測試1

2014年1月30日星期四

德國working holiday第六十一章 : 聖彼得堡下篇,凍到唔係路!

續上回~
第二日因為發燒,訓左13個鐘抖到傍晚好返d先出去行hostel左近的喀山大教堂
此東正教堂係俄羅斯歷史上極具地位,詳細故事可參考維基百科,而就算好似我咁無做功課就入去,仍然會被如藝術館一樣既畫像和建設迷倒
當時似乎正進行宗教儀式,唔知頭唔知路既我竟然仲on居居影相,即刻比人話........小朋友千其唔好學呀!


出門來,天空下起雪來,係我此行遇過最大既風雪
但不知為何,咁樣急凍下個人好似無咁病啦
忍不住再漫步到聖血教堂,欣賞夜裡的雪景下散發的另一種美感
然後再走到聖以撒大教堂,再到冬宮廣場
凄美的暴雪中想起了很多往事,才會寫下第四十七章http://www.utravel.com.hk/member-blog/aeolusgarcia/ADsRYhEtA30MKA/,妳最近還好嗎


其實我一般唔自拍既,但為左show當時有幾大雪,唯有考驗下大家對嘔心既忍耐力啦
可能奇怪我做乜唔戴帽,其實係由於我真係無乜遇到落大雪既經驗,唔記得笠返羽絨頂帽,到記得時帽內已積滿一層厚厚的好滋味!
快d入超市抖抖,行個圈比完錢出門 ---------- ee個頭做乜滴水ge?我唔記得拍走頭頂d雪溶哂呀!!!!!!
咁無計啦!快d行返hostel抹乾佢算,行行下無意中摸一摸個頭,喂d頭髮成塊結左舊大冰呀!!!!!
照一照玻璃,我而家究竟係賭神定花輪同學呀.................................
第三日都係last一日係聖彼得堡,天氣終於轉晴而且無咁凍!
原本想去彼得宮(夏宮),但hostel職員話冬天唔開門,不過兩星期後我見到個墨西哥朋友去左law.........
咁去左位於兔子島上既彼得保羅要塞,是一座舊時為防備瑞典襲擊但從來無做過野既保壘
要塞內無乜野行,反而外面涅瓦河星形的河岸和已結成厚冰岩的河水在夕陽裡露出森嚴之氣象
旅程中介紹太多河湖海的日落,攪到我就嚟真正詞窮唔識點形容啦!總之就係靚爆啦!
要選旅程中既best of sunset,呢個絕對估一席位!



3日既聖彼得堡遊歷就暫到呢度,不過仲有幾樣野想分享下
首先我想講,sorry我呢堆相真係唔靚,因為呢度樣樣景點都太大太遠,以我既攝影技術真係影唔到果種巨大既震撼,所以都係親身嚟一轉好,我覺得呢個係絕對值得一到既美麗城市
其次係治安,完全無想像中危險!
有d人行路係會撞到你,但感覺似係佢地天性粗獷多d,大部份當地人同我溝通時都非常helpful有禮,只不過聽英文對佢地嚟講就好似玩緊超級無敵估歌仔je,溝通唔到怯怯地一句sorry行開都好正常
就算係醉酒佬或路邊打睡夢羅漢拳既數目都係同德國差不多,總之個人覺得一定安全過法國!
同埋聖彼得堡市內的鐵路網絡非常完善,每次入閘坐去邊都只係28盧布,約$6 - $7港幣,對於習慣左歐洲貴到嘔地鐵既我真係有喊既衝動!
(唔係地鐵大霧,係溫差實在太大部相機頂唔住je)

(呢條向下既電梯分分鐘長過海洋公園果條)


仲有呢度既餐廳食物~
一般餐廳都會開到11點甚至1點!呢個對夜飯既我嚟講真係大喜訊!
你可能話都唔係11點咁夜飯掛!!!但聖彼得堡同德國有3個鐘時差,即係8點食飯,好合理ar!
俄羅斯菜同烏克蘭菜系出同源,以多油多肉味濃郁馳名,我食左幾餐,原來都幾岩我口味~~~~
價錢大約係比東歐貴比德國平,港幣$120-150係大豪客,啤酒一杯500ml約$25至$30
更感動既係KFC平過香港!!!!!!!!忍唔住食左餐!歐洲一個餐要$6,70蚊港幣ga.............
左上 : 俄式豬肉餃子
右上 : 俄式魚湯配小魚肉批及伏特加,一淡湯一淡酒,味道夾到不得了!
左下 : 俄式薯仔炒豬肉,加埋生熟洋蔥、蒜及青蔥鐵板上,簡單但非常好味!但半個砵都係油!
右下 : 家鄉雞扒包......真係以雞作包,夾煙肉芝士,肥爆!所以有個菜絲沙律balance下


聖彼得堡認真玩既話,3日應該都未必夠,而且我推介夏天嚟會好d,春暖花開時各個宮殿該會很美吧
當然想一試人肉冰雕滋味既都可以學我冬天嚟,至少我無後悔過,甚至慶幸來呢一趟tim!

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








德國working holiday第六十章 : 聖彼得堡上篇,大到唔對路!

一聽到俄羅斯,腦內即刻會彈幾個詞出嚟 ----- 全能普京、極北苦寒、戰鬥民族、俄羅斯方塊、俄羅斯輪盤............
而好多人都話治安唔太好,所以出發前都有d驚驚地!
雖然話識功夫je,但俄羅斯人連黑熊都徒手砌得底,如果比人打劫時我都只有用猛虎落地勢ga ja
之不過同赫爾辛基咁近,唔去好似好對唔住自己,唯有萬事小心啦!
I

俄羅斯大概係我今次working holiday唯一會到既亞洲國家
但唔好以為好遠,由芬蘭赫爾辛基坐火車到聖彼得堡都只係約4小時,票價約80€ - 90€,但凌晨車卻可以平到約38€!
而因為冬令時間,所以聖彼得堡同芬蘭有兩小時時差,我凌晨5點出發全左4個鐘,到達時10點幾.......總覺得怪怪的......
注意既係俄羅斯海關非常嚴謹,就算特區護照免簽証都會check一大輪問你好多好多問題,甚至有其他網友講過海關唔識咩係特區護照唔比入境.......
我自己就係火車上被check 3次每次問十幾分鐘,我知算好ga la,點都好啦,總算平安到達!
可能同赫爾辛基太近,我到埗後就有種似曾相識既感覺...........一樣咁凍呀喂!!!!!!!!!連條河都同suomenlinna一樣既!想點呀!!!!!

係google map上,火車總站同hostel距離唔算遠係行到的,但一行落就發現唔對路 -------- 條街咁長ge????
原來聖彼得堡既道路比例非常大!同北京一樣,地圖睇落兩步路既地方都可能行到你隻狗咁!
加上積雪移動力減3,咩住大背囊係凍過北極既街道上“慢”步,我每10分鐘就要搵間店抖一抖,因為實在凍得太辛苦
但我到hostel後依然唔吸取教訓,嘗試超越極限!著哂所有可著既衫上身,由最繁榮既涅瓦大街開始步行遊覽!
結果就係重拾前日係Suomenlinna幾乎凍死既感覺+感冒返發,呢d咪叫囉嚟衰law!
不過,d景好靚就真既,特別係聖血教堂,十個鐘意!

夜晚去左馬林斯基劇院睇芭蕾舞劇~
此為聖彼得堡以至歐洲其中一座最有代表性既歌劇院,其內部裝修佈置亦盡顯氣派,絕對能與布拉格及維也納爭一日之長短!
可惜我被寒風吹左一日後已瘟瘟地,加上芭蕾舞真係唔太識睇,一邊睇一邊想訓........

返到hostel,竟然比住客以慶祝Chinese New Year為名捉左去開party!!!
但佢地一班fd十幾人自己玩講俄文,我一個人坐係度真係好奇怪........
更奇怪既係有個都幾nice幾健談既飲大左青年同我講 : 
"I really think Chinese people are very healthy!"
"What!? Why do you think that?"
"Because they are not easy to take drugs, it's illegal and will be shoot in China, right?~"
咁我知你唔係飲大左啦..............
寫得太長,下篇再續!

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~





=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








2014年1月29日星期三

德國working holiday第五十九章 : 重回柏林的蝸居生活

遊記太多,暫回正常時空,報告下而家係德國生活既點滴先~
兩個月既長途旅行後,由2月底開始我已駐紮於在柏林,11月時日日hea爆生活頹廢既柏林
今次返嚟,主要係配合有個fd嚟柏林玩我要做盲公竹,如果唔係我一定會玩埋波蘭先unun腳他他條條返德國
另外我想試一試可唔可以係德國街頭做小販賣下飲品,因為我知英國囉小販牌照係好簡單的,要賣都要有個岩既地方,我相信柏林自由既環境會易d
可惜我問完相關市政府部門後話working holiday visa唔比咁做,於是全盤大計咁就泡湯了...........
之不過,柏林既生活指數幾乎係全德國最低的,要雙失係度似乎比較好,而且我死唔信邪,唔信我會輸比呢個地方!!
皇天不負有心人,今次返嚟我終於有屋有工有working啦阿彌陀佛!!!!!(有工同有working係一樣ga中文老師......)
我而家居住既房位於柏林中央車站(Hauptbahnhof)附近,交通都算ok方邊啦(柏林中央車站同市中心一d關係都無)
原屋主要出差所以出讓暫住一個月,我睇第一眼時已經鐘意左佢!
間房有我香港屋企2/3咁大,大電視大梳化,乾淨企理,柏林少數既9樓高,仲有可以睇日落既露台,唔使4千港幣一個月我覺得ok ar!
但有左自己地方後個人好似仲hea左........
以前stay全日留係hostel會覺得頹廢到自己都討厭自己,但而家反而有d唔想出街! 試過將梳化椅移近露台就咁曬左一日太陽!
而我每日都會做既,就係去超市搵有d咩古怪材料買返嚟反轉個廚房!得閒叫d fd上嚟食飯飲酒打邊爐~
深夜時邊玩我十年都未肯玩完既逆轉裁判,邊睇電視裡李小龍同阿Sa阿嬌講德文,都幾逍遙!~

(某晚同working holiday既好友,德國土生香港人及剛來柏林既香港exchange大學生鴛鴦鍋~)

左至右,上至下:
胡椒排骨湯、西蘭花薯餅、芝士白汁雷蘭花蘑菇意粉
生火腿配哈密瓜(唔叫煮呀!)、encore嘅港式叉燒煎蛋飯+凍檸水、德國腸伴意式餃子配酸忌廉
自製Nachos、燒原舊牛仔骨配蘋果薯仔沙律、咖哩雞翼
(p.s. 其實我覺得我假如亂post野既話呢,成個Facebook page會變左飲食版law.....忍左手ga la....)


咁都唔係日日咁浪費生命ge~
踏入三月大地回春,柏林既陽光開始輕撫大地,凡有光之所在,總有本地人站著坐著躺著攤屍著,睇書聊天飲酒訓覺乜都唔做
酒吧餐館cafe客似雲來,開放的所有露天座位坐無虛席 ; 而只要係草地,都總有人在享受春天的來臨
至於我當然唔會浪費好天氣啦~
日照下約10℃的氣溫剛剛好,坐在施普雷河畔,感受著臉上的微溫悠閒地寫作..........這是香港不太會有的生活吧~(某程度來講其實都係頹廢既一種.......)



working方面.............wa好感動!!!!!我呢篇blog第一次正式講working ar!!!!!!!
因為面皮超級厚,終於比我搵到份服裝批發店既工作!
執下衫,上下貨,打掃下,其餘時間就係上網..........
囉住6€一個鐘嚟睇銀魂,好似有d過份ar ho?但點都好過幾萬銀一個月開會睇女優寫真ge
另外華人論壇上有請貨物包裝員,去到pat野做左一陣,個顧主同我講 : 「如果你想搵多d,可以幫我去買奶粉,每罐比返1.5€你」
買奶粉.......打包......what呢班原來係水貨客運奶粉返大陸!!!!!!!!!?????
我唔知德國呢樣野合唔合法,亦知對大陸人嚟講呢個係理所當然無咩問題,但作為香港人,我真係完全接受唔到!
窮都要有骨氣!要我助紂為虐!?采妳都傻!即走!
到而家,無意中比我搵到一份按摩店既工作!
我知大家第一時間一定諗衰野 ------------ 「睇死你一定做邪骨賣沙田柚ga la~」
唔係呀~~~~~~係一間正式既中醫藥推拿店,正過正骨水!
而按摩推拿店本身都係好多working holiday人都會打既工,因為語言要求唔高嗎,時間又彈性人工又唔錯,個註冊中醫師仲好好心機教我點做推拿tim!
所以,暫時都算過得唔錯啦~
不過靜極思動,停左一個月,開始又想去旅行啦.......



我暫定到5月都會以柏林為基地,假如各位網友嚟玩既,不妨搵下我呀~
預告 : 下一章會變返遊記 -------- 俄羅斯聖彼得堡

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~





=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!