測試1

2013年9月27日星期五

德國working holiday第十三章 : 略為失望的音樂之都

唔之係咪布拉格太精彩,去到維也納stay左3日,都唔覺得有d咩咁令人amazing
首先呢個城市並唔係想像中咁周街音樂同咁浪漫,係有音樂人街頭表演,但就我所見真係唔算多
其次市中心Stephenplatz係一個商業味甚濃既步行街,即係話有好多普通話係我耳邊響起
其實除左係國內或同自己d北京朋友傾偈外我真係唔係好想聽到普通話呢!
 
 
而呢3日,大致上較令人難忘既就係 --------
 
一,終於食左塊正宗既Schnitzel!
細個時屋企樓下既馬來式西餐廳有道菜叫“維也納牛仔“(其實我到而家都唔明點解要係公共屋村內開西餐廳.......)
一大塊炸牛仔肉,下鋪滿薯蓉,廚師心情靚時仲會加隻太陽蛋..........有齊“炸“,“肉“,“薯“,“蛋“呢四大小朋友美食元素,邊有得輸??當時真覺得係人間極品嚟ga!但到佢執笠後就無再係香港任何餐廳食過啦
到幾年前,大鄉里既我先知當年食既係香港改版既Veal Schnitzel,於是係尖沙咀Kxng Xuwig食過一次,兩舊幾水食左陣風
今日嚟到維也納一間過百年既餐廳,終於有機會一試正宗既schnitzel啦!!!!!!!
即叫即炸,上菜時見塊扒大過隻碟大過塊面,只係呢個視覺效果都殺哂!咬落夠薄,夠脆,有肉味又唔會太乾,的確係唔錯!果d x大大唔該行開!(但呢碟野既價錢都係香港x大大既5倍幾........一分錢一分貨.....)
只不過,平心而論,同等價錢既香港日式炸豬扒真係多肉汁同嫩滑好多呢....
 
 
二,意想不到的設計博物館!
係芸芸博物館之中我地只係選擇去設計博物館,一來維也納d博物館收費太貴,下下扮學生都唔掂,二來設計呢家野大家都有興趣
入到去一望,已經比張三角型既綠色超舒服沙發吸引,行多5分鐘,好,行完走得
乜料呀!!!!!!!!!!!!!呢個原來係“設計歷史博物館“呀!!!!!!!!全部用奧地利文加英文講奧地利具代表性既建築,而講解既仲要只有黑白相,文字同圖則,連模型都無個
sorry ar雖然我既英文正進步中,但一次過要睇咁多雞腸真係好傷神......
還是外面廣場有陽光有wifi既藍色膠床吸引得多
 
 
 
三,音樂之都聽音樂
話哂都係音樂之都,嚟到當然要扮下有taste聽下音樂會啦
四人既大中小提琴演奏會,票價由$50至$500都有,$500坐下層最前排十足私人演奏會,$50坐上層最後排唔好話樣連個台都睇唔到
但其實買咩飛係無關係既!!
因為只要演奏預備開始,票務員就會關門離開並且唔比late come,即係話只要有人遲到or無full house有空位剩,你就可以把握時間即刻由50蚊位升級做300蚊位!
唔係我地先,而係全場外國人當地人都係咁做,無錯就算係維也納呢方面都係同國內一樣既,我地只有慨嘆點解要買$170飛呢
 
 
 
而更唔開心既係intermission時過隔離音樂廳望望
原本已經覺本身個hall好靚,但隔離果個.......................
 
即刻好想聽orchestral ar........
返去睇交響情人夢頂當啦!
 
 
仲有想講講兩件小事 :
A係維也納最後一晚dinner係一間叫VAPIANO既連鎖餐廳食飯覺得又平又正(其實係咪又係我大鄉里ja??)
係呢個物價比慕尼黑仲貴既地區竟然最平$65有個飽到滯又好味既意粉!又無service charge呢~
佢好似係世界性的,柏林同台北都有,下次去試下先!
 
 
B係係街頭見到一個日本人囉住呢隻鑊一樣既樂器表演
聲音尖而清脆,會有梵音,有無網友知係咩嚟?
 
 
至此呢個唔開心既與唔夾人自駕遊正式結束
第日開始回復自由,獨自向未知的斯洛伐克出發
 

IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia/






Email : funggarcia@gmail.com


My Facebook Page : www.facebook.com/Garcia.in.Germany


Medium : https://medium.com/@funggarcia





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!




鋒加西亞 - 德國工作假期後的世界流浪




2013年9月26日星期四

德國working holiday第十二章 : 充滿戀人和廣場的布拉格



由於高速公路改道與GPS廢柴既關係,到夜晚九點半先到apartment
到達布拉格第一個印象係-----d野食好大份呀!!!!!
三大塊條骨手臂咁長既炭火即燒pork ribs !只係港幣約$80!!仲要又香又淋有肉味!好過Rxby Tuxxday十萬倍!







第二朝一早由山上開始行落布拉格市中心

 

無錯!係靚到好似童話一樣

點童話法? 例如史力加裡面公主返去既城市,就係呢個

又例如史力加2裡面公主返去住既城市,就係呢個

或例如史力加3裡面公主返去訓既城市,都係呢個(其實有無呢個情節ga?我仲未睇)

總之你自幼睇故事書幻想中的童話城堡都市就係咁啦!

每一步每一眼看既都係極致既歐洲城市美景!雖然當時心情唔靚,但仍然覺得係無嚟錯!





之後嚟到唔知唱緊乜既布拉格廣場

雖有強烈既中世紀風格,但老實講外表上同其他歐洲廣場真係分別唔大

要話唔同既,係街頭表演藝人特別多,由危險類既訓玻璃,動作類既二人瑜珈,音樂類既吹喪曲以至傳教類既Amani都應有盡有

我真係企左係度諗----如果我要係度賣藝可以賣乜?除左飛佛外,睇怕都係少林功夫加唱歌跳舞啦



夜晚係河邊既船上溝女餐廳食飯

原本怕佢貴,點知都係$80左右一個pasta,不過份量係完全食唔飽果隻。

點算?一,叫多碟3舊水落樓(同行者既選擇)

二,去尋晚間餐廳encore(my choice, 點知已收爐)

三,食環境飽





飯後行過橋下有露天mini concert~ 台上老者賣力地唱緊捷克情歌 

第一個反應其實係想笑,因為捷克話對我地嚟講d音調其實幾奇怪,但睇到台下情侣們均甜蜜地相擁相吻,我又有何理由去笑呢

其實日文韓文同者卵大家咪又係咁聽,習慣左就會發掘到另一種味道

可嘆同行者說完不明此理,如果有人笑你講廣東話你又有咩感受ar

唉,道不同也





===================================================================

部tablet張sd card尋日無啦啦完全死亡所有相無哂,好彩仲有backup,但又要整理一大輪,下篇Blog又要遲幾日la.......

====================================


IG果邊間中會有d和Blog及fb page不一樣的相片和story,大家有興趣既去follow下支持下啦~

(其實係人數實在太少.........支持下啦........T_T)

Instagram : https://www.instagram.com/fung_garcia/






Email : funggarcia@gmail.com


My Facebook Page : www.facebook.com/Garcia.in.Germany


Medium : https://medium.com/@funggarcia





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!





鋒加西亞 - 德國工作假期後的世界流浪




2013年9月25日星期三

德國working holiday第十一章 : 柏林速覽


現正身處維也納Schwedenplatz既M記

嚟到歐洲既第一個long trip嚟到一半,終於有解脫自由既感覺!

同個自私又唔夾既厹一齊旅行真係好辛苦,唔係比面我相識廿年既小學同學真係一早走左

唔再勞氣,岩岩7日一班人去左柏林,再自駕東往捷克- 布拉格,再到奧地利 - 維也納,之後我會自己一個到東歐遊歷再玩返去德國西南部幾個小城市

在此之前,先寫下柏林,布拉格同維也納既所見所聞啦



=================================================================



其實我覺得自己無乜資格寫柏林



一來住係柏林去過柏林既香港人大有人在,二來呢個城市比我一種好有深度既感覺,就好似一位蒼老卻帶活動既智者,我唔覺得短短兩日兩夜我可對佢完全了解

如果真係要好膚淺咁講,柏林係一個文化藝術氣息好重既地方

其博物館藝術館之多,認真睇既果個3 days pass係真係唔夠ga

大街小巷中,到處都有街頭表演,絢麗塗鴉

對於藝術我所知有限,只能馳想天外, 究竟係呢d作品背後,隱藏住幾多將來既藝術大師,幾多未露稜角既礦世奇才?而佢地又有過甚麼故事才創作出此傑作?呢個就係我既欣賞方式(其實都幾汗顏....我係藝術家既兒子........)

另一樣就係有好多有個性既店舖

呢度既店不論食肆定零售,大多都會有一些個人特色,例如誇張既室內設計,別樹一格既衣履髮飾,總之點都會有d與別不同,只係睇店舖都會覺玩味十足

仲有就係柏林物價比慕尼黑平太多啦!

同樣大細既街邊hot dog,慕尼黑最平係$28,柏林卻只需$13.5!可以平一半有多ar!見到時真係好難唔感動!!



其實柏林呢度應該仲有好多好多野等住我去發掘

我將來一定會再返嚟呢度既,到我在此有一番體會後,再寫一篇住後感吧






====================================


IG果邊間中會有d和Blog及fb page不一樣的相片和story,大家有興趣既去follow下支持下啦~

(其實係人數實在太少.........支持下啦........T_T)

Instagram : https://www.instagram.com/fung_garcia/






Email : funggarcia@gmail.com


My Facebook Page : www.facebook.com/Garcia.in.Germany


Medium : https://medium.com/@funggarcia





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!






鋒加西亞 - 德國工作假期後的世界流浪




德國working holiday第十章 : 人在異鄉煮飯仔

人在異鄉最掛住屋企碗飯,相信無咩人會反對,但山高白飯遠,中式餐館又貴又難食,自己整似乎係又平又正既最佳頂當方法
之前都提過我住既hostel完全無廚房,經過個幾禮拜,我終於有機會在一次慕尼黑香港人的中秋小聚會中一顯身手啦!
一直以來我都對自己既廚藝相當自負,閒閒地十零廿個公仔麵真係無難度
但嚟到呢度先知道真係天外有天人外有人!
呢度既香港人(男仔限定)係會識由零開始整冰皮月餅ga!!連整cheese cake都可以唔睇書攪掂!
更恐怖既係佢地會自己買麵粉嚟搓麵團整麵條食呀!!!!!!!!
「平ar嗎,一包麵粉零點幾€,食成個禮拜食到嘔都得。」
我真係諗如果有地方既佢地自己種米tim ar !
不過幸好果晚我都唔算失禮,係各強手環伺下,算勉強過關啦

(焗辣椒雞及椰菜花,算係咁啦)

2013年9月24日星期二

德國working holiday第九章 : 10個去慕尼黑啤酒節的理由

基於工作性質問題,有d國家既重要節日根本一係退休一係劈炮先有緣參與
既然身在慕尼黑,無理由唔去聞名世界既Oktoberfest Munich慕尼黑啤酒節ga!
但啤酒節老蘭有,馬會有,馬可菠蘿都有!點解要飛十幾個鐘去慕尼黑先!??
而家就根據我去左3日既親身經歷話你知!要去慕尼黑啤酒節既十大理由---------
1. 有張跳極都唔斷既長凳,可以見識下四個麻甩佬跳彈床既震撼
2. 有荷里活國際級明星Samuel L. Jackson及Paris Hilton揾你坐底飲酒,但呢個場認女不認男,堂堂復仇者聯盟阿頭比人igrone兼趕走埋

2013年9月15日星期日

德國working holiday第八章 : 麵包與文字

係時候講下食啦!
為左悭錢,我諗大部份去working holiday既人都試過捱麵包
我就狼死d,午晚餐有8成係麵包,其餘係唔食
然而德國果然係麵包強國,我食得咁密都可以無一餐重覆!
由齋包甜包酸包咸包硬包軟包酥皮包,到夾肉夾腸夾火腿夾芝士夾魚柳,講得出都有(其實我懷疑係我大鄉里,歐洲應該都係咁......)
價錢由港幣$4至$30不等
其實只要唔大食,每種試云哂我諗都要個零月
但德國最出名果種黑色蝴蝶結扭扭包我到而家都未食過,好簡單,因為無興趣!

2013年9月13日星期五

德國working holiday第七章 : 食朱古力係會肥ga

講左咁多篇生活上既難關同心情,係時候寫下見聞啦~
呢幾日共去左BMW博物館,奧運主場館,瑪麗茵廣場左近各大大少少教堂............
每一個景點都美不勝收或令我目瞪口呆!
但仔細留意既話.................無錯!樣樣都係旅遊書既重點推介!
所以我今次要介紹既,係旅遊書不常見,位於瑪麗茵廣場食品市集旁一個叫Schrannenhalle的食品市場地下既Milka朱古力專門店!
唔知咩嚟?見到呢隻紫色乳牛應該有印象la掛!



2013年9月12日星期四

德國working holiday第六章 : 懶揾屋ar嗱!天橋底等緊你!

呢篇開始之前首先要多謝U travel既員工同各位網友對小弟既支持與聲援!
全靠你們我先覺得無咁孤單,唔係一個人係異鄉,在此謹送上無限的感謝!

===================================================================

第四日
今日慕尼黑落雨,終於捨得坐定定係hostel面對一個切身問題-------就係啤酒節既住宿呀!!!
話說我揀慕尼黑做首站,就係為左熟習環境預備係啤酒節活著viva! (我地教書既真係一世都無假期參加ga!)
不過我真係估唔到啤酒節時既住宿會貴成咁,幾乎係平時既3倍呀! 我最見到最過份14人床位要120€ ar!

德國working holiday第五章 : 鄉愁?竟然有鄉愁??


嚟到德國第一篇既blog,竟然係寫灰色野!?

今日係嚟到德國既第三日,係ar我平安無事各位朋友係咪好失望呢XD

而家正身處慕尼黑Euro Youth Hostel 既酒吧邊飲酒邊打blog



你睇我就逍遙,其實我不知幾掛住香港T_T

真係唔出過去見下世面都唔知香港咁好!(得啦呢個道理好多人都知啦)

短短幾日已經中左唔知幾多次伏

2013年9月9日星期一

德國working holiday第四章 : 真係出發啦喂!!!

嚟到出發既一刻,反而無尋晚咁緊張
奇怪既係頭先係機場一邊行心裡一邊比林子祥雄偉既聲音佔據,仲好似幻聽咁聽到announcement有Captain Cool ,但我明明一集都無睇過!
話時話,每次坐飛機都會諗起小學時班主任果句 : 「我每次坐飛機都驚會落唔到機」,可想而知教師呢行幾影響人一世呀!
好啦,嚟緊有十幾個鐘比我雲外看新生趣,希望平平安安,一路逆風啦!

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia/





Email : funggarcia@gmail.com





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!



德國working holiday第三章 : 出發前夜的心情

就算之前講得幾型幾灑脫都好,到出發前一晚始終都會有離愁別緒
特別諗起張晚晚訓既床要擺一年係度封塵就已經覺得好對佢唔住啦
其實由尋日開始已經對所有平時唔為意既一點一滴覺得特別唔同,每一刻都諗「仲有xx就飛啦,唔知幾時再見,唔知仲有無命.......」真係咩大吉利是杞人憂天都諗齊哂
甚至有腸胃抽搐、食慾不振,明顯係心理影響生理
都幾奇怪,明明係好想去德國,又成日一個人去旅行,又試過一丁友無人無物係北京讀書幾個月,仲會有唔捨得ge??
其實我都唔知自己應該擔心d乜,只不過連平時豪邁既阿爸阿哥都特意講多幾句叮囑,就知其實佢地有幾緊張,更加唔使講凌晨3點都仲叫緊我記得囉乜囉乜既娘親la..............
人新路不熟crossover言語不通,果然係會令擔心指數直線上升
要來的始終要來,學唔知邊個話齋,要享受改變呀~



講左咁多,其實只係想表達一樣野 -------------- 我而家好sad arrrrrrrrrrrrrrrrrrrrrrrrrrrrrrrrrr................../_\

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia/





Email : funggarcia@gmail.com





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!



2013年9月7日星期六

德國working holiday第二章 : 未見官先打三十

出發前好多朋友會問我會帶幾多銀兩出征,但其實我想講點解你唔問下我出發前使左幾多T_T......
好多野平時係香港真係唔覺ga!
例如平時屋企用開部老爺notebook,點會諗到佢石頭咁重唔方便囉去ga je!
又例如部衰人電話,係香港周街都叉得電,話之佢3G狀態1分鐘無1% + 30%以下自動熄機ar(係我部機既真實情況)
去到德國我真係唔想影兩張相再google map兩下就跪低,終於又係要買過部新
仲有其他相機、運動長褲、國際教師証(雖然我唔知有咩用)、USB分插插蘇等等等等
而夜晚會有連續兩星期不間斷既farewell parties........(當然係好開心好感動ge~)
係失業狀態下,租稅從何出???
於是旅程儲備未出發已經用左一大舊
um.......都係一個從新審視自己既方法嚟ge
但奉勸大家,計劃出發時,d錢真係唔好預得咁盡ar.........sad

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia/





Email : funggarcia@gmail.com





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!