測試1

2014年6月5日星期四

德國working holiday第九十二章 : 布魯日.大醉日

續上回,究竟我係比利時第一日發生左d咩傻仔事呢?
其實睇標題都知,我係布魯日呢個城市醉到痴左線!
之但係話哂係德國日飲夜飲,應該身體抗力甚強ga! 攪乜鬼先?
唉..........呢件事就要由早上講起啦...........

話說我凌晨5點起身,由阿姆斯特丹坐Euroline巴士直到布魯日1st day,到埗時已經係下晝兩點多,再去hostel check in,安頓,覆下whatsapp +病態地查埋facebook後都成3點半有多
出門前hostel staff話今日係另一間hostel有Beer tasting event,10€(約$100)可以試5種比利時最有名既啤酒,仲有專人講解每種既特性,源流同歷史故事,完哂仲送多一支任揀既啤酒tim!
比利時作為同德國齊名既啤酒大國,一定有好多香港極少見而且極貴既靚啤酒!本來我就預左嚟呢度大飲特飲ga la!
而家有埋專人講解,仲唔正中下懷!二話不說即刻報名!
時間係晚上7點,仲有幾個鐘,正好出去行下食d野,期待一陣既杜康之會~


(比利時既啤酒種類真係好多好多,真係天堂ar!~)

睇過上一篇都知Brugge有幾靚啦,未睇嚟而家click返去睇都未遲ge~~~
我1st day嚟到當然比佢咁靚嚇襯啦,於是邊行邊影相尋幽探秘!
突然連天色都轉暗,黃河之水天上來,黑風暴雨下我即刻由一個乾爽舒適既男人變成游完水上岸既男人
無辦法,唯有躲進酒吧中避雨吧!



在bar台坐下,下意識叫左杯本地啤酒Brugse Zot先睹為快!
在此先簡單介紹下比利時啤酒既特式先 :
同一般青島藍妹唔同,比利時啤酒大多苦味較輕, 例如香港人喜愛既Hoegaarden同Stella即是
正宗比利時啤多帶花香和少許甜味,有回甘,易入口,味於口腔凝而不散,但酒精濃度卻高,一般啤酒都是5%左右,Belgium beer卻多界乎7-11%,有些甚至高達14%,與紅酒看齊!加上啤酒有汽,故更加易醉!
之不過由於味香清爽唔苦,所以深受女士歡迎,亦係男士展現品味及灌醉靚女的常見啤酒~
同德國啤酒比較,德國偏重麥味,大多苦澀淳厚,粗中有細,或如好友所講德國啤酒飲完會飽,比利時啤酒則飲極都仲有,除非醉!
而我就覺得,“北喬峰南慕容”,各擅其長啦


(張相唔係攝於果間酒吧的,但係同一種酒,因為原相隨手機sd card壞掉而被消滅了…..)

飲埋杯酒,見雨停就出去繼續行,只見中央廣場上人群聚集,個個手持白色汽球,並向燈柱獻花
問問路人,原來當地球會成員發生情殺慘劇,市民約定今日於此進行紀念活動
我想既路過於此也是緣份,於是亦與群眾一樣手持白汽球,等時間到一同放上天空,願死者安息



放完氣球都已經7點!快步趕到城西的一間hostel,岩岩準時開始!
taste既5種啤酒分別係Duvel,Kwak(我的最愛),Westmalle,Chimay Blue同Brugs
主持既Bar Tender感覺非常專業!
每一隻酒都詳細講解入口味道同after taste,仲有酒杯作用,歷史源流,啤酒小故事同比利時人飲啤酒習慣等,就好似上左一堂充實既beer lesson!
我而家先知點解要酒杯相撞嚟“乾杯”,同埋Kwak為何有呢個特別既酒杯構造!
而且位Bar Tender非常識攪氣氛,加上兩杯落肚,大家都由開場前---->簡單social幾句 ; 開場後---->攬頭攬頸大癲大叫!
我都發現自己飲酒後英文流暢左10倍,簡直由Garcia Chan變左做Patrick Chan!
所以會考生真係可以飲返兩杯先去考oral的!
不過入唔入到考場同夠唔夠秤就另一回事啦..............


(專業bar tender~)

1 hour Beer tasting完結!飲埋一整支送既Delirium後,其他參加者叫我一齊去pub crawl繼續狂歡!
但我一向都唔鐘意呢家野,加上都飲夠了,於是婉拒後一一互擁道別
好!8點幾,係時候出去........................................
ee,點解有兩道門ge?唏!幻覺嚟je,嚇我唔到ge!
唔係wor,點解我變左大蛇丸S形行路ge???
雖則杜甫《飲中八仙歌》有云 : 「李白一斗詩百篇,鋒哥兩杯係咁先」,同大學班老友鬼鬼飲我都係最快跪低果個,但都唔係咁誇張呀??
等等先..............我好似唔記得左d野..................
.......
..................
.....................................
wa我唔記得左食野呀!!!!!!!!!!!!!!!!!!!!!!!!!!!!!!!!!!!!!!!!
我由朝早5點起身到而家夜晚8點一粒米都無咬過之下,直接空肚混左7種濃度8至10%既啤酒呀!!!!!!!!
你係咪痴線ga!邊有人14個鐘都唔肚餓???但我就係個一專心工作就會忘記肚餓既變態.......
load 1 load先!我今日曾經有幾個機會可以食野ge!
1. 巴士於布魯塞爾停站時 --------- 黑色暴雨咁點出去呀?
2. 避雨時酒吧有野食 ---------- 見隔離枱一兜Nachos只係齋粟米片+茄汁都收6€,我體內隻度縮既小魔鬼又發作 -- “死窮鬼!忍下啦!”
3. 避雨後廣場有小食店 ---------- 比白汽球side track左!!!
ar!!!!!!!!!!!天作孽猶可恕,自作孽不可活!!!!!!!!!!
我突然間好似見到阿叻係我面前同我講.....................


(last 1支,聽聞係加拿大常見的)

(beer tasting間hostel)

(早上於布魯塞爾大暴雨中,唯有係車內)

垂頭彎腰曲身大蛇行約100米,辛苦到頂唔順於路邊石像坐下休息
我想吐但是吐不出來(國語plz), 酒精雖於胃內翻騰著,卻嘔不出一絲東西,情知係空肚下酒精吸收過量快速入血,即刻食兩粒隨身攜帶朱古力,呆坐空嘔半個鐘後先再爬返自己間hostel...............
我真係慶幸自己唔係一醉就發癲乜都唔知既人!如果唔係我應該跳左落水約緊河童捉美人魚,咁當然事後要朋友買定西瓜搵我返嚟啦



好不容易返到房,一放底野即刻衝去廁所抱住個洗手盤,繼續我“嘔唔出又要嘔唔嘔唔得”既艱巨任務
突然喉嚨一陣火般灼熱,我終於連胃液都噴埋出嚟!
如是者斷斷續續,真如身處人間地獄! 整棟hostel充滿我虎嘯龍吟既“er er聲”, 其他友善既住客紛紛過來投以關切既目光
唯有飲者留其名,嘔到咁勁真係唔慌唔留名啦!

兩個鐘後,終於連hostel staff都上嚟問 : 「May I help you?」
我 : 「Yes............Do you have something to eat?」
Staff : 「Just follow me!」
於是我拖住仍搖晃的身軀跟住佢,唉終於可以食d野,有野嘔會無咁辛苦啦.........
走到樓下,Staff同講 :「Open the door, go out and turn left, right, left, and walk about 300m, you can see the plaza, across the plaza and turn right about 100m, you can see a fast food shop!」
我眼神中透出迷惘之色...............你咁講,同叫個跛既去爬樹有咩分別呢..............
我有一剎衝動,想對佢既臉龐使一招呂洞賓醉酒提壺力千鈞,再嚟招何仙姑屈膝探細佬(後者語出細個睇兒童週刊既醉拳漫畫,我都唔知點解記d無聊野會記得咁清楚!)
但我不能放歌,口中勉強說出一句「Can you buy it for me?」
鬼佬微微一笑,右手搭上我肩頭「It's not far away~」
.....................只能說我輸了.............



雖已近仲夏,但晚上仍是寒風陣陣,加上酒精使體溫流失,直彷如身處北極!
彎彎曲曲走到fast food shop,我仲可以清晰咁講「Obviously,I am drunk,so,just give me a burger plz」
「Any salads and ketchup?」「Mayo,and no onion plz」
好正常既對話,但我係上半身扒左係張抬度+完全無見到收銀員咩樣的
回到hostel,咬兩啖,終於有野落肚啦陰公........再嘔多陣,總算舒服d,con都未除就上床昏迷,直到凌晨5點先有正常神智.......
就這樣,完結左我呢個超白痴既醉酒日,亦都係我整年旅程中醉得最利害既一次!


(就係穿過呢個plaza la……)

好啦! 寫完成篇,根本就係“我飲醉左,抵死!” 6個字兩個標點概括哂! 咁多廢話做乜鬼!
咁唔寫詳細d,讀者又點能夠如親歷其境一樣投入呢~
之但係,有邊個想親歷醉到訓低既環境呢??...........
最後勸大家一句 : 「酒精並不導人向善」,量力而為,記得食左野先飲酒呀!!!!!!!

(小子於啤酒一道仍所知咁淺,以上資料如有錯漏,還望指正,thx!)

=========================================================

補完此blog上未成文的相片和無聊閒事:
My Facebook Page : https://www.facebook.com/Garcia.in.Germany ,多多指教~

沒有留言:

發佈留言