測試1

2014年6月17日星期二

德國working holiday第101章 : 克羅地亞(3)聽海與日落@Zadar

海哭的聲音唔少人都聽過,係阿妹同學友把聲嚟ge,但有聽過海洋的歌聲嗎?
唔係魯賓遜沉船+鐵達尼果種奪命狂呼,亦唔係錢塘夜潮般澎湃的轟叫,而是如天使般在妳耳邊吹起貝殼螺的梵音
這樣的事,從來未曾於我見識淺薄的腦海內出現過,卻無意地在此旅程中遇上了

克羅地亞西部海邊城市Zadar,於舊城區西北最頂端有一幅臨海之地,用米白色的大理石裝置得整整齊齊,乍看還似普通的海旁階梯
然此卻為世界上寥寥無幾的“海風琴”Sea Organ (Organo Marino)!
把海岸內部建造成一座巨型風琴,利用潮汐作動力,每次海浪湧起,進退之間,拉出一絲絲沉穩而悠揚的聲響
坐在琴階之上,閉起雙眼,聽著,直如海中女神奏出一段段美妙的樂章



只滿足耳仔唔夠既!
Zadar Sea Organ最屈機既係聽覺享受海之呼聲同時,視覺則陶醉著夕陽西下之美景!
眼看著太陽由耀眼的金黃,漸漸轉成艷麗的赤紅, 一步步穿過雲霞的面紗,最終退隱於一坪之海岸線上
耳聽著海風琴的演奏,配以海歐、天鵝的詠唱,此仍真正海與天的伴奏,是無與倫比的海洋交響曲!
夕陽醉了,爾等又何嘗不醉呢
太陽完全消失於海岸線時,在場所有群眾不自覺響起熱烈的掌聲,直如傳聞中希臘聖托里尼島的夢幻日落一般!
好啦睇完我寫咁多中學生式描寫文,係時候有相有真相啦!
今次仲破天荒有埋片睇tim!!!!過左100章果然係要d新鮮感衝擊下呀~~~



//



http://youtu.be/_K0n0T9nagw


希治閣曾講過 :「Zadar擁有世界上最美之日落!」
此處是否best of the best我不敢莽言,但以個人經驗所見之日落,只有德國海德堡的火燒天( 第三十八章 )、芬蘭赫爾辛基Suomenlinna的冰裂海( 第五十八章 )和俄羅斯聖彼得堡涅瓦冰河上之日落能媲美!( 第六十一章 )
然以五官感受之完全,Zadar可謂無得輸矣!
眼見有不少準新人在此影婚紗相,心想如果在此求婚既99.99℅一定掂!豬八戒都娶到小龍女呀!如果你係剩低果0.01既唔該自己檢討下ar~
同類型的建設,地球上好像只有加洲三藩市有Wave Organ!
唔想去咁遠幫襯美國佬既,克羅地亞Zadar呢處一定要嚟啦~
但香港去克羅地亞真係近過去美國咩??.......................


(外國d小妹妹幾招積~)

(同上文求婚無關!Kyoung純粹係睇日落時撞見既Hostel同房客!言談後發現原來佢係我半年前係立陶宛維爾紐斯認識既韓國學生們既好朋友!Backpacker既世界真係好細呀!即係佢地----)


關於Sea Organ仲有少少野講~
係Organ上有一舊圓形電子發光格仔舞池,於入夜後閃下閃下
資料介紹話好靚,但我去到就得個“哦”字,而且第一日大雨後滑過溜冰!
不過都可以影下相ge,反正去得Sea Organ一定會見到的


(有個傻人濕都要訓係地下影~勁受注目!XD)

Zadar兩日既行程中其實我只睇左Sea Organ,舊城區其他地方我都係匆匆行過下就算,連去新城區條橋都無行上去!
攪乜鬼兩日去得咁少地方咁忙ar???
事源我由Pula坐5個鐘車嚟到Zadar後就落起黑色暴雨!
全身防水裝備下行左20分鐘,底橫都扭得出水呀!
於是整個下晝就豹隱Hostel開冷氣吹乾衫睇電影撩㗎妹......呀係同日本少女傾偈先真!
夜晚約左Pula巴士上認識既香港女仔Katis一齊睇德國點贏葡萄牙及食飯
而當晚係大雨到睇唔到日落的,上面既相其實係我第二日去完one day trip返嚟所攝,真係好彩係此地留多一日je~


(舊城海邊,影呢張相開始狂風大暴雨..........)


仲有Zadar近往新城區橋街上有間Restoran Bar Atrij餐廳,我食足兩日!
街邊座位別緻舒適,侍應生服務一流,青口pasta同燉羊膝正到爆!
只係份量有d細,pasta係同意大利一樣係屬前菜類,不過細食既女仔都夠飽的!
連飲品每人約$100至$150,間中豪一次啦!


(第一晚,與Katis及佢剛相識既澳洲朋友dinner~)

(份量太少,男仔唔會夠,但的確超好味~)

(南歐食飯,有醋油麵包就一定ga la~)

(好味到幾乎想囉住舊骨咬!連配菜既薯蓉都比我洗碟~)

(往新城區的橋,影完相就走,無行過~)

下回會講我係Zadar第二日既One day trip~
熟地理既朋友,應該都估到我會去果個必去既地方ga la~

===================================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany ,多多支持呀!~

沒有留言:

發佈留言