測試1

2014年5月31日星期六

德國working holiday第八十七章 : Durham紐記新特蘭

嚟英國前我哎也契女已經叫我一定要去Durham!仲話超期待我呢篇講Durham既遊記,攪到我勁有壓力!
咁呢個地方係佢大學exchange及與男友定情之地,我寫得唔好既好對唔住人ga wor!
但老實講Durham又唔係想像中咁amazing.................ok我都係入正題啦~~~~

作為世界文化遺產,Durham係英國著名既公式化觀光小鎮 -------- 即係有河有橋有城堡有教堂
唔同既係主要以英倫風格建造,所以明顯同布拉格,海德堡,克拉科夫等歐洲著名靚古城唔同
咁即係有咩唔同?
..............................................
Hey呢d咁悶既野唔適合係我個blog講ge~~~~有興趣既朋友可以自己搵google ga ma!



過橋後蜿蜒而上到達中央街道分岔路,The Market Hall就在旁邊入口
此market最有趣之處係集合左大量心意卡,生日結婚道歉分手串咀毒舌.............幾乎妳諗得出既種類都有,而且內容非常有趣!
如果要睇哂所有我諗無兩三個鐘都唔得


(呢條Y字路就係契女當年上堂既地方,希望佢鐘意呢張postcard啦)

(父親節我send左呢張相比老豆,佢不知幾開心!)

Durham最重要景點就係呢座Durham Church+方形草地
但也許最為人熟知既,就係哈利波特第一次學騎飛天掃把就係呢處!
可惜教堂入面唔係霍格華茲飯堂場景,只有一對新人結婚進行中影相不能,又一樣只可遠觀不可褻玩的地方.....



其實我成日有個疑問,單車座位咁大個pat如果長期坐都有機導致陽萎,咁掃把得支棍,飛行時全身下墜力集中於一點..........就算要鍛煉果舊肌肉都好似太過份了.......
你話J.K.羅琳唔知會有呢d情況咩?作為一流作家一定會諗到!
但唔通同小朋友講「哈利波利係一個有陽萎既魔法界救世主,所以佢成日食砵仔榚...........」
呢d野,都係側側膊算啦........



由於有百年歷史既University of Durham要報full到爆既tour先比入,所以只好改為由面對教堂的左方小路向前走漫步下河邊
可能由於天氣熱,蚊多蟲多,唔係行得咁過癮.........
三個鐘左右已行得7788,諗住食d野+買postcard hea下,誰知所有店舖下晝5點準時關門大吉!!!!
大無奈........唯有早d走,結束Durham一日之行
總結嚟講就唔係話唔靚,但可睇既野就真係比較少,都值得一行既!



話時話,做乜上一篇明明係愛丁堡,今日又返返嚟英國ge???
之唔係仲有一位美女老友現正係新特蘭Sunderland讀書law~
而去新特蘭,Durham同出入英國北部地區,紐卡素都係個唔錯既選擇,火車巴士直到之餘,廉航Easyjet係呢度有好多航線,雖然我唔覺Easyjet有幾廉.......
所以因利乘便,行埋呢兩個英超城市~
個人鐘意紐卡素多d,除左以前鐘意舒利亞外,融入市區的山城及泰恩河畔幾條橋我都覺幾靚~



至於新特蘭,唔係我個fd講都唔知原來係大學城!
但老實講真係無乜野睇,英超又收爐中,反正醉翁之意不在酒,在他鄉與老友打下邊爐吹水唔抹嘴,自有另一番風味~



至此英國之行正式完結!
計埋蘇格蘭,我總共係呢個西方島國stay左12日,係除左德國外逗留最長時間既歐洲國家,同時亦係使費最貴既國家!
有一半時間訓朋友屋企,有時食飯唔比我出錢,咁樣都可以同丹麥一樣用咁多!可想而知正常情況會係點!
而且遊左近兩星期,總覺得英國人好多都係表面友善實質後面插你幾刀果種辦公室樣,加上各種各樣非常不user friendly既設施與服務,真係令我對呢處沒甚好感!
不過,能與難得一見既好友於外國相聚,無價ge~

==============================

想特登寫篇講英國食物既篇章,但由於手機張sd card報銷左要返香港先整到,所謂無圖無真相,遲d再寫啦~


My Facebook Page : https://www.facebook.com/Garcia.in.Germany ,請多多支持!~

2014年5月30日星期五

德國working holiday第八十六章 : 係愛丁堡唔去愛丁堡究竟做乜好

大學時係AYP莊,所以聽過有樣既叫愛丁堡公爵獎勵計劃,到空姐朋友去完愛丁堡話好靚我先知原來係蘇格蘭!(我都話我geog好差ga啦)
聽到蘇格蘭又唔同講法wor,一直都聽講係個好有特式既地方!
蘇格蘭威士忌、蘇格蘭格仔裙、蘇格蘭場警察學校、 蘇格蘭場非工業用國際線路自動溶雪16 Valle風油太垂直升降大包圍連擂射彩色洗衣乾衣腐蝕性氣墊毛筆一枝等等等等
咁多出名野,難得到左英倫島,唔可能唔嚟ar?~

於劍橋坐廉航Easyjet約$400-$600港幣飛約1小時就可到愛丁堡,但Easyjet價格浮動得好利害成日加價,宜睇岩就買(講係咁講ar......)
呢度物價比倫敦略平,但都係貴到嘔,我其實真心唔明點解英倫一帶可以有北歐咁貴........
唉嘈完就算啦,愛丁堡最出名既就係果座愛丁堡!
傳聞中係乜乜乜咁咁咁同點點點ge -------->即係詳情請參閱維基百科~
wei唔好扔野住!!!!!!!!因為我根本無入去點講je!!!
乜料呀嚟愛丁堡唔去愛丁堡????
咁話說果日紅雨咁勁,我因為plan行程攪到勁晏先去,3點到4點,收無理由淋住雨比兩舊水睇1個鐘ga,加上古堡見得太多,把心一橫算數啦


(呢張係第一日無落雨遠睇影既)


唔入城堡仲有好多野做ge,去爬火山啦!
Holyrood Park係位於城市既死火山,基本上成個愛丁堡陸地都係由佢既火山岩形成的
一d都唔難行,沿路風景優美,仲可以飽覽愛丁堡市全景,不錯!


(有大學教授帶學生做實地考察)


行完可過對面既Calton Hill,又係上山,不過今次就係對岸望返火山,仲有一堆紀念碑增添情趣
除遊客外不少青年男女都係度拍拖談心,行過都偷聽唔少「如果果日你無遮我就無得一齊lu」「今晚去邊je衰鬼~」
實在難以想像呢處係古時放逐瘟疫病人的禁區



愛丁堡舊城區大家去得就一定會經過唔使多介紹啦~
講真,的確係非常靚非常典雅!我覺得係一個純灰棕色兼少條河既布拉格!
只係d雕像同街道房屋都有排睇!
如果有興趣知多d當地歷史故事可參加當地既free walking tour,不過我份人太孤僻,一見成50幾人鴨仔團即刻無興趣,都係自己行再返屋企慢慢睇資料啦!


(d格仔頸巾種類多到好似垃圾咁周圍扔)


仲有我去左個叫Cramond既海邊
話說紅雨果日去唔到愛丁堡,橫掂個人又濕左又無野做,就去左呢個聽聞潮退時可步行過對面島兼海上睇日落既美景
諗住晏d細雨,點知越落越大,我又無著防水衣物,海邊又橫風橫雨,行唔到去對面島之餘連低褲都濕埋!
無奈下走入海邊酒吧用火爐烘乾個人啦......
wa不過間bar好抵!!!!!唔使£1一杯生啤仲有5種任你揀呀!!!!!!!!!!


(其實天氣唔係咁惡劣既應該真係會好靚!)

(走時細雨左又潮退,終於見到條路!)

最後嚟到蘇格蘭,唔係唔飲威士忌呀!!????
最衰係我阿哥同個fd,幾年前教我飲威士忌攪到我愛上左!其實講真我嚟蘇格蘭一半係為左飲正宗蘇格蘭威士忌XD
去左間叫Whiski Rooms既Whisky bar,型仔bar tender介紹我飲呢隻Kilchoman
Islay,6年, 唔知peatiness定smoky ,話係因為新廠所以連蘇格蘭本土都唔常見,但完全岩哂我taste!!!!
唉如果唔係廉航上唔到機我都想買返香港ar.......
(呢件事其實我係fb page都講過,不過我長氣講多次je~)



愛丁堡市就係咁多先,嚟到蘇格蘭點可以唔去世界聞名既蘇格蘭高地呢?
加上High Land Park係自己最愛既Whisky,點都有d fantasy,所以都有d 所以一聽到有tour去唔使諗即報名!
hostel呢個tour分1、3、5日ver.,當然越長時間越多野睇同時都越貴啦
時間所限我只能報1日遊,點知就中計............
去左兩三個高地小鎮,無導賞介紹,只係到站-->扔落車-->自由時間,最精彩既只係靚山谷中停留廿分鐘......
喂睇小冊子好靚ga..........自己又大安旨意無睇清楚去唔去著名既巨石陣........
縱使帶團位哥哥仔非常風趣,但仍然有點失望.........



愛丁堡真係一兩日可以攪掂哂既地方,但高地就可能真係要將來嚟多次啦
又下次??????邊有咁多次下次大概可以????
好啦.......為左Whisky再嚟,好似會開心d ar ho~


My Facebook Page : https://www.facebook.com/Garcia.in.Germany ,請多多支持!~