測試1

2014年3月26日星期三

德國working holiday第七十六章 : 食在德國豪華篇

上篇講完日常窮食,今次講下間中豪食!

去過德國既人都會知,正式豬手同係香港及其他地方食既完全兩回事!
香港既豬手多係先水煮後炸,皮脆,油脂多,肉色作粉紅,腍身,絲狀,帶鹹香,某d中歐國家既作品都會同樣相似的
至於德國既大致上分成兩種 :
巴伐利亞式燒豬手,其實應該叫豬腿或豬脾,多是先滷後燒,炭火為佳,皮脆到好似食薯片咁,皮下脂肪具彈性但少油,肉色普通豬肉的灰白色,不太鹹,卻有濃郁的豬肉香味,肉質結實彈牙而多汁,配埋肉汁,齒頰留香!
另一種係水煮豬手,以柏林為代表,先醃鹹,再慢火以上湯煨煮,上佳者該能以湯匙輕易骨肉分離,肉色粉紅,絲狀,味鹹重,皮下脂肪輕軟若啫哩,一口咬下滿嘴鹹鮮滋味,明知係肥都認不住食多兩舊!配以豆泥及酸椰菜,你驚覺得味道竟能如此的融合為一!
講左咁多,其實只係想講我地間中口痕就會走去食,一隻豬手12€至14€,燒既唔會好大一人一隻都ok,水煮既兩人share為佳,叫多樣野,咁又食飽喝足心滿意足!




至於腸方面,除非真係店家homemade,否則都係去超市買返廚房DIY化算得多!
出面食5-6€兩三條,自己買2-4€十幾條,而且味道分別唔大,說穿了餐廳咪又係同超市入同一樣貨~慳返d試其他野好過啦


(著名HP啤酒屋的香腸拼盤,約6-7€)


講到德國飲食點可無啤酒!
有人話德國啤酒平過水,又無咁誇,但一定平過可樂!
超市約港幣$6-10一支500ml,就算係某d香港難見又出名好似既如Masiel都一樣!
可樂呢?$8-14一支330ml...........有時真係諗,買嚟淋花都抵wor.............
牌子種類方面,多到後宮佳麗三千,而德國幾廿萬個城市都有當地特產的地區性啤酒,仲未計餐廳自釀既獨家品牌wor
講真,我幾乎一星期7支or杯,但仲可以有超過3成常見品牌我係未飲過的!
至於我常去睇波打躉既餐廳Berliner Republic更有十幾種生啤,由3.5€至4.2€(算貴),鐘意試啤酒既真係天堂呀!




係德國,牛羊係奢侈品,就算捨得買味道都唔一定好,所以係德國餐廳除豬手外既選擇真係唔多
椰菜肉卷,肉丸,燒雞都係普普通通,鐘意炸野可以叫奧地利名菜“schnitzel”炸肉扒,如果有Turkey火雞扒或芝士麵都係唔錯既選擇
另外仲有一種叫Flammkuchen,中文叫作火焰薄餅的pizza類物體,香港少見,是用酸忌廉+洋蔥煙肉芝士焗熟,批底像印度薄餅但酥脆,值得一試的!
至於魚同所謂既沙律?都係算吧啦




如果真係一定要食牛既,間中有d超市會有兩個拳頭加埋咁大既原舊牛仔骨,果d就正啦!
係“鬼佬唔識食骨”既情況下,只約3-4€一舊,抵到喊!
但其他唔連骨既“suppenfleisch”係牛腩一類,起碼煲返一個鐘先好食



so far係柏林咁耐,食過最好食既牛肉竟然係希臘餐廳!
一大份牛扒+two side dishes都係$120港幣!
其他前菜如麵包同芝士蘑菇都係無得頂的,佢已經成為我柏林最掛念的餐廳!




係希臘餐廳同一條街有間墨西哥菜都係我間唔鐘就幫襯的
5-8€一個菜唔算平,但份量十足,一個墨西哥卷有齊芝士牛油果燒雞蕃茄豆蓉薯蓉,好難唔好食ga wor!




另外有間柏林著名既橋底漢堡包我都係耐唔耐就幫襯下的
一個包+薯條+飲品約6-7€,份量+味道十足之餘,最正係間店既露天坐位係單車鐵改造而成,又位於馬路中間,風味十足!
佢位於柏林圍牆East side gallery附近,係我帶朋友行完之後既必到食肆!




其實柏林係一個國際大都會,各家各國既食肆都有齊,我呢篇講既只係冰山一角
仲有其他韓國菜印度菜日本拉麵美式英式酒吧明將壽司等等未能盡錄!
如果唔想只睇旅遊書介紹想自己發掘既,可以試下去以下地方~

S1,S2,S25線Friedrichstresse至Oranienburger Stresse一帶 : 
浪漫情調,中價餐廳至閒聊或睇波酒吧都一應具全,我上文提及常打躉的多生啤酒吧Berliner Republic及旁邊的科隆啤酒吧即位於此!
但此為遊客區,價錢較貴

U2線Eberwalderstresse一帶 : 
大量多國食肆,因是住宅區所以價錢不貴,味道多數不錯! 希臘菜及墨西哥均位於此。另外早兩個U2站的Selefelderplatz及Rosa-Luxemburg-Platz一帶都多餐廳酒吧cafe的~

U1線Schlesisches Tor及U8線Kottbusser Tor一帶
我都無乜去過,只係行過見超多食肆,聽本地人講係佢地日常既蒲點,有開發新大陸同體本地人生活的價值!

講左咁多關於食既,其實好明顯睇得到我係個超級為食鬼啦!
不過都戴定頭盔先!
呢篇野係以我住過既柏林同慕尼黑為根據,其實德國其他地方仲有好多特色菜,特別西北邊漢堡不萊梅一帶既海產魚類都幾有名,不過呢個就要遲d先發掘到啦!

=====================================

德國既生活講住咁多先,因為現實時空既我已經完結working,開始另一轉既長途旅行!
所以下一篇會變返遊記ga!
死啦好多野寫呀.................

 ===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








2014年3月15日星期六

德國working holiday第七十五章 : 食在德國窮苦篇

出發前總有人話 :「去德國就好啦,餐餐食豬手!」其實邊有咁富貴呀......我地working holiday人好窮ga ja......
咁我地平時究竟食乜ga?真係餐餐德國菜??
 
首先定義下德國菜先!
問香港人咩係德國菜,十個有十個都會話三步曲啤酒腸仔咸豬手
問德國人咩係德國菜,佢地反而會答麵包!
原來燒豬手只係巴伐利亞地區的菜式,而巴伐利亞人係德國又好似唔算受歡迎人物.......
但麵包就真係德國人不可或缺既食物啦!
牛油、芝士、榛子醬、果占、Salami,甚至各種土耳其希臘式既乳酪醬,加上各式各樣既黑麥包,咁就一餐ga la
入鄉隨俗,呢d都成為左我地呢d一貧如洗既常見早午餐,唔好以為我地真係餐餐豬手先得ga.......
 
(由於我麻麻果種乾麵包,所以都係買多士包自制三文治,當然都會豐富d la~)

(呢幾件係街買既,最出名既黑蝴蝶包我反而無影過相.........)

(某日野餐,好友日常既三文治,一塊沙樂美牛油都無滴,驚為天人!可見我地d生活幾苦呀......)

(右上角既係常見既希臘醬,款式極多,圖中既係檸檬草+芝士+蒜蓉,配你厚多士一流)
 

洋腸成日食就真ge!
腸仔種類又多又平,一包廿零三十蚊港幣食到兩三餐ga la,仲要味道差極有限!
個人偏好紐倫堡腸,貪佢夠鹹香,配沙律配公仔麵,甚至切片撈落薯蓉或整risotto都得!
一包約2.15€(算貴的),分開幾次食夾埋其他配料,一餐約$20-30港幣,ok啦
 
 

至於晚餐,因為我鐘意煮食,所以會攪好多花款不能作準,而我d朋友多數都係買白意粉加意粉醬,或煮最簡單既carbonara
如果成班人一齊食飯既話,先會有d香港菜式出現,而我嚟左歐洲後真係鍾意煮中菜多左,可能係思鄉啦
當然作為一個香港人,間中打下邊爐係唔少得ga la~
之不過肥牛有限又貴,主食有時就會變左腸仔同豬肉啦........
 
(經常出現既朋友C的Carbonara,非常不錯!)

(working holiday第二最佳作品,咖哩雞翼!)

(最佳作品 : 糖醋排骨!)

(肉骨茶)

(都唔係第一次出現既第三次自製叉燒,過得去啦)

(增援物資 : 蛋花福麵+五香肉丁)
 

唔想煮,出街食但餐廳又貴,點算!?
香港有茶餐廳粉麵檔支持住,德國就有幾樣野,我最鐘意就係去d意大利小店!
港幣$30至$45一個意粉或pizza,但會係香港百幾蚊既質素,仲會大碟到你以為隻碟係無底深潭!名乎其實蔗渣既價錢燒鵝既味道!
其實好多呢種小店都係土耳其人開的,之不過好味就得啦,話之佢!
 
(龍蝦汁蝦仁意粉,意粉屋水準但份量x2,僅3.5€!)

(3個人食得2/3,都係12€,即$120港幣,平到喊!)
 

另外最常食既就係Kebab,即係香港所謂既“土耳其轉轉肉卷”,又平又飽肚!
由於我好鍾意食呢樣野,所以遲d會專寫一篇呢個,暫按下不表~
除此之外仲有小型中餐館,可以3€至4€一碟鬼佬中餐=“炸野一塊加pat汁飯”,預左唔好食,但一定飽肚,好既中餐落樓起碼過百!
某d大型超市貴超市如REWE,Kasier's,Telexxxxxxxxx唔記得點串等,還有肉品店都有熟食賣,都係簡單平價醫肚之選
仲有其他燒雞店,腸仔包,柏林咖哩腸,麵包鋪等等唔講咁多啦~
 
(呢度約3€)

(柏林名物Currywurst,加埋薯條約2.8€至3.5€)

(一個腸仔包,由1.35€至3.5€不等,不過貴唔代表特別好味)

(花生醬炸雞飯.......好難想像會係中國出現既“中餐”......4€至6€)

(係超市買既德國肉餅包,約1€至1.6€)
 

仲有宵夜~
其實我係香港晚飯後就唔食野ga la,但唔知幾時養左個壞習慣,就係飲住啤酒睇戲寫blog!?
係德國我真係幾乎一日一支,但種類真係多到都幾乎無乜飲過重覆.......港幣6-9蚊一支wor......唔係唔飲ar...
一飲就想食野,於是於是生火腿+啤酒+電視就成為我每晚既指定動作啦!
生火腿咁串!!!??香港賣廿幾三十 100g呢度十零蚊ja wor.....唔係唔串下ar~
 
 

就咁睇落都好似好多選擇ar~
不過睇真d,無錯,全部都係肉嚟ga.........
都係果句,唔鐘意食肉,唔好嚟德國,你會好慘ga!!!!
 
 ===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








 

2014年3月8日星期六

德國working holiday第七十四章 : 柏林工作樂與怒

話哂都叫working holiday,講下德國既working啦!
 
係德國搵工絕對唔係一件易事,我9月過頭過嚟,住過慕尼黑同柏林,都要半年後2月尾先有第一份正式工作
其實之前係第五十九章重回柏林生活篇講過下,我做過服裝店打雜同幾粒鐘既助紂為虐包奶粉,但我最主要既打工都係中醫藥店做按摩師(個名幾型!)
 
其實除左我,仲有唔少德國working holiday人都係此為生,因為德語要求幾乎係零
雖然人工唔高,但最大好處就係我唔使日日返!
德國幾乎所有單對單服務業都要預約的(如剪頭髮),即係無客唔使返之餘仲可以做完就走飲杯酒,非常之咁自由~
如果按得好仲會有1€至5€貼士收!(試過有客串既女仔fd收過20€ tim........)
 
(比蚊貼士嚟都好呀)
 

聽落唔差wor!我d好朋友仲形容為“個女人比錢叫你摸佢wor!執到啦你”,真係非常之咁衰格,果然物以類聚!
但其實唔係咁好ga ja!!!!!!!!!!!
首先你唔好當嚟按親既都係全智妍十八廿二先得ga............係會有男客ga.....
有睇開我blog都知我超驚男人幫男人按摩!但全場得我一個按摩師,唔通話“阿媽媽生.....阿唔係!老細,我唔接呢d客ga wor!”
有一d身型比較健碩粗壯仲要用雙倍力tim! 按完攰過打場波呀!
而我公司一般由腳底按摩開始,托大腳都唔緊要,不過唔係隻隻腳都係雪白玉如意
腳氣、死皮、老泥、香港腳、無剪腳甲菌黑邊.............
之後按全身推油,一般客人都會除哂衫訓係度,只用毛巾遮住重要部位,而我就會開始對佢上下其手.......呀唔係舒筋活骼先岩
呢part先最囉命! 
試過有d客成個背都係瘡,我知佢都唔想,但我對手掂落去果下都真係幾難受......推背時仲好似有d瘡爆左tim........
而我多數顧客都係女性,佢有咩唔like或者我按多左接近左ge,話我X交叉Y佢一定係我唔著數! 所以我反而加倍謹慎,所有敏感部位連接近都唔會!
ar..........有試過按有臭狐tim呢,間房lock門開緊暖氣ga............
 
雖然咁多麻煩野,但份工起碼令我知多左穴位經絡同點按摩,返到香港幫屋企人整幾野都好!
而99.9℅客試過我後都讚不絕口(呢句真係好令人誤會!),都叫有d成功感ge~當然比我揀我寧願教返書:-P
按摩師又要出力又要忍污糟好辛苦ga!
各位下次按既時候,唔好吝嗇,比返多少tips啦!
 
 

至於我既朋友,最多都係做baby sitter,Hostel雜工,中餐館等等,但要數最受歡迎既,非Uniquo莫屬
咁岩Uniquo要係柏林開德國第一間分店,因日本公司所以需要大量“識英文就得”既人材, 人工仲非常不錯tim! 
於是本年度於柏林working holiday既香港人幾乎有一半都穿起白恤衫講聲"come bar wa"
做乜我無去?interview第一round已經比人篩走左la陰公..........
不過都有d慶幸,因為以我性格,要將d衫死板又重複咁摺完又摺,仲限定要日本式病態整齊近乎吹毛求疵,我應該發左癲!
至於我既好友,就識到一大班八國聯軍好朋友,由白俄羅斯、莫桑比克到敍利亞既都有~
唉所以得得失失,整定ge
 
(join埋一齊去五一勞動節街頭party時所攝)
 

其實我係柏林仲參與左套獨立電影既拍攝,話哂都叫自己半個老本行,嚟到德國都想試下演戲,雖唔係咩重要角色但玩下都好!
可惜拍攝中途導演有事要離開柏林,到佢返嚟時我都差唔多返香港拍唔切,商量過後只好辭演,有點可惜呢!
 
(導演和與我對手戲的女孩)
 

嚟德國之前,我以為衰極都可以係度教中文,話哂香港既中文教師有一定優勢
誰知真係乜都無!網上十居其九的“誠聘中文家教”都是詐騙,而我亦都無聽過有人搵到教中文既工
不過都好ge,working holiday就係要體驗不同的經歷,係香港邊有機會走去幫陌生人按摩ar,話你色狼就有!
關於工作ge就暫時係咁多,將來有機會再同大家分享~
 
 ===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








 

2014年3月3日星期一

德國working holiday第七十三章 : 科隆狂歡節唔太狂歡

用左兩個月時間寫1個月發生既事,我都算慢啦......
但點都好,總算返到嚟柏林開始working,2月至3月既生活係第五十九章時已經講過,今次就講返德國一d重要活動啦
狂歡節,係德國一年一度既超大型節慶!在外國人眼中是僅次於慕尼黑啤酒節的大盛典!
時間大約在2月尾至3月頭,為期約十數天,於德國各地都有活動,但最有名的則首推科隆狂歡節!
其實我有猶豫過去唔去,因為由柏林出發需時8個鐘,一來一回又16.........加上工作果度又要請假......
但唔錯過任何精彩事係我既宗旨! 難得生活在德國wor.......
一於係狂歡節最重要既Rose Monday,來一轉瘋狂既即日來回啦!
3月3日早上6點半來到德國西邊既科隆,雖已步入春天但朝早依然凍到黐肺
想搵間店飲啖茶食個包,開頭以為太早未開門,但原來Rose Monday係科隆法定公眾假期,德國既假期一向係死城,唯有周圍逛下,而都開始見到d巡遊隊伍預備了


好不容易搵到間店hea到10點幾,開始見街上出現人群...........等等先點解我好似有d格格不入ge?
望望自己.......黑色外套,T Shirt,牛仔褲波鞋.......沒問題呀.......
望望人地.......粉紅色假髮,Mario工作服,哈利波特被風,中世紀女巫柺杖.........成條街得我一個一本正經??
原來德國狂歡節就係一個超級大型既扮鬼扮馬cosplay party!
一向嚴肅拘謹既德國人,係呢日會花盡心思極盡扮野之能事,由卡通人物、妖魔鬼怪到國際知名人士乜都有!
想像Halloween時既蘭桂坊,但係全個城市既規模wor!
我著牛記笠記嚟,梗係比人歧視啦!唉早知ge就預備好先嚟........好想扮伊利沙白........


重頭戲大型花車巡遊開始!
花車由科隆不同的團體組織組成,由消防隊、NGO到足球隊都有,當然全部都係扮到花呢碌ga la~
巡遊中除左有舞蹈唱歌銀樂小型雜耍等等外,最重要都係“派糖”!
唔係班政棍年年叫財爺做果d,係每個巡遊表演者----------不論車上或步行的都會好似觀音灑聖水咁將d朱古力糖果吹波膠周圍飛!
仲要唔係一兩粒,有d係成盒過年金莎咁係兩層樓高既花車上飛落嚟!痛ga喂!!!!
不過,大家都好enjoy的,可惜就我所見,不論大人細路,ee牙鬆gon拉衫飛撲,拳打南山猛虎,腳踢北海蛟龍,寒冰掌推甩兩件,就為左拿著粒糖你很快樂期望贏間廠
May be文化差異或我孤身一人enjoy不能啦,我真係覺得好似古時d有錢佬城隍廟派饅頭d無家可歸的人搶住要..........
anyway,就算我想要,d派糖既見你一個年青男人都唔會派比你啦,派比後生女同小朋友唔好~
而我見我身旁既藍精靈反應慢唔夠快無速度,跌係我身體既都比哂佢啦


話就話個花車巡遊都幾華麗,頭一個鐘都仲ok,但越睇越差唔多,越來越悶,到第五個鐘頭終於頂唔順周圍行下啦!
可惜因道路封閉,好多地方都去唔到,更加唔好話入去舉世知名既科隆大教堂啦
行左一圈,又迫又悶又多人,都係搵間coffee shop望住教堂寫blog la......


開始以為夜晚會有d咩function.........係有既,但全部都係飲酒跳舞既party party同party,一向唔係派對動物,所以都係有d無癮
舊城區已沒有寧靜又有坐位既餐廳,唯有走到區外搵到間墨西哥餐廳,都係輕鬆既氣氛下飲酒岩我~
嘆兩三杯獨有既科隆啤酒,坐到10點幾就坐車返柏林,完成呢個一日day trip..........又坐返8個鐘ar............


後來聽返d德國人講,佢地話狂歡節既精華就係晚間派對,咁怪不得我覺得“狂歡節”名過其實啦
總覺得德國人咁重視呢日咁開心,係因為平時拘謹壓抑得太勁,唔借d ee發洩下唔掂
anyway,總叫見識過,如果一班fd一齊又鐘意party,我相信狂歡節係不錯的!
同埋記得makeup ar!!!!!!!

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!