測試1

2014年7月12日星期六

德國working holiday第129章 : 馬爾他Day2@Azure Window好鬼死靚呀!!

傳聞馬爾他有3個Blue,首屈一指、幾乎係國家代表風景既“藍窗”Azure Window正是其中一個
一早起身見藍天白雲perfect weather~正!一於狗衝去呢個聞名國際既景點啦!

Azure Window位於馬爾他最北大島Gozo,要去字面上非常容易,只要去到Gozo再坐巴士就得~
但實際上就係,首先要坐巴士去到馬爾他主島最北部的碼頭Cirkewwa Ferry Terminal,由於馬爾他既主要馬路都係單線行車,巴士size細班次疏,呢程車你起碼要做返一粒鐘罐頭沙甸魚!
去到碼頭,如果走船又等返半粒鐘,坐船又要坐半個鐘,落船後首先要坐巴士去到 Gozo中心的Victoria(又名Ir-Rabit Ghawdex),再轉311 or 312號車先可以去到位於Gozo正西岸Dwejra的Azure Window,total盛惠3個鐘


(碼頭已經咁靚)
(到Gozo島la~)

由車站行出海邊只數步之遙,一出到去----------Wa!!!!!!!!!!!!!!!!


儘管事先已睇過資料相片會見到d咩,但望呢個view時真係詫異到掹大口得個窿!
使唔使壯觀成咁呀!!??
基本上嚟到呢度你只會講兩句說話 -----
「wa!!!唔使咁靚呀!!??」
「X!唔x使咁靚呀!!??」
呢一年來我睇過唔少石灰岩+藍色海洋既美景,但仍以此處最為壯闊,最為氣勢宏大!
海面上波瀾起伏,浪濤層疊層不停打向岸邊,形成近岸處滑不溜腳
如果行近d一個唔該跌落去,得ga啦~魂斗羅30條命無限loop死左都未上得返岸!
所以都係搵個高點影下相才是上策!
反正唔使跳海,係個咁架勢既風景前個個都natural high ga la~

(我比部機人地幫我影,但佢用左嚟影自己個fd......)



面向海的左手邊為另一著名天然景點Fungus Rock
傳說幾百年前,當地人相信此石上的植物貌似男性最重要既器官,以為佢有壯陽之效拍得住印度神油,於是政府私有化佢,仲派軍隊守護唔亂咁比人採集,所以此可另有名稱叫「將軍岩」,而此植物亦都變為重要藥材甚至外交禮物(外交禮物送壯陽藥?????),當然,係現代科學check過後,當然係乜藥效都無啦!
呢舊海中孤石基本上只有三種人上到去 : 1.識飛,2.可以跳200米遠+10米高度,3.報海上tour再full gear爬上去
但睇住呢個我望耐d都會暈既超級大浪灣,我慶幸無報到坐船既tour,否則成個胃應該會嘔埋出嚟
從岸尖遠望啦~不過如果有航拍,呢舊石+海岸+Azure Window一野影哂,應該靚到絕!
我有老友就係睇完張咁既postcard就決定來此honeymoon!
不過,認真,如果對鞋冼or行石技巧唔好,唔建議走到這個最左邊的岸尖,浪大風大,真係好易跌落海的,小心!

(呢條路係真係好危險的)
(係度見到結晶鹽,即係海水真係會撲到上嚟la......)



係時候享受戲玉啦!
Azure Window好明顯就係浪濤+海風侵食所形成的奇景!
而事實上此處既浪都比其他地方更大,所以岸上的凹凸石灰岩亦更多更奇
巨浪拍上嚟,海水穿過各尖石坑洞,做成一個個白頭小瀑布
「嘭!!!!!........沙.............嘭!!!!!........沙..............」
唉我形容得都係衰ga啦,都係睇相啦~

(呢張相我主要影靚女的~)
(使唔使咁大浪...........)

為左保護景點,Window頂其實係封左唔比上去的
只不過好明顯就無人理過呢回事啦,只有一兩條鐵線加個爛鬼告示牌做阻擋,我都好懷疑當局保護佢既決心........
Anyway,有口話人,我都係做左其中一個破壞者ge~~~無理由唔上呀!!??
我曾經有一刻諗過坐正係個「窗口」之上,好似好爽咁!
不過上到去就發現...........喂根本就睇唔到個窗口係邊!!!!上面塊地好闊好硬ga!行過左都唔知呀!!!
如果要知正確位置,除非下面岸邊有人指點,否則就要伸個頭出去,前者我一支公旅行做唔到,後者應該會變成無繩式笨豬跳,仲係一跳以後都上唔返嚟果隻
坐就坐唔到,只不過一覽眾山小,窗頂為左近最高之處,望返落去個view,又係無得輸

(上緊去隻窗~)

(窗上向下望的風景~)

(我幫佢影相的意大利人~其實我唔好意思開口想同佢女友影相......super hot ar!!!)

除左Azure Window同Fungus Rock,此地仲有一個著名景點Inland Sea
顧名思義,呢度係一個石灰岩山中內海,因有水道通向大海所以此處係有潮汐的,而且浪無咁大,係非常正既游泳熱點~只不過有點可惜水係淺綠色而非外面的深深蔚藍
又係果句,一支公無人看passport落水不能,飲下野浸下腳食下薯條睇下比堅尼hea下算~

(呢張我都係影靚女的~)

Azure Window主要景點係呢幾個,其實Gozo島仲有好多其他靚景未發掘!
只不過公共交通真係慢,返去Sliema又要兩三個鐘.........好似都係自駕遊好d
而因為要趕車,我錯過左Azure Window的日落(Honeymoon朋友同我講超級靚!),只好係碼頭邊睇返啦


晚上回到Sliema唔知食乜,都係去返尋晚既Bar restaurant “Salisbury Arms”
一來平二來好味三來有波睇,尋晚個burger及焗蘑菇已經超好味,今日個4 cheese spaghetti更係正到暈!
推薦~~~


馬爾他Day 2就到呢度~我真係越來越鐘意呢個地方!
而今日既Azure Window亦係我去過其中一個最靚既地方!
應該唔知邊一日就會斷開跌落嚟,要去好快d啦!

=========================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany ,多多支持呀!~

沒有留言:

發佈留言