測試1

2014年7月6日星期日

德國working holiday第118章 : 大江南北之阿爾巴尼亞長江三峽

啊啊啊~啊啊啊啊~
如果你同我咁上下年老又睇過TVB旅遊節目“大江南北”既,會見到上面d字有聲的~
做乜提返d咸豐年既野??
睇標題都知啦,我去左一個勁有長江三峽feel既地方!
所以低能如我就邊遊哼著呢首主題曲邊在乎山水之間也~
而呢個Komani Lake亦係我上一章講特登走嚟Shkodra的主要目的,咁究竟我特登改行程改得抵唔抵呢???(呢種反問法intro真係好無聊,一d引起動機作用都無law......)

前一日係hostel報tour時話第朝07:30落到嚟就得,唔使報名,於是我今日一早07:15就落到去,但到07:25都係鬼影都無隻!
無理由得我一個去ga.........心血來潮走出門口,終於見到hostel女主人,一問之下佢嚇一跳“吓你都去Komani Lake ga!?”立刻就打電話叫返岩岩出發既私家車返嚟.......
我一臉=_=樣.........好彩je.......如果miss左咪on居100%.......呢度d人真係好信唔過...........
Anyway啦.......約兩個半小時既遊完個高山遊完個谷,終於到達Komani Lake!



根據Lonely Planet所寫,要遊呢條河(雖然叫Lake但明顯係河啦!)只可以坐當地居民的貨運船,狹窄且坐位不多
但我到達時,發現已有營運此河道旅遊的專門公司,船隻亦明顯變為觀光用,而車我地嚟既原來都係此公司,此地是沒有任何公共交通工具可到的
所以,反悔無用,腳已叉半隻,唯有乖乖地去counter放低25€上船啦!
如果閣下係自駕遊或有隨意門直到碼頭,boat trip則只需15€,但唔太建議渣車,嚟果條單線山路真係有d恐怖.......


(我地隻船)

(當地居民船,Lonely Planet應該係講呢架)


開船啦~
一如碼頭所見,河道兩邊被連綿不斷的高山包圍,彷彿是河水把群山劈成兩半,然而卻不是斷層式峽谷型,旁邊的山峰都是平斜向上為多
感覺就好似幼稚園時的風景畫咁“中間一條河,旁邊兩座山”,天地只有山和水,眼裡只有藍綠白三色
除了偶爾的飛鳥盤旋,四周沒有一絲的動態,連獸走蟲鳴,飛瀑流泉也沒有,是最原始、最純樸的山水風光


(幼稚園風景畫概念圖)


正因為佢純樸真係乜都無,所以就引起另一個問題啦
1st hour : wa山峰又高,水又涼,正呀!
2nd hour: wa山呀水呀!
3rd hour : 又係山呀......水呀...........
4th hour : 仲係山呀..................水呀............
5th hour : 山水放題呀......Zzzzzzzzzz................
連續咁多個鐘都係同一樣既風景完全無改變!!!幾靚都悶死啦!!!
到後期已經係訓到天昏地暗不知人間何世!儘管外面仍是陽光普照晴空萬里!
到訓到不能再訓時,就弄兒為樂,玩殘坐前面好奇心旺盛的可愛BB女~



好不容易到左河的盡頭地點Fierze
不少遊客會以此為起點開始行山或mountain bike去唔知邊度,睇落有d吸引,但明顯係要有detail plan而不能即興行事啦!
於是係Fierze行一個圈,講真,話此處係條村莊都誇張左,充其量只是有數間房屋士多集合埋一齊而已........
唯一的食肆在油站二樓,無menu,只有肉、沙律同麵包以供選擇
肉就只係煎兩塊細豬扒比你,沙律就一兜菜,麵包就齋包
我要肉+包+汽水,咁就收我港幣80蚊,好過去搶!
但一離開條河天氣就熱到雞蛋都熟,唔食野飲汽水唔得.......係wor我做乜唔去士多買雞蛋呢????



好快一小時後又上返船回程啦~
..................原路返去!???唔係掛!!!!又悶多5個鐘!!?????
無辦法..........硬食.........我唯有繼續做隻食完就訓既死肥豬.............



幸好回程時隻船快左,而且到第8小時兜左入去一條叫Shala River既分支,並於一沙石灘旁停低游水~
呢條river根據船員講係一條“洗罪之河”,落去游返轉就能重生做個好人!
不過如果樣衰係一種罪的話,相信我既罪孽水洗都唔清~算吧啦~
d水清都透兼凍到嘔,都係浸下腳片下石relax下好啦~



呆望埋最後一個鐘的Komani Lake山水美景,終於回到起程的碼頭了!
晚上7點幾...........足足係船度坐左9個鐘..............
從未試過遊河遊到咁悶.........但d風景又真係唔錯wor,個感覺真係矛盾到呢........
返歸方面,船公司有轉車送我地返每人既hotel or hostel
而車程途中又睇到個唔錯既日落,um~算係個美滿既完結啦~


(中途有龜攔路,落車影相嚇走佢~)


就係咁,阿爾巴尼亞第一站Shkodra兩日兩夜以Komani Lake作結~
你問靚唔靚,我就一定話靚既 ; 但抵唔抵特登咁花兩日嚟走一轉,我又有d保留!
時間充裕又順路既,不妨一到!呢處我比75分啦~
至於係咪真係咁似大中華長江三峽???
你話呢~我唔知呀~其實我未去過三峽的.........................睇過相覺得似唔比咩~~~~~~~~~

========================================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany ,多多支持呀!~

沒有留言:

發佈留言