測試1

2014年1月27日星期一

德國working holiday第五十五章 : 長途車的自處

點解特登呢個時候要寫一篇咁既野,因為今次挪威自駕遊,超過一半時間都係係架車度的
縱然多年來已坐過無數痛苦之極既長途車,但仍以這次為最!
總應該用片言隻字記一記既
今次自駕遊,起點由芬蘭Rovaniemi開始,到瑞典Kiruna後我加入,再直駛到挪威Lofoten islands,總共7個人


我個fd小笙一早話book錯左架車好細既車可能會逼d
唔緊要~我上年曼谷去華欣果程小巴已經見識過“逼”既極限啦~只係我唔記得有樣野叫突破極限g ma!
基本上係一架7個人坐都有d逼既私家車,另外再加7個人既行李............
唔夠具體?你可能想像車內空間係俄羅斯方塊,但長期處於仲有3行就game over囉!
除司機外既腳下大脾膊頭凳底,全部都係喼同袋,每次上車落車都玩一次倉庫番.......
手腳基本上成程車都動彈不能,真係練習扮演五香肉丁既最好機會!


2014年1月26日星期日

德國working holiday第五十四章 : 挪威Lofoten,漁村美之極致

有睇上回既朋友都知我嚟到挪威最西北部,突左出嚟既Lofoten Islands羅弗敦群島睇極光,但咁除左極光之外,呢度又係個咩地方呢?


係一個好鬼靚既地方!!!!!!!!!
係香港根本無可能想像到,你同周公捉完棋後,第一眼會見到咁既景象ga


德國working holiday第五十三章 : 北極光全攻略

有人話睇極光係人生必要做既十件事之一,雖然好似誇d,但的確係我遊歷歐洲前就已經決心要睇一次極光!呢個都係點解我發神經凍到黐肺都要冬天嚟北歐旅遊既原因!
而且今年2014仲係極光大活躍既last year,唔理呀!我無論放棄d咩都要嚟睇一次呀!

唔親身嚟到都唔知,點解d人話睇極光就好似_ _ _ _ _可遇不可求,原來係真係要好多野配合先得!
首先,你要到北極! (從來無見過更廢既廢話!)
ok~其實係近北極圈既地方都有機會~不過係越北越好的
我住係芬蘭Rovaniemi既朋友話,好多人想嚟聖誕老人村呢度睇極光,但其實唔係咁易and唔強,因為呢度只係岩岩北極圈分水嶺,佢住左係度3年,見超強光既次數都真係唔多
觀賞地點方面,只要極光夠強,其實唔使咩特別地方,妳一抬頭就會見到佢既壯麗
但可惜呢種咁強既情況一年都未必有一兩次
所以就要去空擴、光害較小既地方,例如山頂,湖邊,只要問當地酒店or hostel既職員,大多數都會比到好既建議妳
又或者有d base camp本身就係專for睇極光既,例如瑞典Abisko同Kiruna就有幾個,有興趣既係Tripadvisor都好易搵到


終於去到呢d地方啦,開始六合彩既部份啦
天陰睇唔到就係人都知呀,但冬天既北極,無落雪都偷笑啦,有幾多日好天氣呀?
就算天朗氣清,好似我係Kiruna咁諗住“好天!?機會嚟啦飛雲!”,但當我去到時先發現另一問題
月光呀!!!!!!!!!!!!!
照到成個天上地下都澄黃一片,從來無諗過月亮可以做成咁強既光害ga!!!
個月亮又大又圓,我肯定唔係冬眠緊既話一定成群人狼狼人一齊呼叫“ar wooooooooooooooooooo~~~~~~~~~”
果個時候,我真係好想龜仙人可以係身邊.......聽聞你個龜波氣功射到上月球ga ho?


2014年1月5日星期日

德國working holiday第四十六章 : 列支敦士登day3超靚雪山遊

Day3
係列支敦士登既最後一日,終於都天天天晴啦!!!!!!
咁好天氣,真係岩哂我去期待已久既雪山玩啦!!!!
列支敦士登既雪山係位於山脈中既城市Malbun,由Vaduz坐21號車約半小時就到........理論上係,但我架車原來係Triesen就停總站要再等多半個鐘.....
不過,塞翁失馬,因為咁我先影到4日來列國最靚既風景相


前一刻個天仲出緊烈陽攻擊,穿過短短既隧道後竟然立刻係一遍純白雪景!好千與千尋呀!!!!!!
雖然已經唔係第一次係歐洲睇雪,但見到咁靚既雪山小鎮總係有種想大叫既興奮!
Malbun呢度係著名既滑雪勝地,有多個唔同既滑雪場同滑道,實在岩哂將來既我嚟呢度玩餐飽呀!
咁而家呢?係巴士見到窗外4歲既小妹妹都滑到James Bond咁,我絕對有信心係跌落山方面贏佢9條街ga!
而且又要租設備又一個人,算吧啦六師弟...........唔滑雪都仲有好多野玩ge~
例如有幾條雪山步行山徑都幾靚,之不過我上山行到一半就見唔到條路,而積雪已經去到膝頭哥,山勢就向左傾斜,下面就山谷........幾大膽都唔敢再行啦.......
落返安全地點,坐係雪坡上陽光下,食lunch影靚相砌雪雕,剩係咁都其樂無窮啦!

(雪中凍冰冰午餐 -- 前日食剩既蒜片意粉+蛋角+漢堡扒)


講到堆雪像,雪地上出現「新阿姆斯特朗旋風噴射阿姆斯特朗炮」是常識吧
你唔好心邪呀,呢個係能夠把江戶城天守閣炸掉,逼江戶城開城既戌威族的決戰兵器,別名「奔馳天雷」。也是「巴爾幹戰役」中引發「七日大火」慘劇既地獄般武器。也是行星翠山和卡鄉的星際戰爭中,和帶領著行星翠山勝利既美索多炮不一樣,而係一直被鎖在倉庫內既可憐武器。
所以呢,唔好一見到d棒呀丸呀就向果方面諗,而家d年輕人真係呀........唉



太陽仲未落山,見到剩返d瑞士法郎一於用埋佢!
約11€一次來回山頂既索道,係有d貴,但上到去高處飽覽雪山群,如此美景,貴多一倍都抵!
而且我敢保証,你一定會立刻愛上呢個地方!



回到hostel寫埋postcard,係時候同呢個地方講再見啦
一個起初完全無期望既國家,到而家瘋狂愛上,全因呢度不論係風景定人都好得交關!
想享受自在閒適的話,嚟呢度輕鬆玩返兩三日啦,你一定會滿意的。
同場加映hostel相片,我真係幾鐘意呢度呢!係其中一間我最滿意既住宿!

(左上係熱心既意大利麵包師傅,左下係屋主Mimi,右邊係長住係度既斯洛伐克美少女)

================================

另外有幾點關於旅遊列支敦士登要注意的 :

1. 列支敦士登既巴士係好疏而且有早無遲的! 出發去目的地前一定要睇清楚時間表!

2. 雖然係中門上巴士,但其實係要去返車頭問司機買票的,唔使打飛,地點以zone計,1 zone約3.5瑞士法郎即2.9€,2小時任坐,由Vaduz到Malbun係3 zone約4€,逃票罰款聽聞約$1000港幣.......

3. 如有時間可以坐巴士去埋奧地利接壤城市Feldkirch,好似係沙田過馬鞍山咁近距離je,聽聞都幾靚,而且列國人好多都會去果度買食品入貨,因為會平好多好多..........雖然佢地口中Feldkirch既好平好平都貴過維也納......而維也納又貴過德國最貴既慕尼黑.......即係........

4. 聽聞由瑞士Interlaken嚟呢度都好近,有意可順道一遊

5. 呢度由人民至生活既質素都非常非常高,但移民卻非常困難!方法有二 : 一,同當地人結婚。二,好有好有錢到做投資移民,我諗應該好過去岡比亞ge......

6. 成個列支敦士登Trip約4日3夜,計哂所有住宿交通用左約$1000港幣,係呢個唔係人類物價既地方,我覺得真係好勁ga la!所以平有平玩,窮都可以玩得好happy的!

=================================

相關篇章 : 

第四十五章 : 列支敦士登day0+1+2周圍走


=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!








2014年1月3日星期五

德國working holiday第四十五章 : 列支敦士登day0+1+2周圍走

Day 0
3/1/2014,別過慕尼黑既好朋友,一早就繼續我既旅程,出發去下一個目的地 ----列支敦士登Liechtenstein!
Geog差d既都唔知有個咁既國家呀!就好似我咁........嗱我係純粹google map見"有個咁細既國家幾得意wor!"先走去ga je!風土人情等資料全部都係出發前幾日先搵!
根據網上資料既綜合,列支敦士登係全世界最細既雙重內陸國,面積大約同大嶼山差唔多,東接奧地利,西連瑞士,郵票大國,雖然細但人民生活極富庶,《國家地理雜誌》2014必去旅遊地點之一,如果超級有錢既仲可以租成個國家一日嚟開party.............
點睇都係一個有趣既地方呀~唔去一窺其龍與鳳點得呢~
由德國去列支敦士登基本上無直接方法,一般都係要先南下到奧地利Bregenz或其他城市,再坐車到邊境Feldkirch,再由Feldkirch坐巴士入列支敦士登 ; 又或者由瑞士去到邊境城市Buchs再坐巴士入。無論邊個方法都非常轉接同麻煩!
至於我,竟然好運地係carpooling.com搵到白牌車由德國Ravensburg直達首都Vaduz!仲要只係7€咁平!咁我只要由慕尼黑坐DB到Ravensburg就得啦~真係開心快捷又簡單!
途中仲比我經過巴登湖影左幾張靚相tim!



終於嚟到列支敦士登!
岩岩嚟到第一印象就係有free toliet唔使錢好正.......幾膚淺呢你話.......
講笑je~其實係一落車已經被遠方既瑞士雪山所吸引住!
之後慢慢就覺得呢個國家其實好先進好有條理,而且人民好有禮貌好nice,英文仲好好tim!
首先去到城市Triesen落腳,又係正宗飄零燕式靚爆半山風景,但係airbnb搵到既住宿我係迂迴既山路上搵成個鐘都搵唔到!
最後當我搵到時就收到屋主的airbnb sms -- “sorry I forget to give you the address........"除左啤一聲外都無乜野講
入去原來係私下經營既hostel,但設備,清潔同友善程度都係一等一!
列支敦士登得一間公開既hostel而且聽聞唔太好,如果有網友想搵住宿可以inbox我,呢度超級推薦呀!
夜已深,同剛相識熱情既意大利人去買超市入貨,原來呢度係跟瑞士物價.............
即係兩隻雞肶$50,5塊豬扒百二蚊果類唔係人類生活到既地方啦........
shit........睇嚟coming 3 days都係靠呢包白意粉祭五臟廟啦.......
出去食?唔好玩啦,百2蚊個M記餐,一舊水個Kebap ar.......
晚餐用左半條司華力腸煮一大盤Cabonara連埋第日午餐,真係一個慳家既好男人呀..............



Day1
第二日正式漫遊呢個國家~
雖然話細國,但原來城市之間行起上嚟都幾甘!
由Triesen行到首都Vaduz話就同一個zone,不過直行都要近40分鐘,何況我係S形咁上山落山上山落山,咁就行左6個鐘!
其實真係無乜特別觀光點,Vaduz大約只係銅鑼灣咁大,城堡、市政廳、國會,無乜ga啦!
但如果你鐘意四周空擴無人既山水風景,咁剩係條萊茵河都有排你玩!
又或你想好似我咁無聊來回瑞士同列支敦士登十幾次既話都係可以的,個feel係似吳啟華某經典電影情節ge,但後果係咪一樣就唔夠膽講啦.........

(最古老連接瑞士同列支敦士登既大橋)

(呢個咁有性格design既係中央車站,發光既係有暖氣及洗手間既候車室.....好體貼ar.....)


晚餐係辣味蒜片欖油意粉配腸仔炒蛋,好好味但個口超臭........


Day2
去其中一個接壤既瑞士小鎮Buchs,只需要係列支敦士登中央車站坐巴士15分鐘左右就到,或者行過去都好似ok!
嚟到瑞士感覺上分別都真係唔大,可能同當日係星期日乜店都無開有關呱.........
但Buchs既地標Werdenberg城堡區又的確係唔錯的,十足童話故事中d動物國王既石頭城堡咁。行到上山仲可以欣賞天下聞名既瑞士山區風光tim,唔算天朗氣清,但都綠草如茵,名不虛傳呀!再行下林木徑,望返對面既列支敦士登,兩邊雪山既壯麗,唔講真係以為望緊另一個瑞士呢!

(山下既就係列支敦士登,真係同瑞士各擅其長!)


回到hostel打算第三餐意粉時,屋主Mimi竟然邀請成間hostel d住客同埋佢d朋友一齊食芝士火鍋!
正如我係facebook page所講 (右邊果條link呢~“https://www.facebook.com/Garcia.in.Germany” ,裡面有好多blog以外既靚相ga!快d like啦!!XDXDXD),我嚟左4個月都係第一次同成枱外國人食晚飯ja!飲酒就多!
雖然言語唔太通我又聽唔得好明,但此等經歷真係唔係成日有!而且佢地又好友善,食左非常開心既一餐飯呢!

下回再續!

=================================



相關篇章 : 


=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!