測試1

2014年7月15日星期二

德國working holiday第133章 : 要買手信嗎??

距離我返香港時間仲有3日,一個好大既問題困擾緊我 ------ 買唔買手信呢?
曾係英國 倫敦篇 劍橋篇 出場既好友阿路表示 : 「傻ga咩!Working holiday仲要人買手信!」(原句 : 「x你咩~Working Holiday仲要人買手信,無x野ar~」)
無錯,背包客去旅行唔係為行街買野,唔好話銀兩有限呀,個背囊根本就無咁多空位!
但係,係呢一年之內,真係有好多朋友實質上加心靈上支持過我,剩係whatsapp同我解悶聽我呻都緊要啦!
除左明信片,有時間點都應該買返d野比佢地,古語有云 :「 留低ge,都係一份心意! 」
剩低既呢3日,就等我解放自己壓抑左一年既購物慾,盡情shopping la~~~(但都唔係買比自己.....)

買手信絕對係一份藝術
果樣野又要對方鐘意,其次係合乎身份,第三就要有地區代表性
如果就咁買d普通公仔匙扣實在太流啦!!!我諗各位讀者都已經起碼一打係屋企,多到串哂落鑰匙變囉你命三千!
當然對方特別鐘意某種公仔又另計,for example送比著名國際關係學者沈旭暉教授ge話,識得一定係送Hello Kitty!(擺左你上枱,對唔住呀教授!~)


(先此聲名,呢幾個都係我覺得超鐘意既公仔匙扣,絕對唔普通!~)


如果你問我德國買咩返嚟,最好梗係囉廿隻燒豬手啦!香港最好食果間都唔及HB一半level呀!
不過囉到返嚟唔好食,所以我嘗試放入個胃度-----ee消化左wor!啊~咁放棄啦~
其實以個人習慣嚟講,我每份手信都係Tailor buy的,真係針對果個老友喜好個性風格嚟買~
例如大學班飲酒兄弟8條友一人一個巴伐利亞rock杯,型格fashion同大方優雅既美女朋友們就有印有閃閃Malta字樣的小手鐲


(其實我唔知生肉入唔入得境,所以放棄左)


有部份完全不客氣,拍心口搭膊頭既老友會主動話想要乜野~
我覺得咁樣仲好,件野一定岩心水,我有時間實幫你買!
「Lagavulin 16年呀唔該~」
咩話.............
「威士忌ar~~」
我知...........艾雷島名牌之一嗎........但點解要買支香港都有得買既酒.........
「外國買平好多ga!」
拜託我既呢對酒鬼夫婦我平時都飲佢地唔少珍藏,投桃報李點都要~
柏林位於U2 Senefelderplatz同U2 Eberswalderstrasse的東邊(Knaackstraße 70, 10435, Berlin, Germany)有一間名為Berlvin Whisky store的威士忌專買店
歐洲各國及日本whisky齊全之餘,價格仲比機場免稅店為平!
寫呢篇時睇返d相,果陣無為意,原來連而家日本斷貨既山崎18年及白州18年都有!!!!
Lagavulin 16年咁common當然易買,咁作為威士忌愛好者既小弟無理由唔買支自用ga~~~~~~
正想買德國出產既Black Forrest時,竟然比我發現愛丁堡個bar tender推介既Kilchoman!仲要係3rd Limited Edition!
果陣bar tender叫我見到就好買啦,係蘇格蘭本地都唔易買到!
雖然貴左d d,但我知香港會仲貴或未必買到,所以都係照扑搥!
而味道~鐘意泥煤煙燻重口味既我,完全無失望!正到暈呀!!!!!!
(後來先知香港要搵都搵到,都只係貴約4,500蚊............唔好奇怪我用“只係”!朋友果支Lagavulin 16德國比香港平成7舊水呀!)


(話哂都歐洲,當時日本威士忌比香港貴都正常,但而家已睇齊了......)

(德國本土whisky,到而家都未飲過)

(最終戰利品)

(呢個咪愛丁堡既靚仔bar tender~愛丁堡篇出現過ga呢~哎呀sorry原來當時唔記得落相,而家補返~
第八十六章 : 係愛丁堡唔去愛丁堡究竟做乜好 )
 photo DSC_0560_zps9p5nvpv2.jpg
(我係德國最愛既啤酒,帶唔到咁多返香港ar.......)

如果無乜特別心水既,運動系列都係一個唔錯選擇!
只係足球球衣球鞋頸巾胸圍內衣都夠你掃一輪!慕尼黑既拜仁慕尼黑專門店絕對係fans既潮聖地!
如果想隆重d,仲可以係底褲上用箱頭筆劃隻龜扮係湯馬士梅拿親筆簽名!
就算唔係粉絲,佢地某d產品都非常精緻,我就買左個慕尼黑1860 Logo既鑰匙型開瓶器比阿哥
另外,Giga Sport等4-5層樓高既大型運動用品店,都總會比你搵到岩心水既物品送比酷愛運動的身邊人~

(給喜歡行山既父親西班牙製豬腰水袋)

(由於搵唔返拜仁慕尼黑專門店張相,用當年係安聯主場外的紀念品店頂住先!)

當然啦,唔可能份份都度身訂造,總會有d普通朋友職場同事三姑六婆等等要你送乜送乜
呢個時候,最簡單既選擇,絕對係超市食品!
一來平,二來地道,三來購買方便
一班同事,兩包熊仔糖攪掂!正野嚟ga德國特產~
個人化既,買d地道醬汁調味料,例如英國好hit既Curry Mango sauce或意大利青醬都係香港少見
又或者唔好煩!一野掃一堆朱古力返去實無死!
我自己就買左十幾包德國原產特別版Ritter Sport返香港!又好味又夠特別~
之不過返香港兩個月後我發現堆滿大陸人既“價x棧”都有得賣,仲要一樣價錢!!!!!!
早知去慕尼黑買Milka啦!!!!! (第七章 : 食朱古力係會肥ga! )
早知去“價真x”買完扮手信啦!!!!!!!!


(香港買到既多數係普通版,但仍然都係超好味!)

(亦有幾乎我部10寸平版咁大ge ver.)


如果係某d重要既特別人物 -------- 嗱我唔講邊d!大家心照啦~除非對方有特別要求,否則我都會用心思代替金錢。
講到心思,不外乎就係「花時間」同「懶特別」~
一件事如果你肯花長時間去完成,其實都會變得好藝術~
舉例說,「我係外國呢一年,每一日諗起妳都會儲一粒糖,而家有365粒,代表對妳365日的甜蜜思念..............」
waaaaaaaaaaaaa!!!!娘到想作嘔呀!!!!!!!!!!!
又例如,「我每去一個國家,都會拾一舊石頭,儲埋一次過送比妳~」
咁我咪要拾廿幾舊石?唔好話背囊多10kg,拾咁多用嚟起沙灘咩!(呢個我真係聽人講過想咁做.......)
其實d idea唔係唔好,adjust下會正好多!至少我會做d能力範圍做得到既事先~
我的確有拾一兩舊石,但會係特別既海邊同石質先好拾,仲記得附上相片,令對方囉住呢舊硬掘掘冷冰冰既石頭時都可感受到那美景的風情
又或者一樽沙、一塊葉、一支乾花,甚至齊集所有地方的郵票,都會係一份令人驚喜的小禮物。


(丹麥篇出現過最靚既山水風景Mon Klint,d石咁靚點可以唔囉~ 第八十一章 : 丹麥小島遊3站Mons Klint )


萬一以上所有野都唔岩心水,強烈建議到街市、市集或百貨公司選購,我相信點都會比機場的記念品店來得有真實
不過,講開又講,我有d朋友想要既野都幾古怪
例如我有朋友指名要德國平成倍既孖人牌廚具,大佬我點孭隻鑊返嚟比你呀!以前係公司仲孭唔夠咩~
終於我只係買左把生果刀套裝返嚟,不過係送比我娘親,個fd食蕉去吧~



另外大半年前同某位探我既朋友閒逛柏林時,我一句口痕「要唔要入sex shop買手信ar~」點知佢真係入去買左條皮鞭!!!!
「呢度好抵呀!平時成千銀ga!」成千銀................果條虎鞭嚟ga?.........但點解妳又會知「平時」係幾錢.......
我唔想知落去.......總知見佢買到心頭好開心就得啦............



手信呢家野千變萬化,我都係借分享為名記錄下我買左d乜鬼野返香港je~
臨走前呢兩日我就係咁東奔西走狗向西奔走買野買野同買野,終於來時空盪盪既29寸大喼變成實掘掘既巨石, 仲要兩支酒因為入境限制,有一支已經拜託好友C小姐帶返香港啦wor! 連搬慣行李既德國巴士肌肉司機都囉唔起ar!
最終要開埋我個旅行背囊再扔一堆舊衫先上到機...........



我知大家睇完d成篇個focus一定去左條皮鞭度!
利益申報 : 我既朋友絕對唔係我,因為我根本就囉唔到返屋企!
事關本人家庭一向有旅行完回家一齊開喼睇手信既習慣 --------------
「阿仔,做乜你會有條咁既野ge???」「虎鞭嚟ga,燉左佢呀」
水洗都唔清呀..................................


(其實無問題呀,睇下安室奈美惠幾型!)

=======================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany ,多多支持呀!~

沒有留言:

發佈留言