測試1

2014年1月29日星期三

德國working holiday第五十七章 : 芬蘭人生活初體驗

我去旅行最鐘意既,就係體驗外國人既生活方式,不論係食住玩hea都係,越local越好
感謝小笙同佢男朋友的大方,讓我借宿於佢Rovaniemi家中數天, 令我可以親身體驗下芬蘭人既生活,而且仲慳好多tim!XD
咁我究竟攪左d咩大頭佛出嚟呢?

係芬蘭冬天長期積雪加凍到痴筋,湖泊被白雪完全覆蓋,基本上有可能你行左上去都唔知的!
係冰湖上梗係要釣魚啦!我一直都好想試一次冰上釣魚ga la!
要玩既當地有好多local tour都會帶你到目的地,好處係你唔使煩有埋釣具,而且仲唔怕跌落湖游冬泳無人救,但一個tour都要一張金牛起跳,唔太化算!
其實要玩好簡單,只需要有一塊成尺厚既臉皮,見d人係湖上釣緊,走埋去同佢傾偈~傾得埋既,就問下佢可唔可以借嚟玩下~
以北歐人既大方友善應該無咩問題的~而且佢地多數都唔止一副釣具,唔怕妨礙佢啦~
同埋佢地都開心有人幫手一齊釣,一家便宜兩家著~
不過今次無匈牙利時咁好彩啦,魚毛都無條,而且空擴既湖面太凍啦(記住你企緊係舊大冰上面的,仲有風呢!),半個鐘已經頂唔住!但的確係幾過癮既~



唔講都唔知Angry Bird原來係芬蘭出品!
市面上周圍都係佢地既產品,毛公仔床單被鋪甚至汽水都有!而Rovaniemi市中心就有一個Angry Bird主題公園
聽落好勁,其實只係一個普通既宋皇臺公園加果幾隻雀上去,目標對象係十歲以下既小朋友
儘管如此我都玩個不亦樂乎!
有絕左種,細個係沙田中央公園沙地既索道式鞦韆呀!!!!!!!!!!
反正係外國無人識我係乜水,一個大男人係公園白痴下發下癲有咩所謂~
仲可以係雪地寫下大字,咁就玩足成個下晝啦!
當然啦有d字係唔公開得,因為只比某某的



有一晚去左小笙男友一位朋友既家中作客
令我目瞪口呆既係,佢地竟然notebook播youtube插咪嚟唱K!重要唱到幾high果隻!
之後佢地比支咪我 ---------- 我唔識芬蘭文ga喂....................
盛情難卻,五音不全既我唯有search"好不容易”老牛聲咁唱下啦.......真係有d對唔住方生......
一首歌後甩難,都係幫小笙整pizza吹下水好過~無錯,係自己整pizza ar!



另外嚟到芬蘭,點可以唔試下正宗芬蘭浴!!!
但可惜真正舊式用柴燒果d都係自家屋企製造的,並無公共經營,唯有退而求其次去游泳池啦
唔使奇怪,芬蘭公眾游泳池係有桑拿的!
入場費已包括在內,男女分開,條件係必須全裸,而且事前事後必須沖身
無問題小兒科呀~但老一輩芬蘭人實在太恐怖啦!房內溫度係75℃起跳,熱到頂唔順時仲要不斷加水!好似真係要蒸熟我d豬腩肉咁!
我認輸!立刻沖身走出去按摩池!
但即刻比工作人員截住,原來佢地唔比著短褲落泳池的!唔通我要裸泳!!!?????
工作人員轉身囉左條黑色泳褲比我,我呆左望住佢,眼神中透出4個字 ------ “唔x係掛”
少女微微一笑,“it's clean~"
如果係歐洲其他地方我死都唔著ga la!但總覺得北歐人好信得過,於是換上泳褲,享受下水力按摩,按到痕就焗返陣桑拿,來回3,4轉,幾爽!
特別要提下個按摩池,有一個area係用繩網鋪底略為離地,多個小噴咀由下而上噴射,因為繩網承托令你有飄浮中既無壓力按摩感,非常不錯!



感受過既特別事就大約係咁多~
其實芬蘭人以至整個北歐人都真係very nice,我試過搵唔到郵局有路人開車車我去tim!
加上Rovaniemi地近北極,同Kiruna一樣冬天都係完全純白一片,係值得一到來睇美景的~如果情侶嚟到住下玻璃酒店仲正啦!
當然,我只係Rovaniemi住左4日,唔可能完全理解芬蘭人既生活方式~但已覺得呢次嚟芬蘭十分有趣!
如果大家對芬蘭有興趣既,可以留意下我朋友“寄居芬蘭”既blog ga~
呀仲有樣野想記記
因為臨時漏左張postcard無寄,於是離開Rovaniemi前特登走多一轉聖誕老人村,反正好近機場都ok ge!
但我睇小左google map,地圖上半個鐘既路程,係落雪+大背囊+暗斜下行左個幾鐘,其實諗返都有d危險,沿路真係一個人都無ga........

=================================== ===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~





=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!








沒有留言:

發佈留言