測試1

2014年7月18日星期五

德國working holiday第135章 : 起點與終點,慕尼黑

我是一個喜歡以開始地點作終點的人,我的工作假期起始於慕尼黑,離開時亦希望以慕尼黑作結
18/7,平常在巴士中訓到昏迷一樣的我竟會睡得不好,中途醒了無限次
早上6點巴士到達慕尼黑Hackerbrucke的中央巴士車站,雖是炎夏但早晨空氣仍是非常清涼
落車第一件事除左去洗手間,當然係去慕尼黑中央車站Munich HBF既locker放低個喼先啦
黃昏近晚先上機,無理由全日拖住個喼周圍走呀....
更重要既係,我個喼重到連岩岩幫客囉慣行李既大巴司機都x左一聲差d囉唔起!睇嚟一陣去到機場要攪攪佢.........

講開慕尼黑HBF,應該係成個德國旅程都start from here
記得第一日嚟到德國,由慕尼黑機場直接坐火車嚟到HBF,大鄉里既我從來無諗過堂堂大站會無出口街道指示!連exit都無分別ABCDE!
仲要成個地下城都係裝修工程中,由S bahn,U bahn仲有Tram同跨境火車既指示攪到我完全頭昏腦脹,明明出左地面轉個彎就係hostel,但都會兜來兜去都兜唔到,一人一喼好似謝師宴毒男面咁企係街上徬徨,唔係有好心德國情侶幫手google map及主動帶路真係有排攪,而呢件都係到埗後的第一件窩心事。。。。。。。
之後幾日,就一直圍住呢個中央車站周圍探索......開始知道Yormas有平食,地鐵售票機點用,站內食物會比街外貴,地下城中層士多星期日都會開............
而家?
坐咩車、點行點走去邊個出口、邊條路最近目的地、車站邊個角落咩地方有d咩賣,我諗都唔使諗就直接標左過去啦!就嚟合埋眼都識行!
而今次返嚟,地下城的裝修亦已完成,睇住呢種一年前後的改變,微笑之外,不知為何亦帶著嘆息
就好似中學畢業時回想在操場課室的種種往事,也許都是一種成長吧


(在慕尼黑市中心的第一眼,就是此)


回憶還回憶,其實當時仍然係晨咁早,我成個人仍然係迷迷糊糊的
想食個早餐,但真係乜鬼都未開門........又或者話我唔想食麵包je
行多兩個圈,唔得,昏慾大過食慾,於是去返我到埗時既第一間住宿Euro Youth Hostel,係佢個公眾大廳度扮哂等check in咁坐底.....坐下......坐呀.......訓著左!仲要成粒鐘!
不過,都全靠咁訓一訓,咁先有力活動落去!如果唔係我真心驚自己暈左係街.......
後來聽聞Euro Youth而家已經唔比非住客胡亂入內,um...........唔通就係因為我攪到咁?(汗)


(當年到埗時的光景,10號床,我仲記得張床褥軟到訓唔到)

訓醒之後,繼續臨別前的走走逛逛~
走到Karlsplatz的地底商場,買返個久違了的芝士牛角酥邊走邊吃......再到考芬格大街Kaufingerstarrse買埋手信比屋企人.....再走到平時成日去hea的谷物市場Viktualienmarkt........
由Karlsplatz到瑪麗茵廣場Marienplatz呢段路,係每個慕尼黑遊客的必經之路,Munich所有最重要的景點都係圍住佢出現
而我第一次行呢段路,竟然係到埗第二晚係樓下hostel bar比個法國仔同廣東女孩飲完酒捉出去夜遊~
好記得我當時仲係有嚴重既初到貴境depress,大家都知我份人又怕羞又內向ga啦,當時幾乎就想搵籍口“我有夜盲症呀”耍走佢地
不過好彩有去,就係呢個夜遊開始驅走我既抑鬱,亦開始懂得搵人求救訴苦發洩下
就係咁先寫到 第五章《鄉愁?竟然有鄉愁?》 出嚟,亦是由此篇開始有d人會睇下我呢個無聊blog,隔住個mon幫我打氣,咁先會一直死唔斷氣寫到而家一百三十幾篇
說來我還要多謝佢地兩個呢~唔知,佢地而家係世界既角落做緊咩呢~


(平靚正麵包店)

(幾乎係慕尼黑最貴的超市)

(谷物市場Viktualienmarkt的肉店)

(谷物市場Viktualienmarkt外的聖神教堂Heilig Geist Kirche,我都係第一次入嚟)


既然我奉行走之前食盡佢既宗旨,唔使講都知我一定會食燒豬手啦!!!
一般嚟講,首選的確係HB,不論味道同氣氛都係一等一,我行過時都差忍唔住衝左入去!
之不過,我同班fd真正食過最好味既唔係HB,而係位於Tram 18 or 19 Holzapfelstrasse(近Hackerbrucke)
呢間Augustiner餐廳係啤酒節開幕日夜晚我地既晚餐位,雖然人多個個都只係分到一舊仔,但都一致公認係食過最好食ge燒豬手!
今次我終於可以一人獨佔大快朵頤啦!!!!!!!!!!
半隻豬手已經要9.5€,但深知德國餐廳係價格同份量絕對成正比,果然!半隻已經等於平時既一隻!
皮脆,肉嫩,重要既係真係有濃濃既豬肉香!比起HB燒豬手有更多肉汁!
而且呢間店既內部裝修既十分有氣氛,配埋本店名產、慕尼黑先飲到既no.1 Lager beer Augustiner,真係正到爆燈!
這是我working holiday時在德國真真正正的最後一餐,我,好滿足



飲飽食醉,慢慢散步到HBF
在南出口方向,再次見到那一間土耳其肉卷店,haha我到埗第一晚既晚餐就係度解決ga la
記得當時我個人烚下烚下,見慕尼黑樣樣野都咁貴唔捨得食,得呢間kebab有4€一卷野算係平,就你啦
入到去間店,同店員你眼望我眼,我d英文唔掂佢d英文又唔掂,雞同鴨講先叫左個chicken kebab
佢問我“here or take away?”,我答“here”,佢隨手就囉起隻碟再攤開隻手“Give me 2 more euro!”,我即刻嚇到鼻哥窿都無肉!堂食貴廿蚊港幣!?你無野呀!
指手劃腳拒絕一輪,佢先話“今次算啦~下次要ga la~”,我舒一口氣,囉住隻載住肉卷既碟出街外座位靜靜地吃
而家係德國生活左咁耐,諗返就知道果2€其實係隻碟既deposit,佢驚你老笠左隻碟去,其實德國收deposit都係幾common既事,特別係酒杯,之不過果時大鄉里je~
而呢間kebab店都唔係有咩咁特別,但我總係有種情意結,好似特別好食咁......haha回憶就是最佳的調味料吧
另外前一點轉角位的大件pizza店幾乎係每個慕尼黑working holiday人必食過的!
2.5€一大塊抵食夠飽肚!不過短短一年已加到3.5€,已無任何再吃的理由了



要走的,終需要走
下晝3點半,囉返行李,在慕尼黑中央火車站乘坐1小時機場鐵路,到達慕尼黑國際機場
扔掉陪伴我渡過這一年的舊衣服,拿過機票,托運完剛好不會過重的巨喼,就靜靜坐於入閘後的候機大堂,打開平板電腦,的的答答的打出離開前的感受
晚上18:50,我步上前往中轉站芬蘭赫爾辛基的航班
再見啦德國,多謝呢近一年來妳帶給我的所有東西
下次返嚟,希望我會有一個全新的我再來見妳吧


下一章,將會係德國working holiday的最後一篇文章。
希望各位朋友,會支持到我最後,多謝你地

==================

補完此Blog上未成文的相片和無聊閒事:
My Facebook Page : www.facebook.com/Garcia.in.Germany

沒有留言:

發佈留言