測試1

2016年3月20日星期日

日本紀伊半島Day10.2 - 南蛮亭,全部都係雞的最強小店

一般小說既尾聲都會係最高潮所在!
可惜妳而家睇緊既只係一個無謂人所寫既無聊遊記~所以係同無樓一樣係無高潮ge!
而呢10日之旅既最後一站,sorry,都係食!
記得4年前阿哥話帶我lai日本食烤雞串時,我嗤之以鼻
因為係我印象中,烤雞串係日式放題裡一pat厚厚既甜醬”漿”住一團烚熟鞋肉既恐怖食品,完全唔明點解會有人鐘意食
點知係南蛮亭食完後,方知香港果知連S都不如! 雞肉料理原來係可以好食到咁!
由於實在太好食啦! 唔食過我真係唔忍心離開大阪! (雖然根本就唔想走)
所以儘管只有一個多小時的空餘,都要即刻走lai難波高島屋對面條巷仔,搵返呢間亳不起眼的燒鳥店,再嘗那震撼人心的美味!


(放張12年既相先~)
南亭

你可能會覺得我個intro有無咁浮誇呀?
但我想講,當我17:15到達呢間5點正開門的小店時,間野已經full house左兼門口已經坐左一大排寒風中等緊位的日本人! 而呢間店係大約有1/3個籃球場咁大ga!
名店je,都唔使咁誇張ar!?
根據經驗所得,一間食肆門口多人等位不外乎3個原因 :
1. 新屎坑
2. 好Q好食
3. 追債
以一間開於市中心地段屹立多年,仍有咁多本地人在寒冷街頭排隊既食肆,我都幾肯定係第3點無誤!
唔好輸賠! 點都排埋一份!


 photo 2722 - P3203519.jpg

點知唔夠10秒鐘,店員知道我係一支公,就捉左我去後鋪唯一一個bar台角落位坐低
我想講,個位真係好迫好迫好迫……..仲迫過繁忙時段既澳牛ar…….
只不過有得食已經好好了,而且坐bar台可以睇住師傅專注力100%咁精心燒烤,只係個feel都已經夠哂滿足~
同埋,我真係無見過會同時間有3個師傅係度燒野食……呢間店會否真係忙得太過份ar…….



問店員囉英文menu,佢反問我係唔係要中文menu,一時口快話好,佢就比左份簡體字既我,而自始佢既神態就好似多左一份輕視……希望只係我多心啦
聽阿哥講,以前呢度既老闆好鐘意請中港台留學生做part-time,理論上就唔會太有歧視的
不過,以前迪士尼樂園條街夠唔會有便便出現啦,10年前香港人都好鐘意去菲律賓玩ga
世事既野,好難講ge


(網絡圖片)

留意下個menu,無睇錯,係有3款生食ga!
呢個都係南蛮亭既名物-----雞胸肉刺身、生雞脾肉同雞腎刺身
無好話點解雞內臟都有生食咁恐怖,日本人整刺身有幾咁奇? 牛舌刺身都有啦,生勾勾同隻牛打茄輪wor!
同埋如果要搵一個地方可以令你放心試食新奇古怪既,我相信全世界只有日本
頭尾兩樣我上次食過,雞胸肉刺身似食濃味帆立貝,雞腎刺身則滑而爽脆,同樣非常不俗!
今次我就試左生雞脾肉,估唔到上菜竟然係”半生雞脾肉沙律”!?
雞脾肉以灸燒帶出輕微的雞油焦香,粉紅色的中央仍是鮮甜彈牙,配以沙律菜、海帶絲、白蘿蔔蓉、炸蒜片、生洋蔥及大量青蔥花,最後以檸檬汁作整合調和
吃下時輕盈香脆,雞肉嫩滑,各種香味係口內大爆發,正呀!!!!!!
不過呢個沙律有一個好嚴重既問題----------
大佬頭盤lai je,使唔使Ruby Tuesday咁大兜ar! 食完我飽左一半,點食其他野ar???



三國志記載,姜維被殺後,士兵「剖其腹,其膽大如斗」
而我唔知日本d雞同姜維有乜關係,可能同我而家講既野一樣都係無關係,但點解個串燒雞肝可以大到成粒荔枝咁,仲要軟嫩到好似綢緞一樣,完全無渣的!
係香港,最高級的日式串燒店都未必做到ar!



主角鎮店之寶-------汁燒雞串
上文都講過,香港既燒雞串只係一pat醬汁肉,而呢度,係真係有雞ga!!!!!!!!
……………………
有咩咁值得驚訝呢……….燒雞有雞同西多士有屎一樣有幾大不了ar……..
但令人回甘既醬汁,與蔥香雞香合而為一,果種滋味真係一世難忘!
對比起香港放題店既急凍甜醬肉,就好似平時電視睇開陳偉霆反白眼覺得好正常,有一日轉台見到湯漢斯嗌Wilson先知呢個世界咩叫好演技!!!
雖然一碟成300幾yen好似好貴,但每串都係兩隻手指厚,過15cm長的足料大烤肉! 仲要足足3串咁多!
細食既女士可以一碟已經ko! 再考慮埋質素,簡直係超值tim la!



食完上面3碟基本上已經飽哂,不過我唔記得我仲叫左炸雞………仲要我原本係想叫”南蠻炸雞”而叫錯左”唐揚雞”……..
Anyway,係差左個南蠻沙律醬je,分別都唔算大,之不過,可唔可以唔好咁大碟ar!!!?????
我見到有6個兵乓波係碟上面呀!!!
但果陣炸雞獨有既油香又令人食指大動……..唉都係食一兩舊啦
有時,真係好邪門,一入豪門深似海,最後我食哂6舊,個胃比兵乓炸雞炸爆左………
喂! 外外脆內軟就梗局ga啦,但D肉汁趵突泉咁標出嚟就實在太過份啦!!!



就係咁樣,我食到懷疑會超重上唔到機,連啤酒埋單大約3000yen
睇落唔平,不過唔好忘記得呢度幾乎係二人份量來的!
講真呀我係呢個blog都介紹過唔少日本小店,每間都各有特色,但以食肉計,呢間既味道真係最強中的最強!
同類型的鳥貴族(東京散心Day1.4 – 宵夜篇,鳥貴族280円之今時唔同往日)係好食,但同南蛮亭一泊埋就好似MOS Burger vs BurgeRoom高下立見!
所以結論就係「性價比超高! 嚟大阪一定要食!」

Hey~我寫得呢篇野,都預左我有個咁既結論ga la~
不過岩岩介紹既全部都係雞,如果話我唔係好食雞咁點算呢?
咁其實蕃茄沙律、汁燒洋蔥都係南蛮亭既名菜來的,亦都有烤豬五花肉及烤牛肉出現
但係,邊有人去KFC死都要食吉野家牛肉飯ga??????
更重要既係,你唔食雞既話又做乜要lai呢度ar???????



====================

《南蛮亭》
大阪府大阪市中央区難波4-5-7 プラザレスパル 1F
https://tabelog.com/osaka/A2701/A270202/27010937/
南亭2

================

話咁快,10日既日本紀伊半島之旅至此正式完結~(快你個頭!寫左成年呀豬頭炳!)
呢個Trip係我返新工後既第一個旅行,名乎其實越是期待越是美麗,的確不負所望!
三重縣,和歌山縣,熊野三神社,熊野吉野國立公園的海岸……通通都靚到不得了! 仲試左幾項日本本地人既日常玩樂體驗tim,總算不枉此行~
希望呢個紀伊半島系列會對有興趣去果邊玩既朋友有幫助啦!
好啦~
下篇開始新連載之前,要寫少少責任義務性質既文章先,對我嚟講都係一個新挑戰,因為要係公式同個人風格之間保持平衡係好困難的!
點都好,希望大家會繼續支持呀!!!!!!!



================

My Facebook Page : www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com
請各位繼續多多支持呀!!!!!!!!!!!!!!!

ging
始終都係整唔到Facebook Plugin Page,唯有用photolink頂任先!

日本紀伊半島Day10.1 - 獨欠櫻花的櫻之宮

問10個香港人「香港腳發作點算?」10個都會答妳「用愛x堅啦!」
同樣,問10個大阪人「睇櫻花去邊好?」10個都會答妳「去櫻之宮啦!」
儘管天氣仍然鬼死咁凍預左未開花,不過難得3月來到日本,last day去搏一搏睇下有無一兩棵都好呀!



櫻之宮位於大阪城北面,最方便係由梅田坐JR大阪環狀線,順時針第二站就係櫻之宮,出站向南行就會到達毛馬櫻之宮公園
或者坐JR東西線、學研都市線到大阪城北詰駅出站就係



無碼宇都宮………ar唔係,毛馬櫻之宮公園其實係一個新月狀的河畔公園
冬去春來時份,一棵棵的櫻花爭研鬥麗,沿河岸堆砌出粉紅色的櫻海大道~wa呢個幻想幾咁美好呢~
不過正如古人智慧所示,所有粉紅色的事物都係可遇不可求的
以我既運氣,當然係除左粉紅色幻想外係乜Q都無啦! 應該話只係有光禿禿既樹枝樹幹,或一堆未開的啞色花蕾



咁係咪無野睇呢? 又唔係wor
雖然成個公園都係一堆柴,但我仍然覺得幾靚,而令到佢靚既,係人,係生命力
Wa阿鋒你做乜寫d野變到咁作狀ar??
唉大家誤會了……..我本來就係一個文質彬彬得lai帶點感性,感性得lai又帶d性感的文學人,平時d惡攪同胡言亂語都係扮野ga ja……….
桜之宮公園與其話係景點,不如話係一個本地人的生活加油站
在這裡,有練習跑步的中年人,有牽手散步的老夫婦,有推著BB車的少婦,有帶上耳機看書的學生妹,有在人工沙灘玩閃避球的學生妹,也有一群在自拍歡笑的學生妹,更有………
得啦夠啦!
總之就好似我地放工or食完飯行下觀塘海濱公園咁,係一個休憩放鬆的場所~
只有係呢d地方,先會見到當地人最真實的一面,只係呢一點已經夠我漫步細味了~



當然,天氣好都係好緊要的
於青藍天下漫步公園本就係賞心樂事~
好簡單搵張凳坐下睇下書食個cake,或者同三五知己係樹下吹下水玩下啤牌已經好開心~
相中的girl’s group正玩得不亦樂乎,有一剎那我都想走埋去join識下
靚女朋友~
但一陣就要上機,都係廢事比班靚女纏住走唔甩,唯有慨嘆大家有緣無份啦……(事實係我行過時佢地啤一啤我,我嚇姪左…….)


(點會無啦啦有隻鶴棟左係樹上面ga……..)


櫻之宮公園咁樣行一轉就差不多了~
雖然乜櫻花都無,但仍然係一個非常靚同舒服的休閒勝地~
係大阪想hea的話,不妨lai行個圈呀~
要預備返香港了!
不過走之前,仲有一個地方要去----------------
下回紀伊半島最終回!

================

返到嚟香港第二日,遲我兩日出發既好朋友fb post相「wa大阪既櫻花好靚呀!」
我%^$&^*&*%#$#$#&*^&(^%$^#!$^*&*%^#$................

================
My Facebook Page : www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com
請各位繼續多多支持呀!!!!!!!!!!!!!!!

ging
始終都係整唔到Facebook Plugin Page,唯有用photolink頂任先!

2016年3月19日星期六

日本紀伊半島Day9.2 - 清水寺夜間參拜+東山花燈路見聞錄

續上回~嚴重塞車之下粒幾鐘先係銀閣寺去到清水寺
講真清水寺我都去過,上次仲要咁岩落雪好有feel tim,今次都係打算係外邊行下參道影張相就算,況且落車都已經近5點鐘,平時17:30收工呢
誰知係巴士做緊沙甸魚果陣,多手囉起掛左係司機位旁的旅遊小冊子--------清水寺夜間參拜,今日有!!!????



就係咁,我17:20上到清水寺,問左幾位唔同既工作人員,係雞同鴨講之下都係唔知夜間參拜係要「入左去等到夜晚」定係「夜晚另外有ticket要買」
而見住有幾位日本人係呢個last mins都飛奔過來買飛入場,以防萬一,都係入左去先好d,所以我就係收門前最後4分鐘入左去
唔使擔心,17:30係door close only,遊客仍然可以係裡面玩到妳夠的~



係寺裡慢慢行ar hea ar影下相ar,不知不覺到6點幾了,清水寺範圍內既遊客計埋我冷冷清清只得7個人
傾談之下知道大家都係為夜間參拜而來,只係我地都有疑問究竟使唔使再買飛?
慢慢見有其他工作人員開始把守各個出入口,細問佢地可惜又溝通不能,只是佢地又無任何叫我地走既動作
再過多陣-----清水寺上看台突然熱鬧起來人潮湧現! 睇嚟我地係無意中踩過左兩個時段了



既然係咁,唯有繼續錯落去,由音羽の滝走返上清水寺看台,瘋狂影下難得一見的清水寺夜景啦!
Wa痴線!!!!!!!!!原本清水寺已經係勁靚,而家入夜既燈光影照下再升華做超超超靚呀!!!!!!!!!!!



行返落樓下,又係另一種唔同既日本風情畫wor!!



日本人既燈光運用真係出神入化
佢地利用唔同既光芒,將只能在陽光下展現美態的花卉,變成另一種華麗的藝術,就好似一個美女日間穿清純學生制服是一種美,夜裡換成雍華晚裝又是另一種美
你從來無諗過夜晚賞花會是如此樂事~
亦無諗過這個夜間參拜,會令整個清水寺一步一轉,都是美到極致的幻境



只係呢個夜間ver. ge清水寺已經謀殺左我超多相機memory,不過仲未完的,清水寺參道旁著名的” 一年坂、二年坂、三年坂” 街道同樣於夜間參拜期間照常開放~
仲變成了”京都花燈路”,小道變成了祭典,超有feel啊!


(有人賣藝tim)

(夜間參拜既門票部,都係同日間一樣400yen)

(花燈設計比賽都有)

(d小學生又design得ok wor~)


由入夜的清水寺開始到而家,每一個畫面都係靚到wawa聲的,理論上keep住wa左咁多個鐘,唔單止審美疲勞症開始發作,連兩腿疲勞症進入極度嚴重階段,
行到二年坡名勝高台寺,望一望,心諗4年前先lai過……不如放棄去食飯把啦,由金閣寺開始,我已經行左10個鐘了……..
但個心又唔抵得……..「可能night view會唔同d呢~~蘇州過後無艇搭ga la~~~」終於都係拖住對腳入去
又果然真係有驚喜wor!!!
除左夜燈做成的神秘庭園景致外,仲有第一次見,用整個白色碎石花園做background screen的激光動畫!
會唔會太有型了??


(高台寺入口)

(呢個觀音像…………猜一套著名漫畫場景)


未算! 更有型既有沿山路而下的一大片高台寺竹林!
陽光下的竹林為人間仙境相信無用致疑,但估唔到夜色下的竹林都可以如此精彩! 簡直靚到好似進入左另一個世界!
除左氣勢兩個字,我真係唔知可以講乜
好彩有入到來高台寺ja…….



最後行到落八坂神社,吸引的不是神社果3個大鎯鎯,而是神社廣場中央那燈籠屋
Sorry我真係唔知呢舊野正式名稱係乜,只知有種奇幻的異樣美,令到我係咁舉相機
Um,手震+偏色ar ma,我知ga la~


(行過長樂館外,買左最後一杯熱紅酒,味道和德國Gluhwein差天共地,但此時此景此天氣,仍是一件樂事~)


就係咁,我行到花燈路10點幾熄燈先肯走
出到祗園四條時對腳同個胃已經唔係自己ga la……我都幾sure只係今日呢一轉我都瘦左幾磅……….…….
所以有quota食野啦!!!!!
Last 1晚我要食好多好多烤肉呀!!!!!!
於是嚟左呢間好好味既烤肉店「焼肉やる気 河原町店」,整個2800yen中間位放題食個天昏地暗!
講真,100分鐘任食嚟講唔算平,但用料靚並調味得當,味道真係一流!
仲有半個爐咁大既牛扒任叫! 鐘意玩grill既朋友一定過足癮~
(由於呢間野唔算有好大特式,所以簡單係度講幾句就算,唔獨立成章了~)


(食飽哂先嚟咁Q大塊肉………)

(但又好Q好食wor! 太過份啦!!)

Day9就係斷左對腳+抱住個肚之下完結
下篇開始Day10 =last day了!
=========================

其實清水寺一年四季都有幾日接受夜間參拜,詳情可以去官網望望~
http://www.kiyomizudera.or.jp/lang/02.html

=========================

焼肉やる気 河原町店
https://tabelog.com/kyoto/A2601/A260202/26003927/
開到凌晨兩點,宵夜食肉一流!

=========================

My Facebook Page : www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com
請各位繼續多多支持呀!!!!!!!!!!!!!!!

ging
始終都係整唔到Facebook Plugin Page,唯有用photolink頂任先!