測試1

2013年12月9日星期一

德國working holiday第三十五章 : 德國聖誕市集大解構!

又一篇「當年無咩人睇但又幾有用」的舊文回顧,執左少少字眼and相令佢靚仔d,希望幫到/引誘到大家今個11/12月去德國玩啦~

原文《德國working holiday第三十五章 : 聖誕市集,唔係唔去呀!?》https://blog.ulifestyle.com.hk/blogger/aeolusgarcia/?p=1035263,寫於2013年平安夜

============================

最能代表德國聖誕節既活動,逛聖誕市集絕對係no.1!
要數對Christmas market有第一印象,應該係year1時平安夜同女朋友去皇后像廣場寫張卡掛係聖誕樹上,果兩間小食店唔知算唔“市集”呢?
之後就數到2012年聖誕正日係大阪新梅田,零度下果杯熱朱古力既滋味我仲記得好清楚!
今年終於嚟到德國玄門正宗既聖誕市集,點都要玩盡佢ge! 於是由之前廿幾年去一個,變成今年一年去廿幾個!
而親身見識過感受過先知道,香港同德國的氣氛比較起嚟真係泥蜢對老鼠班!
氣氛源於五感,身處聖誕市集,眼所見鼻所嗅耳所聞,無一不是每人小時候從童話故事中幻想出來的繽紛聖誕節!
有幸親歷其境,所以特登開個topic記低真正既德國聖誕市集係乜家伙



聖誕市集(德文Weihnachtsmarkt)的開幕日期一般大概由11月24日開始(+-兩日)至12月23日,即係由平安夜前的一個月開始維持一個月
當然有d地方會偷雞早開遲收啦,好正常,頭啖湯+搵錢耐d係人都想啦~
Same as年宵市場唔過年初一,大家千其唔好以為聖誕市集係「聖誕節先開始」,23號晚人地就開始拆野趕你走ga啦!




當年我去市集主要係為左醫肚解決晚餐,但係而家呢個手機食先既年代,當然係打卡同重要d啦!
香港果d市集會有x假期xx Holiday賣廣告話妳知邊度打卡,但係德國,well sorry~ 成個市集每一個concern都係影相曬命位~
無論係壯觀的聖誕燭台Christmas Pyramid,童話般的木屋精品小店,或掛著閃亮星星的街道,全都會令妳目不暇給,當然唔少得「主角」華麗的巨型聖誕樹啦~
如果同另一半嚟既話,如此浪漫氣氛,唔係聖誕樹下咀返15分鐘既返屋企跪玻璃都有份







如果同我一樣係單身來到的話,聖誕市集就不外乎幾樣野 ----- 食!買!玩! 無錯同阿媽係女人既道理係一樣ge!
講飲食點可以唔講最受歡迎既Gluhwein!
呢種加入香料,水果既熱紅酒,我曾經係布拉格同布達佩斯飲過
第一次飲,怪怪地 ; 第二次飲,ok wor ; 第三次飲,wa正呀喂!!
初入口會覺酒味極濃難以下嚥,但飲落就有清新既酸甜味,然後香料味係口中爆開,慢慢就會feel到全身暖哂~
有一種唔能夠解釋既感覺,總之一聞到Gluhwein既香氣 ----- 係聖誕節啦!
(因為太鐘意Gluhwein,幾年後我寫左篇《喚起聖誕的葡萄酒》,大家可參考~)
唔飲酒?無問題!仲有種小朋友version,較甜同無酒味~不過我就覺有酒精好飲好多啦!
另外每個market都有佢地既獨有Gluhwein杯~只係欣賞同收藏都過癮!
而除左Gluhwein,某d market仲有Eierpunsch(蛋酒,未飲過~)同埋Lumumba(熱朱古力加杏仁酒加cream,推薦~)
啤酒呢?sorry呢個幾乎係德國唯一啤酒要行開既場合呢






咀嚼方面,幾乎所有既德國小食都可以係度搵到,即係話又係香腸既天下啦!
根據地區唔同賣既腸仔包都有分別,例如柏林及慕尼黑以白腸為主,弗萊堡有辣椒孖腸,紐倫堡就以著名又細又短既香草式紐倫堡腸一次夾3條比你~
價錢一般係2.5至3.5歐,有d標榜成尺長既腸仔包賣約$50,但我覺只係個包大左肉餡份量係一樣的,所以貪過癮先試啦~
仲有我發現呢度間間鋪只要你係賣腸就會客似雲來! 一個market十幾間腸店可以全部排哂隊ge!
香港d年宵?一般都係一間勁旺其他拍烏蠅或者全部一齊拍烏蠅ga la
Ee咁好賺! 我都可以試下賣wor! 我自己有一條.................





除左腸仔Bratwurst,其他常見既仲有豬扒包(好味),炒蘑菇+蒜蓉忌廉(勁好味),炸薯餅(聽聞甜的),燒魚夾包(睇落好乾加好貴),酸菜煮鬼佬臘腸(一試無妨),pizza,Langos(方型油炸鬼+糖/蘋果醬/芝士&galic sauce),pancake夾榛子朱古力醬(一塊賣3,40蚊ga!),窩夫,朱古力生果,焦糖nuts等等等等!
不過以上只係每個market都必有既food,根據不同地方會有埋當地流行食物tim
特別德勒斯登Dresden有最多不同種類,係其他地方無見過既食物! 只係個焗蘋果已經一絕!
好食之徒不容錯過!












聖誕市集幾乎將整個德國既民間工藝濃縮放入嚟!
別致既聖誕裝飾,擺設,木偶,胡桃夾子,玻璃工藝,以至頸巾手袋手襪,蠟燭香薰,甚至我唔明點解連地拖掃把都有!
而我最鐘意既,都係一個個手造,每個Christmas market都有一大座既小型木製蠟燭座
每一個都係木匠精心鑄造,只係睇到棵木屑造成既聖誕樹都會概嘆“呢d木匠咩人嚟ga.....”
有閒錢既絕對值得買一個!
但我無...................









玩方面,比小朋友玩既Merry-go-round同小型中型摩天輪四處都有
但令我疑惑既係點解Merry-go-round會將比卡超同唐老鴨放埋一齊
而更得人驚既係摩天輪既速度,我分唔到佢係摩天輪定風火輪,呢個應該唔係環球嘉年華個G Force掛..........
大人既玩樂呢?正經同唔正經既都無~
但對於我呢d開始上年紀既嚟講,只係身處其中,影下燈飾佈置,摸下酒杯底同朋友傾下偈,感受四周的熱鬧歡樂,不是已很足夠了吧





最後附上去過既大型聖誕市集特色簡介作參考
等各位網友下年想去時,唔使花多眼亂唔知去邊個好啦~

柏林Berlin -----
Postdamplatz : 11月中已開幕,有滑雪斜坡,但成個market勁細,勁貴,無咩特別
Charlottenburg : 柏林最有名,多飲品,仲有仙女裝美人周圍走





Spandau : 差不多整個地區的日常街道都變成聖誕市集,個人認為是柏林最好氣氛的,但位置偏遠



Alexanderplatz及電視塔下 : 柏林其中一個最大最多野買的市集,有大型溜冰場同風火輪,靚燈飾,仲有德勒斯登先食到既芝士煙肉包


(雖然個包成4歐幾貴,但真心好味~)



德勒斯登Dresden -----
全德國最古老市集,最多獨特事物,最多特別食物,最有特式,氣氛最好,必去!
https://garcia-in-germany.blogspot.com/2013/12/working-holiday.html



萊比錫Leipzig -----
過半數都係賣食物,但具特色的並不多。近胡桃夾子的原產地所以甚多店以此為裝飾,不過奇怪地市場內並不易找到售賣的。
https://garcia-in-germany.blogspot.com/2013/12/working-holiday_12.html




紐倫堡Nurnberg -----
號稱德國最有名及最大的聖誕市集,個人覺得有點名過於實。以工藝品為主,亦有特色既紐倫堡腸,並有飲過最好飲既火焰Rum酒Gluhwein!
https://garcia-in-germany.blogspot.com/2013/12/working-holiday_14.html




海德堡Heidelberg -----
分為多個小市集散於舊城區深處,交通較不便。但山上城堡既小市集能觀看日落,邊飲酒邊睇日落,剩係個feel都殺哂!
https://garcia-in-germany.blogspot.com/2013/12/working-holiday_15.html



巴登巴登Baden Baden -----
裝修以兒童聖誕作品為主,食品方面芝士較多,亦有難得一見成舊水一串既串燒.......總之乜都貴
https://garcia-in-germany.blogspot.com/2013/12/working-holiday_17.html



卡爾斯魯厄Karlsruhe -----
地下放好多碎木for吸濕防滑防寒等等,物品價格貴,不過商店既decoration係咁多市集中最靚的! 靚到誇張!



特里堡Triberg -----
未開呀!!!!!!竟然會有25/12先開始既Christmas market!!!但位於山坡上,加埋雪景應該會好靚.......
https://garcia-in-germany.blogspot.com/2013/12/working-holiday_18.html

弗萊堡Freiburg -----
通道窄小人又多,辣椒腸好好味

慕尼黑Munich ------
位於Karlsplatz至Marineplatz一帶 : 市集結構非常鬆散,氣氛不佳,最重要係所有物品都比其他市集貴20-30%!





其實聖誕節不論氣氛如何,最重要的還是和誰一起過
重要的人雖不在身邊,但心的距離卻仍然沒變
各位朋友,網友,還有愛我的人和我愛的人,Merry Christmas!


(德國時最好的朋友,現已是人妻的C小姐及I小姐,追開我blog既老網友應該成日聽到啦~)

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia/





Email : funggarcia@gmail.com





另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!



沒有留言:

發佈留言