測試1

2014年2月13日星期四

德國working holiday第六十九章 : 神秘飛地加里寧格勒@俄羅斯

我覺得呢個地方簡直係我旅程中最大既挑戰!

地圖上一塊沒有國家名字的土地,一個幾乎無遊客去既地方 --- 俄羅斯“飛地”的最大都市加里寧格勒Kaliningrad
所謂飛地,簡單嚟講就係直接屬於某個國家但係無任何地理上既連接,例如阿拉斯加比加拿大隔開左但係屬於美國一樣
歷史上加里寧格勒(估且用呢個城市代替呢片土地先)因為1990年立陶宛獨立而完全被隔絕左,另一邊陸上連接既只有波蘭東北部,而隨著立陶宛都加入歐盟,歐洲人要進入已變得非常困難,因為俄羅斯對歐洲人既簽證要求都幾嚴格,加上地處偏僻,普通旅客根本唔會去
我呢?係里加見到有車去wor,咁即係再近d既Klaipeda (上一章踩單車果度呢)一定去到啦~哎呀特區護照免簽證tim!XD
而根據我係hostel既人際網絡資料搜集,對全世界backpacker嚟講加里寧格勒係一個完全未發掘未知既神秘地域,去既人少之又少,資料亦嚴重缺乏,既然係咁就等我親眼去見識下佢係個咩地方啦!





唔使簽證既話去Kaliningrad其實唔難,里加、維爾鈕斯、Klaipeda等都有巴士直到,而且都係$100-200,一d都唔貴,不過最快都要4-5個鐘,同埋被俄羅斯海關仔細詢問啦
時差係GTM+3,但智能手機會跟返波羅的海3國既GTM+2唔會auto轉,呢件事要小心,火車巴士等好易睇錯時間的
市內巴士同Tram坐一次係15盧布,即約港幣$3.2,平到笑!


前事講完,話咁快到埗啦!
一落車第一個感覺就係 -------- 非常之中國呀!仲要係廣州市果種感覺,即係80年代式現代得嚟,又殘殘舊舊,汽車商店等都係鋪滿塵
建築方面市區則充滿水泥、方塊形的屋宇,但偏遠d既住宅區又有歐式或德國式風格,馬路行人路上灰灰黑黑的...........其實我懷疑行社會主義既地方都會係咁既樣
之不過呢度既人相對友善守禮,係比已經唔錯既聖彼得堡更好,治安亦明顯好得多,起碼我無見過當街醉酒佬同以為你識俄文撩你鬧交既傻仔
我夜晚12點逼於無奈行山區小路返hostel都無被老笠未死得!係咪好有力既證據呢!
不過友善守禮唔代表真係好好,因為係呢個言語完全不通既國度你好多時需要問人野,唔識英文係正常的,但佢地好多時比d資料都係錯ga.........
呢樣野下篇大把有得講.....暫按下不表






加里寧格勒市中心並不算非常大,比起聖彼得堡乜都大行到斷腳真係濕濕碎~
主要觀光景點有 :
1. 市中心既白色東正教教堂及堂前大廣場,唔算極華麗壯觀但都真係幾靚,值得一到




2. Museum of The World Ocean及其西邊既大鐵橋,位於河邊,停泊左不同年代既戰艦、遊輪、漁船,甚至潛水艇、軍用大炮既實物,日落時型到爆炸!而博物館2017會裝修完成,到時好似會有海洋生物等更多野睇。




3. Kaliningrad古代係由內外兩層的城堡環包圍保護的。外環要特登坐車去,內環則市內隨處可見 ,每一座都只有二至四層樓高 ,現多以成為政府或商業用途。
較有特色的是地圖中央既Attack gate,放置左戰爭時的紀念碑,旁邊連接數座小城堡,同時充滿古代及現代戰爭的痕跡。如果有時間可以去埋城市地標既King's gate,但我就覺唔太特別





另外天氣好時,Cathedral Church島、Verhnee Lake同Park Yunost都係幾靚的~




我去到的第二天剛巧是情人節,幾處博物館內都舉行私人活動進不了,但都看到了一些浪漫心思~
而於我?雨中把要行的行哂後,到了WiFi coffee shop等一個話要打比我的電話,最終被放飛機,但也因此有時間寫哂d postcard
一個人旅行,甚麼節日也沒關係吧




此地食品以俄羅斯菜及烏克蘭菜為主,味道都幾岩香港人口味,一餐豪既約$130港幣,唔平唔貴啦
推介市中心東正教堂旁商場地下正門的餐廳,個芝士焗魚真係好味到不得了!
另外行過d既餐廳Zotler Bier既烏克蘭菠菜豬肉餃子配酸忌廉又係諗起都流口水,但份量細d





另一樣好有特式既係postcard!
我其實每去一個地方都會寄,但由於此處是“沒有旅客”的城市,根本就無任何紀念品店,要買postcard就只有去郵局
而佢既postcard竟然係三張卡摺埋既小相冊!我寄過50幾次都係第一次見咁靚既設計!
不過記得一定要買埋郵票,而且寄international係藍色呢個郵筒,我仲保險d請當地人幫我寫埋俄文“Hong Kong"上去,最後是成功的例子!






住宿方面,市內得一兩間hostel,床位也不多
我住了Hostel Akteon Lindros,約港幣$100一晚,地點不算太方便,但總算是能走路到市中心,職員不懂英文,但樂意用google translate溝通
之不過整間屋氣氛感覺都怪怪的,我事後諗返,我懷疑我去左一間特別的青年旅舍............
首先兩位職員明顯係龍陽君後人,房中清一色男人,夜晚仲有個長期住客撩完我傾一輪偈後指指自己下體再指指我個口............
我唔介意人係左手,但拜託唔好對我呢個小男孩有興趣呀....禮貌地搖搖頭扮唔明打發佢走算啦.......


(原我唔記得影低間hostel,唯有用住網上圖片先啦)


大致上嚟講Kaliningrad驚喜唔算好大,但係一個非常有俄羅斯特色既社會主義城市,同聖彼得堡截然不同!
不過,我要提提有意到此一遊既大家,呢度絕對唔係一個方便外地遊客既城市!
又係寫得太長,下回先講下我係度遇到咩麻煩事件........

=====================================

呢篇同下一篇都係寫於剛離開加里寧格勒的長途巴士上,其時極度燥底,所以文章平時的抽水同幽默感欠奉,請諒!

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/





==============================


我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~




=================================


Email : funggarcia@gmail.com





文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!









沒有留言:

發佈留言