2014年7月19日 星期六

德國working holiday最終章 : 313日的完美落幕

不知不覺,呢個Blog已經寫左兩年有多
講真我並唔係特別鐘意寫野,多心又懶惰既我,竟然可以係零報酬下每星期(or月)keep住幾千字幾千字咁嘔出嚟,都算係一件奇事
呢一篇既文字會比以往既多好多,更可能比平時悶,更有大量回憶及主觀性自吹自擂,但每一句都係我發自真心的感受,真係好希望各位讀者能一字一字的看下去,同大家完完整整咁分享我呢個近一年的故事。
特別如果你係由第一章睇到而家既,今篇應該會有Hunter同One Piece大結局「唔使個孫燒比我睇呀」既感覺。希望看完之後,你都會有與我同樣的感觸

呢個,係最後一章了

=========================

2014年7月18日,歐洲時間GMT+2 晚上22:05,我到達芬蘭赫爾辛基國際機場等待轉機
上一次到來剛好是2月,working holiday過了一半的時候,加上我來回香港都要係度轉機,Helsinki係我腦內早就定有“中途站”的感覺
我仲記得第一腳踏上歐洲的土地就是這個機場,當時我第一時間係急不及待搵WiFi上網同老友傾電話-----「Edith!!!!!!!我開始淆底ar!!!!!」
對比一年前後既心態,同一個地方,haha諗起果陣既戰戰兢兢都覺得好笑~
老實講ar,雖然而家我的確有d唔捨得德國,唔捨得歐洲,但又無真係好強既離愁別緒,甚至可以話係輕鬆而愉快的,至少我岩岩係飛機上就好開心咁飲橙汁睇Hunter,落機後見到可愛既姆明+史力奇仲係咁影相~
可能旅行得實在太耐,真係覺得攰啦............仲有約10小時就會返到闊別近一年既屋企,期待回家係多過不捨歐洲的
北歐夏季深夜仍未落下的夕陽,正好為我送行



穿過已關門的機場商店,來到轉機閘口 ------ 一個空盪盪的櫃位,電子屏幕上印著「Hong Kong 23:40」



影完呢張相,我無意識地呆左咁望住屏幕,突然一種好古怪既感覺湧上心頭,喉頭一動,右手掩著口部,眼前「香港」二字剎那變得模糊,淚水竟然禁不住洶湧出來
點解會咁ga?.........我明明無事ga?.........一分鐘前我仲好開心咁影緊姆明,點解我只係見到香港呢個牌就完全180度轉變,完全control唔到?
唔得..........我唔可以咁核突........一個30歲大男人負著背包係機場喊?痴線ga.............
這時,大腦思想再不受我的指揮,不停閃過這一年旅行時的種種畫面
我再也控制不住,坐在椅子上,右手蓋著臉閉聲大哭
我開始明白............呢個唔係傷心、難捨難離之下的情緒崩潰,而是千辛萬苦完成自己覺得重要的事時所流出的感動之淚
就好似運動員衝線,甚至登山者終上到珠峰頂一樣
由2011年北京讀書回港後已一心想到歐洲生活一次,之後慢慢儲錢,到兩年前正式開始策劃申請,資料搜集,又細想點同家人交代,決定放棄高薪穩定的工作, 離開愛我的人和我愛的人.........到正式出發後,試過成個月搵唔到屋住,完全有出無入的失業狀態,仲有旅途中經歷過幾多困難、挫折,克服了種種寂寞、失意........經過左好漫長,卻又轉瞬即逝的時光,呢一刻.......呢一刻我終於到達終點啦!!!!!我完成啦!!!!!!!
我估唔到我真係可以完成呢個德國working holiday!一個人無穿無爛無大傷亡咁背包環遊了整個歐洲!
我去過好多人一世都未去過既地方,見過好多人一世都未見過既美景,更經歷過更多人終其一生都未經歷過既精彩事!
這時,腦內響起在倫敦時看Book of Mormon的一句名歌詞 :「Something incredible, I’ll do something incredible」,我好似......真係did something incredible........儘管呢句歌詞非常不祥,因為主角Kevin最終完成既「something incredible」係比軍閥塞左本摩門經入後蘿友.......
有人話,人生總要做一件你死前值得回味既事。而不知不覺間,我已經完成左生命中其中一件最美好,並永遠不會忘記的大事
古語有云「朝聞道,夕死可矣」.........啋你個大吉利是!我仲要返屋企ga!


(呢套笑到肚痛既歌舞劇,係我係倫敦最精彩既事,第八十四章)

我就咁坐係度,笑住爆喊左足足5分鐘有多,而期間係一個香港人都無問過我發生咩事的......
香港人?無錯,班機飛香港ga ma,候機室已聚集左唔少準備回家的一家大細
日常係德國,只要一聽到有廣東話就會即刻擰頭過去八卦下甚至撩人傾偈,霎時間有咁多廣東話surround sound真係非常唔習慣,呢個情況係我返香港一個月後係仍然持續的.......
雖然一個男人喊係唔應該打擾佢,但或多或少都覺得香港人遠比歐洲人冷漠.......又或者如果我係低胸美女既,一早有群人撲埋嚟噓寒問暖了.......
我成段旅程都未喊過,even最失意最唔開心時都無,反而而家回程就成個豬頭咁!唉真失禮..........



開始冷靜d平伏過後,終於做返個香港人應該做既野-------無錯就就囉個電話出嚟上網啦
唔好意思囉,呢樣野真係係歐洲咁耐都戒唔甩.......睇下慕尼黑機場時發表既文章咩環境先
打開Facebook page manager,睇到一個個好友同網友一句句的Safe trip同welcome back,我d眼淚又唔爭氣咁流出嚟la...........

事實上,我從未想過呢個blog會引起咁大回響
一年發生既事太多太多,我當初只係諗住身痕搵個地方記錄下以免自己將來失憶。既然比自己睇ge,寫作方式到風格當然會以我日常生活既說話模式為標準 ----- 完全無拘無束! 從無諗過要取悅任何人,又或香港式口語寫作會有咩問題,我理都無理過,正如死黨所講「就好似你係旁邊同我傾緊偈咁!」無錯,我本身講野都係咁瘋瘋癲癲,所以呢個blog先會叫《瘋人鋒語》。
記得到埗德國的第三晚,我坐在喧鬧的Euro Youth Hostel酒吧中,像個毒男般孤獨寫完 第五章 ,和身旁的外國家庭閒聊數句後便回房蒙頭大睡,反正心情極度低落中
第朝一早醒來打開blog一看...............我係咪眼花?瀏覽人數2000千幾人???
whatsapp同facebook message轟轟轟轟轟不停轟炸一大堆!
打開阿路既msg : 「位已上」.........=_="...............乜料呀............
「你唔知咩?你果幾篇野上左Utravel facebook,比人瘋狂share緊wor」
唔係掛..............再睇埋其他老友既揶揄msg「紅左wor死仔」「幫我簽名啦」「文藝青年易溝女」等等先知唔係發緊夢!
我而家再講返,唔係想話呢個blog點點點受歡迎(事實係仍然收視慘淡),而係自果日之後,我突多左好多我原本唔相識既網友,佢地會同我傾偈、會同我講加油,我遇到困難時會有人出口相助...........感覺好似正式同返香港接軌,有一大班懷住相同理想理念既人,正在係半個地球外默默支持我,為我呢個不相識不相干既人打氣............
因為呢一班網友,我既圈子更進一步地廣闊,亦給我動力繼續去把我既所見所聞盡力記錄落嚟! 所有美麗既風景,荒唐既逸事,都想同大家一齊分享
無意間,呢個blog竟然成為左我歐洲生活上的支柱。當不用返工、夜晚太悶或百無聊賴時,甚至望住個美景唔想走果陣,就囉起部機篤篤篤篤篤
所以,我其實真係好感激睇緊呢個blog既你地,係你地令我的working holiday變得更有意義
多謝你地


(係酒吧寫緊chapter 5)

(之後同我吹水果個外國家庭)

(就係呢張床上醒過來......見到個blog時嚇左一跳)

(日常的寫blog生活,就係咁~)

(有網友旅行路過柏林時特登嚟探我~可惜當時我病到半條人命......Nice to meet you Ice!)

靜靜告訴大家,其實開頭我係想去愛爾蘭的,貪佢講英文又有山坡草原好似幾開心,後來聽fd講果處真係除左山坡草原外就乜都無悶到喊!又諗反正英文同德文我都係唔識ga啦,德國有豬手有香腸好似仲開心d
事實證明我呢個決定真係無錯!
如果去既唔係德國,我諗我唔會咁開心咁順利 ; 如果去既唔係德國,我諗我唔會去得到咁多地方,有咁多有古古怪怪既經歷
起初,係我出發之前,甚至到慕尼黑生活之後,我都從來無諗過自己會去旅行去到咁瘋狂!
初時只想去東歐望下(連東歐有乜國家都未知),同埋冬天要去睇北極光,僅此而已。
但由2013年10月2日斯洛伐克之行開始( 第十四章 ),我便對背包旅行完全著了魔,更為探索未知的風光文化而感到無比的興奮!
不知不覺間,我出發的目的由「拓寬眼光、見識世界」,更明確的訂為要去更多更多不同地方!體驗更多更多不同的生活!
不是旅行團走馬看花!我要用自己雙腳認真踏過,深度遊遍歐洲起碼20個國家!
最終這個旅程,我行遍了歐洲東南西北,由冰雪覆蓋的北極地,到炎熱蔚藍的地中海 ; 從華麗童話般的東歐,至先進文明的西歐,還有中歐德國各城鎮及阿爾卑斯山脈等等等等......
最後總結算 : 我到過29個國家地區,共103個城市,做過5種不同工作,拍下的照片整理後超過一萬三千張,到過的地區溫度最高攝氏40℃,最低零下36℃,被美女搭訕既次數係零,中伏無限咁多次,被誤認係小朋友未夠枰N咁多鑊,認識既朋友點都數唔哂,飲過既啤酒夠fill十個浴缸,歐洲初吻係克羅地亞比個飲醉既西班牙女仔強尼........
我睇過北極光,到過千年古城,游過地中海水,全裸混過浴,盪失過路,開心過,失意過,瘋癲過,白痴過,更差d死過......做過哂一切一切係香港永遠都無機會做既事
總之就係兩個字 : 精彩。我完全無浪費過呢一個工作假期


(從斯洛伐克首都Bratislava落船一刻,「背包客」三字正式寫進我的生命裡)

(我幾乎凍死於芬蘭赫爾辛基的Suomenlinna, 第五十八章 )

(Dingli Cliffs既熱,我每次睇返相都feel到,第130章)

(唯一一張相,有幸與極光合照,旅程中其中一個最開心既moment, 第五十三章 )

(馬爾他的地中海水真係人間天堂, 第131章 )

(裸浸混浴之地,德國Baden Baden的Friedrichsbad, 第三十九章 )

坐係機場內,想起出發之前,我係第一章和facebook寫下了這麼一段話 :
「無野可以阻礙我今次既旅程,無論如何,呢一刻既我,對於呢個決定,一d都唔會後悔」
一年後既今日,再睇返呢句說話,我會話 :「如果可以從頭再揀,一千次、一萬次,我都會選擇去呢個德國working holiday!永遠都唔會後悔!」
呢個工作假期,究竟對我自身有何影響,學到甚麼,成長了甚麼,恐怕言之尚早,羅馬亦非一天建造,但我知道,種種經歷,都是一份無可取代的珍貴寶藏
在這自我沉思之中,announcement響起,已經是晚上23:40
正式離開歐洲這片土地了,流浪生活要完結啦
在10小時的航程裡,我睡得非常安穩..................



睜開眼,醒過來,想一想,我剛剛並沒造夢吧?對,根本就不需要
穿過雲層與微灰的天空......2014年7月19日下午14:30分,我再次踏上香港的土地
拿過重甸甸的背包與行李箱,不知羞恥地搵人幫我影張扮型相後,我閉一閉眼,微微一笑,緩緩步出閘口.........
終於,313日德國working holiday正式完美落幕
我知道,我的家人正在外面等我呢



==============================

我,鋒Garcia的德國working holiday故事到此正式完結。
呢個旅程最終寫左136章,計埋6篇外傳,總共係142篇文章,粗略數數手指都過15萬字,點解我會咁好恆心ga??呢個數量可唔可以當博士論文交左佢比個PhD嚟ar??唔係要Pizza呀!!!!!!!!!
不過我都知自己長氣ga la.....去一年寫兩年.........廢話多過乜又長又tum.........不過希望呢個blog令各位睇得開心,又會對嚟緊想去德國工作假期既人有d幫助啦!
最後我想再一次多謝咁多位朋友、網友、讀者以及Utravel的各位員工
而如果無你地既話,《瘋人鋒語 - 30前80後的德國工作假期》唔會撑得到今時今日



至於呢個Blog今後何去何從呢?我只能夠話係壞消息.........
因為我仲未想close佢~
Wei~~~~~~唔好扔雞蛋住!!!!!!!!!!
始終用開有感情,唔想咁快關門大吉住ar~~~~~
嚟緊我或者會小休一兩星期,之後會不定時寫返一d旅程以外德國及歐洲既趣聞瑣事,又或旅遊感想。而我歐洲返嚟後都去過轉日本同台灣背包旅行,我覺得都同平常旅客有d不同值得寫下。
無錯我係死唔斷氣ar~~~~唔比呀~~~~~~
只係個Blog名睇嚟都要改改.......我已經唔再係30前啦...........T_T
完結,是另一個開始
Facebook Page : www.facebook.com/Garcia.in.Germany 仍然會持續upload旅途中未能成文既靚相和無聊閒事
希望各位仍然繼續支持小弟呀!!!!!

沒有留言:

張貼留言