2017年8月22日 星期二

伊朗獨行11th - 亞茲德d本地餐廳又幾好食wor~

Yazd所食過既野,係要特別開一篇嚟慢慢講的,
一來因為係呢兩日三膳的用餐經驗實在頗為有趣
二來應該唔係好多伊朗初心遊客會走去試呢d旅遊書無講既神秘餐廳,而家就將我做白老鼠既經驗分享比大家,要唔要試就自己決定啦~

1. 本地串燒
係阿米爾喬赫馬克建築群Amir Chakhmaq,即係果個牌坊直行入去,成條路都係本地的鐵串燒烤餐廳
我中午行過時,鋪是開門的,但唔好話鬼佬,連鬼影都無隻,除左幾位波斯大叔係度叉肉,剩下的就只有街道內淡淡的肉類腥臭
照道理呢d主要地標周邊既餐廳應該超多遊客勁吃香ga……奇怪啦…..



我翻查Lonely Planet同Tripadvisor,竟是完全無任何呢條街既飲食資料
一個咁靚地段既食街竟然無任何介紹?????
問下其他朋友,佢地既結論係「唔介紹即係唔recommend,唔係難食到爆炸就係污糟到核爆啦」
我諗一諗果個環境……..睇嚟都係衛生問題居多了……
到夜晚再行過建築群時,又見到好多本地人係度用餐wor!
Arrrrrrr我對「本地人常去既隱世地點」最無抵抗力ga la…………….唉痾就痾啦!!!!!!!!!!!!!!!
終於我揀左最多人幫襯入口左邊第一間小館做刑場,背後響起賭神既音樂,冒住生命危險,身先士卒,慢步進入呢個腸胃炎支配既領域了……….(妖……食個飯都咁多廢話……….)



一如所料,一內進全場9成半入座率既視線即刻集中哂係我身上,店員好似對一個東方人撞入嚟顯得唔知唔做,唉我又何嘗唔係呢…….
呢度係大x活式先睇menu比錢後有專人送上,我望住個牆上既餐牌,好認真咁研究左5分鐘……………
On居! 我睇咁耐做乜鬼??? 根本一隻字都睇唔明!
佢標示既英文唔係我地既常用字,等於查《現代漢語詞典》「靚仔」唔會出現「白飯」、check《大英百科全書》OT同檸檬茶一d關係都無一樣,廿幾個items只睇得明kebab同salad!
Google photo網速又慢………都係亂叫算啦……..
10分鐘後上台--------竟然叫左d咁既野??
--------------------------------- 3串好大既鐵支各只有幾舊唔係好大既肉粒!
最下方既應該係羊潤,粉粉地唔算得別
中間係羊肉粒,有羊味但韌,兼且呢串唔係即燒,有d失望
最頂係牛肉粒,反而咁香味美,脂香且滑,不錯!
另外最lucky係side dish果part求其order既竟然係蒜味乳酪~用嚟配桌布餅無咁乾仲好味左~



唔夠喉,encore!
今次出現既係羊肉kebab ------- 香料同羊味濃郁,岩我!
另一申係同尋晚黑大叔一樣既蕃紅花烤雞 -------- 一樣咁好食,胸肉都嫩滑可口!
最後一串唔知咩內藏 ------------ 算吧啦,伏係要中下的



食到飽哂既道地大串燒,價錢大約係$55港紙左右,唔算貴ar~
更好彩既係,我呢個玻璃肚竟然都無痛無痾wor!
所以,絕對值得一試ar~


2. 本地三文治店
係google map並無呢間野既資料,係我唔記得影相既情況下真係唔知叫咩名,但就算有相,我又識鬼個波斯文叫咩名呢………..只能講間店係十字路口面對Amir Chakhmaq的4點鐘方向,係我餓到就訓低時候既一間救命店
店內有d似細間subway,只有8個座位,食物櫃放左一大埋未見過既食材

只能大約知道有麥樂雞、內臟同茄汁炒意粉/香腸
花心既我,當然係想每樣試少少啦,所以就同個老闆講「may I try a bit of this one? no bread”
老闆點頭,但轉個頭就”畢”左一堆類似肝臟既物體放係火爐上滋滋聲唔知做乜睇唔到
5分鐘後,一條10寸長既大法包出現係我眼前……………果然係聽唔明呢………



有別於平時食開既長棍型三文治,呢個包係無烘過的,常溫、淋身,不像歐洲式既乾身,有d柔軟且空氣感不錯
至於餡料,woo係辣炒羊肝呀!
老闆將羊肝外層煎脆,加埋紅椒粉同洋蔥快炒,夾入麵包內熱辣辣,又香又滑,加埋生菜絲的爽脆,正!
食完飽到死,都只係50,000 rial,約$13-15,抵!
(另外仲試左樣野,但同本文不合,係facebook #環球美食吐糟區 再講)


3. 波斯餐廳Termeh & Toranj
獵奇左一輪,食返d正路d啦~
係Tripadvisor上Yazd第一位的餐廳叫Termeh & Toranj,位於迷宮般的古城內,無GPS的話要搵入口都算有d難度
餐廳格局一如Kashan果間Abbasian Historical House一樣係波斯古宅type (參見: 伊朗獨行2nd – 卡尚d大屋有無靚成咁ar?),唔知係咪維修,天井上蓋左一大塊藍布,陽光透下令成間餐廳變成了藍色



咁既格局,賣既當然係伊朗菜啦~仲會有少量迎合西方旅客口味的食物出現,例如炸薯條
我本身係非常不喜歡呢種行為的,不過,唔知點解,又好想食薯條wor~就試下伊朗風格會係點啦~
Main course要左個燴羊腿,飲品方面第一次見到有啤酒呀!!!!!!老虎都要返罐啦!!!
眾所周知伊朗係完全禁酒的,所以端上來的係alcohol free亦係意料中事
味道又同德國既無酒精啤酒唔同wor,基本上就係一罐有汽麥茶
點都好啦~熱屎辣辣,有罐冰凍飲品止下酒癮係好事~~



至於燴羊腿,size係類似北京清真食店門口果d烤羊腿
肉同脂肪都唔多,但係點解可以咁好味ga!!!!!!!!!!!
佢應該係將羊腿放入蔬菜羊肉高湯內慢火長時間浸熟,羊味超濃超濃! 肉質仲柔軟到用叉輕按即入,放進口內一攪即散!
仲比埋一碗高湯你做蘸汁,用嚟沾炸薯條都好好食!
雖然fries只屬正常水平,但羊腿絕對可以打入我人生食過既羊肉中頭5位!
埋單大約$120港紙,係呢度嚟講唔算平,但毫無疑問係伊朗食過最好食既餐廳!!!!!!
嚟Yazd一定要試,一定要試!



Yazd食物既介紹就暫到呢度~住左短短兩日一夜,食左3餐差不多啦~
不過下一篇仲想補充多少少Termeh & Toranj呢間餐廳發生過的小事
同食物無關,所以要開獨立一篇講的~
好啦,下回繼續~



====================

Email : funggarcia@gmail.com

Instagram : https://www.instagram.com/fung_garcia/

My Facebook Page : www.facebook.com/Garcia.in.Germany

ging

另外文章同時刊於UBlogDC Fever TravelBlogspot遊牧爆谷

請各位繼續多多支持呀!!!!!!!!!!!!!!

沒有留言:

張貼留言