測試1

2014年5月31日星期六

德國working holiday第八十六章 : 係愛丁堡唔去愛丁堡究竟做乜好

大學時係AYP莊,所以聽過有樣既叫愛丁堡公爵獎勵計劃,到空姐朋友去完愛丁堡話好靚我先知原來係蘇格蘭!(我都話我geog好差ga啦)
聽到蘇格蘭又唔同講法wor,一直都聽講係個好有特式既地方!
蘇格蘭威士忌、蘇格蘭格仔裙、蘇格蘭場警察學校、 蘇格蘭場非工業用國際線路自動溶雪16 Valle風油太垂直升降大包圍連擂射彩色洗衣乾衣腐蝕性氣墊毛筆一枝等等等等
咁多出名野,難得到左英倫島,唔可能唔嚟ar?~

於劍橋坐廉航Easyjet約$400-$600港幣飛約1小時就可到愛丁堡,但Easyjet價格浮動得好利害成日加價,宜睇岩就買(講係咁講ar......)
呢度物價比倫敦略平,但都係貴到嘔,我其實真心唔明點解英倫一帶可以有北歐咁貴........
唉嘈完就算啦,愛丁堡最出名既就係果座愛丁堡!
傳聞中係乜乜乜咁咁咁同點點點ge -------->即係詳情請參閱維基百科~
wei唔好扔野住!!!!!!!!因為我根本無入去點講je!!!
乜料呀嚟愛丁堡唔去愛丁堡????
咁話說果日紅雨咁勁,我因為plan行程攪到勁晏先去,3點到4點,收無理由淋住雨比兩舊水睇1個鐘ga,加上古堡見得太多,把心一橫算數啦


(呢張係第一日無落雨遠睇影既)


唔入城堡仲有好多野做ge,去爬火山啦!
Holyrood Park係位於城市既死火山,基本上成個愛丁堡陸地都係由佢既火山岩形成的
一d都唔難行,沿路風景優美,仲可以飽覽愛丁堡市全景,不錯!


(有大學教授帶學生做實地考察)


行完可過對面既Calton Hill,又係上山,不過今次就係對岸望返火山,仲有一堆紀念碑增添情趣
除遊客外不少青年男女都係度拍拖談心,行過都偷聽唔少「如果果日你無遮我就無得一齊lu」「今晚去邊je衰鬼~」
實在難以想像呢處係古時放逐瘟疫病人的禁區



愛丁堡舊城區大家去得就一定會經過唔使多介紹啦~
講真,的確係非常靚非常典雅!我覺得係一個純灰棕色兼少條河既布拉格!
只係d雕像同街道房屋都有排睇!
如果有興趣知多d當地歷史故事可參加當地既free walking tour,不過我份人太孤僻,一見成50幾人鴨仔團即刻無興趣,都係自己行再返屋企慢慢睇資料啦!


(d格仔頸巾種類多到好似垃圾咁周圍扔)


仲有我去左個叫Cramond既海邊
話說紅雨果日去唔到愛丁堡,橫掂個人又濕左又無野做,就去左呢個聽聞潮退時可步行過對面島兼海上睇日落既美景
諗住晏d細雨,點知越落越大,我又無著防水衣物,海邊又橫風橫雨,行唔到去對面島之餘連低褲都濕埋!
無奈下走入海邊酒吧用火爐烘乾個人啦......
wa不過間bar好抵!!!!!唔使£1一杯生啤仲有5種任你揀呀!!!!!!!!!!


(其實天氣唔係咁惡劣既應該真係會好靚!)

(走時細雨左又潮退,終於見到條路!)

最後嚟到蘇格蘭,唔係唔飲威士忌呀!!????
最衰係我阿哥同個fd,幾年前教我飲威士忌攪到我愛上左!其實講真我嚟蘇格蘭一半係為左飲正宗蘇格蘭威士忌XD
去左間叫Whiski Rooms既Whisky bar,型仔bar tender介紹我飲呢隻Kilchoman
Islay,6年, 唔知peatiness定smoky ,話係因為新廠所以連蘇格蘭本土都唔常見,但完全岩哂我taste!!!!
唉如果唔係廉航上唔到機我都想買返香港ar.......
(呢件事其實我係fb page都講過,不過我長氣講多次je~)



愛丁堡市就係咁多先,嚟到蘇格蘭點可以唔去世界聞名既蘇格蘭高地呢?
加上High Land Park係自己最愛既Whisky,點都有d fantasy,所以都有d 所以一聽到有tour去唔使諗即報名!
hostel呢個tour分1、3、5日ver.,當然越長時間越多野睇同時都越貴啦
時間所限我只能報1日遊,點知就中計............
去左兩三個高地小鎮,無導賞介紹,只係到站-->扔落車-->自由時間,最精彩既只係靚山谷中停留廿分鐘......
喂睇小冊子好靚ga..........自己又大安旨意無睇清楚去唔去著名既巨石陣........
縱使帶團位哥哥仔非常風趣,但仍然有點失望.........



愛丁堡真係一兩日可以攪掂哂既地方,但高地就可能真係要將來嚟多次啦
又下次??????邊有咁多次下次大概可以????
好啦.......為左Whisky再嚟,好似會開心d ar ho~


My Facebook Page : https://www.facebook.com/Garcia.in.Germany ,請多多支持!~

2014年5月25日星期日

德國working holiday第八十五章 : 劍橋綠柳輕舟飄

「輕輕的我走了,正如我輕輕的來,我輕輕的招手,作別西邊的雲彩」每一個去到劍橋的中國人,特別香港人一定會諗起呢首經典,而介紹劍橋的旅遊書同blog亦都一定會引用徐志摩呢句瀟灑既詩詞,我都不能例外,因為呢個係最簡單話比人知呢個係乜地方既方法
作為一名中文教師,對於徐生,我一直都覺得.....................................
超!最鬼憎佢ga啦!!!!!!!!!!娶幾個老婆到處留情,仲要專搵朋友妻咪走雞,又扮哂咩文士風流追求愛與自由,根本就係咸濕g ma!!!!!!!
點解作詩勁就可以有3個老婆做情聖,點解有名氣又可以做校長有兩個老婆好地地,點解我死窮鬼拍過幾次拖就比人屈有一百幾廿萬個女人!!!!!!!!............
好啦其實以上講笑je(其實帶緊頭盔先真),佢其實都幾慘,尋尋覓覓,最後搵到果個竟然係港女大花同,搵多多錢都唔夠佢使,勁似某個歌手既遭遇.............
ok吐糟完畢!劍橋遊記開始啦~

我老友“Lukkaround”住在劍橋又係度返工,點可能唔嚟打攪佢呢~
由倫敦大把巴士同火車到,只需約一個鐘即可到此,巴士平d,好似£12左右而已~
劍橋有三樣野最出名,第一當然就係世界最頂級學府劍橋大學啦!
好似HKU咁,劍橋大學係不同學院分散於城市內
即係你係街上見到d唔係遊客既年青人,可能求其一個都係過5關斬6將先嚟呢度讀書既超級猛人,分分鐘將來唔係唔知咩有錢佬or國家元首!
各位單身男女,釣金龜投資既機會嚟啦飛雲!!!



第二樣就當然係撐遊河欣賞下康河啦~
不過泛舟河上呢d咁浪漫既野都係唔岩兩條佬ga la,都係漫步河邊橋上睇人於搖曳綠柳下輕舟飄算啦
有時見人將支撐船竹成條入哂河,真係笑到眼淚水都標,話哂支竹節瓜咁大條wor,咁都留得低真係不得了!
話時話,可能夜半嚟玩先至夠情調呢!



第三樣應該係巴士總站一落車既大草原啦!
廣闊開揚輕鬆寫意就一定ga la,老友仲話呢度原來係現代足球既發源地!
當年一班劍橋大學生食飽飯無野做,就係呢個草原上以天為被以草為蓆以樹為龍門,就咁創出左現代足球規例!
時至今日,國際足協指定既龍門闊度仍然係以呢個草原上的樹木間距為準!



必到既就係咁多,講下d私人ge活動la~
有一日無聊坐左3個鐘車去Oxford附近既outlet睇下有無咩又靚正野執
但發現根本係抬高左價再減返既超市式昆遊客技倆!(特別大陸遊客又多.......)
連英國品牌既Fred Perry同Jack Wills都無平無靚,真係完全買唔落手,浪費左一日加來回車錢......



有日下晝同老友and佢班泰國朋友一齊去左個garden high tea~
好熱好曬行好遠,不過沿途草原感覺唔錯,個英式鬆餅+鮮牛油就更唔錯,值得一到~


(咁岩撞正飛機噴煙練習!)


仲有就係適逢歐聯決賽馬德里打毗戰,係正宗英式酒吧大吃大喝怒撐馬體會!
可惜領先下最後補時失守加時再輸埋勁陰公......
不過非常愉快盡興!!



係劍橋短短3-4日,但老友足足陪我又行又食成個星期!
多謝呢d唔多講啦,香港見啦!



My Facebook page : https://www.facebook.com/Garcia.in.Germany