測試1

2014年1月26日星期日

德國working holiday第五十三章 : 北極光全攻略

有人話睇極光係人生必要做既十件事之一,雖然好似誇d,但的確係我遊歷歐洲前就已經決心要睇一次極光!呢個都係點解我發神經凍到黐肺都要冬天嚟北歐旅遊既原因!
而且今年2014仲係極光大活躍既last year,唔理呀!我無論放棄d咩都要嚟睇一次呀!

唔親身嚟到都唔知,點解d人話睇極光就好似_ _ _ _ _可遇不可求,原來係真係要好多野配合先得!
首先,你要到北極! (從來無見過更廢既廢話!)
ok~其實係近北極圈既地方都有機會~不過係越北越好的
我住係芬蘭Rovaniemi既朋友話,好多人想嚟聖誕老人村呢度睇極光,但其實唔係咁易and唔強,因為呢度只係岩岩北極圈分水嶺,佢住左係度3年,見超強光既次數都真係唔多
觀賞地點方面,只要極光夠強,其實唔使咩特別地方,妳一抬頭就會見到佢既壯麗
但可惜呢種咁強既情況一年都未必有一兩次
所以就要去空擴、光害較小既地方,例如山頂,湖邊,只要問當地酒店or hostel既職員,大多數都會比到好既建議妳
又或者有d base camp本身就係專for睇極光既,例如瑞典Abisko同Kiruna就有幾個,有興趣既係Tripadvisor都好易搵到


終於去到呢d地方啦,開始六合彩既部份啦
天陰睇唔到就係人都知呀,但冬天既北極,無落雪都偷笑啦,有幾多日好天氣呀?
就算天朗氣清,好似我係Kiruna咁諗住“好天!?機會嚟啦飛雲!”,但當我去到時先發現另一問題
月光呀!!!!!!!!!!!!!
照到成個天上地下都澄黃一片,從來無諗過月亮可以做成咁強既光害ga!!!
個月亮又大又圓,我肯定唔係冬眠緊既話一定成群人狼狼人一齊呼叫“ar wooooooooooooooooooo~~~~~~~~~”
果個時候,我真係好想龜仙人可以係身邊.......聽聞你個龜波氣功射到上月球ga ho?




當以上問題都解決,但仲有一個你完全計唔到既野 ----------- 太陽
極光是來自地球磁層或太陽的高能帶電粒子流(太陽風)使高層大氣分子或原子激發(或電離)而產生 ---- from維基百科,即係太陽想點就點!
要預測都有d既,幾個website and apps (如Aurora Forecast)都有極光活躍度預測,但最多只係5-7日
阿太生唔like既,隨時10日8日都係low rate
咁都可以等既.........但就要睇下你個假期有無咁長啦.......


即係話要睇極光,你要係非初一十五正負兩日既時候,去到北極圈夠北既地方,遇岩天清無雲,仲要撞正太陽hyper果陣先睇到!
好高難度!!!!
但儘管咁高難度,都一定會搏一搏想去睇ga~就好似靚仔靚女特別難追,咪又係咁多人“鐘”個頭埋去~
咁有咩要準備呢?
首先如果可以既話,最好有車!
因為除左方便駛去遠離火害既地方外,最重要係有地方比你避寒!有時為左等極光一待就可以幾粒鐘,夜晚既北極,一個唔該眼訓訓著左就永遠訓著ga la!
亦因如此最好唔好獨自去,娛樂解悶活動不能少,仲有紙巾一打if你個鼻似我如黃河缺湜預備,有口罩最好都帶埋,真係暖好多的
另外如果真係自駕,司機既技術一定要好好,夜晚既雪山雪地係極度危險的!


咁好啦,紙上談兵左咁耐,咁你睇唔睇到北極光先!
其實呢....................我係睇到ga!!!!!!!!!!!!!!!!!!!!!!!!!!!!!!!!!!!!!!!!!
係Kiruna果晚都隱隱睇到微微既綠光出現左兩分鐘,但正正式式睇到既地點係挪威西北部的羅弗敦群島Lofoten Islands!
事後孔明既我地先知道,我地嚟左一個絕佳既觀極光位置!
Lofoten群島係一個個寧靜既小漁村,位置比Kiruna及Rovaniemi更近北極點,但出名溫度偏暖(區區-16℃唔當係野啦!),加上太西洋既海風吹散雲層,而我地住既apartment外就係碼頭及湖泊,光害少兼可以隨時入屋取暖,加上果兩日咁岩個rate係moderate,實在係夠運呀!!!!

(就係呢度啦,下一篇會再詳細講下呢個群島的~)

時間係2014-01-22,起初只係玩“Who am I”玩到悶出屋外碼頭吹吹風,抬頭一望,點解個天有個位綠綠地色ge?
1秒之後先醒覺大叫“出現了!!!!!!!!!”
全部人即刻衝哂出嚟,只見漆黑既天空上一束凝碧綠光,由前方山頭劃向北方,然後兩束、三束,再分為數道光柱散向夜空
跑到屋後的湖邊空地,此處更為幽暗,卻可見翠玉光柱慢慢如靈蛇般屈曲,蛇身向外散出光芒,再化成照片中常見的布簾狀,接下來整個天空被濃淡不一的光浪籠罩,隱隱地隨風飄動............
太美了................我當時真係興奮到發抖!忍唔住大叫 : 「我真係嚟左北極呀!!」
只是普通狀態,只有綠色既極光都可以靚成咁,真係想像唔到強光時會是怎樣的夢幻..........
同行既香港情侶,Ricky仲立即向Gracie求婚tim!浪漫到呢~~~~
但Gracie好似話「好啦我應承你,唔好阻住我影極光呀~」lol Orz
喧賓奪主tim...........各位想極光下求婚既男士,諗清楚呀!!!


呀仲有攝影方面,雖然話呢家野我真係一竅不通,但都知無單反既話可以收檔啦
就算有單反,但無腳架既話都係影唔到極光的,我唔太明ar,但見Gracie放單反係石上固定都影唔好......

至於我既攝影配置,Olympics TG-2全天候防水防塵傻瓜機 + Sony Xperia V ........影出嚟見到綠色都阿彌陀佛啦.......算吧啦六師弟
以上所有相其實都來自同行的法國少女“Oh really”,無限感謝!
另外,原來相機有時可以影到我地肉眼睇唔到既極光!
Gracie係第二晚就曾經影到天空有橙色極光,但我地就咁睇就乜都無
所以,留住最美一刻,係要錢同技術ga~

(呢張係我最極限影到既極光,大家睇到個分別啦.......)

睇極光係我夢想之一,今次成功睇到,感覺上好似完成左一件能人所不能既壯舉咁
雖然並不是極強極壯觀的極光,但她曾真實地展現於我眼前,予願足矣!

===================

相關文章 :

====================

Email : funggarcia@gmail.com






另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!

 




沒有留言:

發佈留言