柳二奶村

面前,會是一片全新的天地

 

鯉魚門馬背村

鯉魚門馬背村

鯉魚門馬背村

鯉魚門馬背村

鯉魚門馬背村


沿村內指示行約5分鐘,眼前風光一變

沙、海、石屋、垃圾,帶點6-70年代的沙灘郊遊feel~

即係粵語殘片阿四哥帶蕭芳芳去撲蝶果d

 

鯉魚門石礦場芒草

鯉魚門石礦場芒草


沿路前行上小山坡,眼前已經係一片---------------雜草law……….

說好的一大片芒草呢????????


鯉魚門石礦場芒草



睇嚟天氣仍然未夠涼,又或突然熱返令d芒草死哂

總之鯉魚門石礦場的芒草稀過大番d頭髮,同上星期的飛鵝山更係無得比

 

鯉魚門石礦場芒草

鯉魚門石礦場芒草

鯉魚門石礦場芒草


不過,話哂石礦場都係一個著名的影相地點~

都係草,如有陽光與晴空加持,唔會差得去邊ge~

當然啦首先要搵到一個避開人群的位置~

全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人全部都係人……….

 

鯉魚門石礦場芒草

鯉魚門石礦場芒草

鯉魚門石礦場芒草

鯉魚門石礦場芒草

鯉魚門石礦場芒草

鯉魚門石礦場芒草
(好難得搵到個位比我chok下~)


 

近海邊一帶會有比較多的芒草~

um~係多左ge~

Buffet得炒粉麵飯,突然出盤燒牛肉wor,大家梗係撲埋去話正啦!

池中無魚蝦最大,算係咁了,慢慢排隊等影相啦~

 

鯉魚門石礦場芒草

鯉魚門石礦場芒草

鯉魚門石礦場芒草

 

影到攰,個人推薦坐係最遠海岸邊的石上飲下野食下茶果~

入海鮮村前同阿婆買的~

$10兩個,外層煙韌,紅豆餡唔太甜,正!

 

鯉魚門石礦場芒草

鯉魚門阿婆茶果
(sorry咬剩半個先記得影相~)

鯉魚門石礦場
(酒是少不得的~)

鯉魚門石礦場
(呢罐野幾過癮~)

 

回頭過來,日落黃昏與石礦場形成的廢墟感,自有一種蒼然之美

好啦~ 無乜,但有如斯美景,總算不枉此行~

 

鯉魚門石礦場芒草

鯉魚門石礦場芒草

鯉魚門石礦場芒草

鯉魚門石礦場芒草

鯉魚門馬背村

鯉魚門馬背村
(打風前的紫紅天空)

  

好啦短短地唔好次次千字文,今次鯉魚門續集就講到呢度~

呢次既尋找芒草,我都唔知算唔算搵到,不過風景靚就真ge~

就算無芒草,鯉魚門石礦場仍然係一流的開揚景點~

我相信平日無人+天氣再涼d時,夕陽西下,一片金黃色的芒在風中搖,一定會靚到無得輸je!

希望大家到時會欣賞到啦~

 

 

===========================


IG果邊間中會有d和Blog及fb page不一樣的相片和story,大家有興趣既去follow下支持下啦~









=====================================


我既Youtube Channel正式開通啦!!!!


新影片已upload,快d Click入 「鋒加西亞 / 旅人瘋語」Subscribe 睇片再禁個like啦!~






=================================



  • Email : funggarcia@gmail.com





文章同時刊於以下平台,請各位多多支持呀!!!!!!!!!!!!!