測試1

2016年12月26日星期一

歐洲隨筆008 - 喚起聖誕的葡萄酒

Gluhwein (音cool wine)中文譯做香料酒,一般都係將玉桂丁香等辛香料放入葡萄酒中慢火煮熱而成,煮的過程中會散發濃郁的甘甜香氣,有趣的是這種香氣好像天生就能令你聯想起溫馨浪漫的聖誕節 ---- 就算你只係第一次嗅到亦一定會有同樣感覺!

2016年10月17日星期一

歐洲隨筆007 - 土耳其烤肉卷

係歐洲生活,無食過土耳其烤肉卷döner kebap既人就同無睇過AV既男人一樣,唔係無,但100個都未必搵到1個
特別係德國,肉卷店就好似香港既茶餐廳,每街每巷不論大小社區都總有一間係左近,就算係李嘉誠,我都唔信佢無食過茶記啦~
幻想下, 一大束烤得啪啪聲的大肉卷(好似用錯擬聲詞),散發微微焦香後立刻被新鮮割下,配上各種新鮮蔬菜及乳酪蒜香醬汁,被一大塊燙熱薄餅包成長長一條,一啖咬下,肉的鮮美、蔬菜的爽脆、醬汁的香濃, 所有滋味一次過從口裡爆發而出!........
ee點解我寫寫下張抬濕哂ge?
Anyway~再加上係歐洲呢種肉卷都實在係平,連物價甚高的維也納都只係3€左右,最平見過應該係布達佩斯$18港紙唔使 (列支敦士登10€…………)
再再加上一卷野有肉有菜心理上好健康兼夠飽兼方便快手,in additions大多店都會開到深夜,所以深受我地呢種周圍走背包客同working holiday人既喜愛



2016年7月21日星期四

歐洲隨筆006 - 路不同,各自遠走

早前美女好友結婚,我被安排坐係大學year1同伴的那一圍
全圍都係當年宿生會既成員(即俗稱既Hall莊) ,佢地係一班超級攪笑同痴線既人,由說話到行為,總之好玩既就去做,癲得嚟又有型格,有點似外國果班jackass,不過破壞性無咁強only. 總之同佢地一齊就總會有爆笑事發生啦!
由於Year1-2時我常做helper,所以有一段時間都同佢地都頗為熟稔
不過可能人夾人,可能係讀既科目唔同,亦可能係我份人太串,唔理咩原因,總之我同大家就點都變唔到極close的朋友
到year3我搬左去另一個宿舍後,就更加越來越疏遠了
畢業到而家7年來,今晚都係第一次同佢地一班人再聚於同一場合

2016年5月31日星期二

歐洲隨筆005 - 卑鄙無恥的免費廁所全攻略

以下部份內容技巧涉及賤格行為,非到危急存亡的爆發臨界點絕不建議使用。

========================

前排見到有網友出左篇文教人歐洲邊度搵廁所,一時感觸,回想起當年係歐洲搵廁所既辛酸,忍唔住手痕又寫篇廢野
鬼咩,歐洲大部份國家去洗手間都要收費的,德國就50 cents起跳,當年既匯率即係盛惠5蚊大餅一個,係香港既話即係我5蚊買盒維也奶後要再用5蚊排返出lai!貴到喊呀!
所以我地呢d窮鬼working holiday人,為左慳果幾蚊,有時分分鐘唱足一日忍者小靈精,膀胱脹成個Agnes b袋咁大都唔捨得去釋放自己ga!
但長此落去都唔係辦法,於是大家當然各出奇謀諗諗計,之後就係茶餘飯後交流左一系列免費去洗手間既心得,現公諸同好,希望對其他歐洲窮遊朋友有用啦~
不過而家爆左出lai,d招數以後會唔會唔用得呢……..
(同樣地因為我主要係德國生活,好多例子都以當地為主)



連鎖咖啡店
去得旅行,生理需要呢家野不論大小當然係出門前攪掂左先啦,但如果真係人有三急又唔想使錢,首選一定大型連鎖餐廳、快餐店或者coffee shop,總之係自出自入無隍管形既食店,你都可以靜雞雞扮幫襯地”鼠”入去享用佢地既茅廁

2016年4月30日星期六

歐洲隨筆004 - 手機弔文

早前,陪伴我闖蕩江湖,出生入死左無數次,歐洲期間無日離身的手提電話終於要離我而去
為左永遠懷念呢位戰友,特別寫上弔文一篇,以表哀悼

呢部Sony Xperia V,瓦黑色,長12.9cm,闊6.5cm,重120克,1,300萬像素,係我出發前係豐x以相等於孟母既價錢購入
當時已經係兩個generation前既舊款,但貪佢又平又細又防水,最重要係萬一touch wood比人偷左、老笠左,或者中左鴛鴦乾坤扭紋鎖,扑爛左都唔肉赤嗎
至於我當時既手機Fujitsu T-01D,係 第二章 都講過一分鐘無1%電,都係算吧啦

2016年4月28日星期四

歐洲隨筆003 - 德國人少見多怪的煮食習慣(下)

上篇講左好多食物,今次講下煮食方式呀
德國人,或者西方人煮飯有種特點,就係一件事有一種工具
倒意粉水要用金屬筲箕,撈起意粉要用指爪型湯羹,鬆肉要用肉鎚,切香蕉一種刀,切蘋果一種刀,切肉一種肉,劈肉一種刀,劈友又一種刀.......一個廚房幾廿萬種工具
「將呢塊野放係煲面,d意粉水就唔會滾瀉!真係一個超勁既發明!」德國成長的波蘭籍房東興致勃勃向我介紹果塊綠帽狀既軟膠時,我心裡都湧起左一舊硬膠........煲蓋唔蓋實咪得law.......
總之觀察所得,佢地無左果樣工具就做唔到果件事
所以係hostel,好多鬼仔都驚訝點解我一對筷子可以做哂煎扒炒蛋煮意粉
有幾奇,一種工具幾廿萬種用途一向係亞洲人既強項!
古有揸住支竹揭竿起義,近代有BBQ爐土法煉鋼,仲有保鮮紙、茄子、青瓜等等等等既另類用法,幾咁博大精深!
唔係話鬼佬分咁多野用係蠢,只係西方係博而專,東方係專而博,係思考方式不同.......ee呢個似乎牽涉到中西文化差異研究了,在下所知皮毛而已,唔講啦~


(好彩自細訓練筷子功有返咁上下!)

(蛋都係筷子炒出嚟~)

2016年4月26日星期二

歐洲隨筆002 - 德國人少見多怪的飲食習慣(上)

一講食德國野,個腦9彈出豬手香腸加啤酒絕對係自然反應!加上近期TVB上張秀文係慕尼黑食豬手食得咁開心,d印象更深tim la
更曾經有一個講世界各地早餐既youtube短片,話德國人早餐都係食香腸,感覺好似日耳曼係個暴龍近親既民族齋食肉!
但大家有無發現,其實德國街上所見既肥人真係唔多,至少目測都比英美少好幾倍!
究竟點做到ga??真係食肉減肥法咁爽?

2016年4月20日星期三

歐洲隨筆001 - 工作的意義

「小鋒,你覺得這裡的衣服怎麼樣?」
這是我係德國的第一份長工------服裝店助理,返工一星期後的某一天,我阿head無呢啦間彈句咁既野出嚟
我第一個反應係 : 小乜鬼鋒,我好似大過妳ga wor......雖明知大陸人鐘意叫小乜小乜,但總係怪怪地,如果我姓李咪好唔得閒........算唔理
第二個反應係佢咩居心呢?唔通想試我,再同大老闆打小報告?wei我嚟part-time ja wor,最多咪返3個月,應該唔需要咁做........

一瞬間未諗到佢想點,保險為上,即刻chok個人畜無害既烚熟狗頭出嚟先隨意咁講 :「還可以呀」
「別說這些,你老實覺得,這兒的衣服美嗎?」這位移居德國多年的年輕媽媽加強語氣追唔住唔放

2016年3月20日星期日

日本紀伊半島Day10.2 - 南蛮亭,全部都係雞的最強小店

一般小說既尾聲都會係最高潮所在!
可惜妳而家睇緊既只係一個無謂人所寫既無聊遊記~所以係同無樓一樣係無高潮ge!
而呢10日之旅既最後一站,sorry,都係食!
記得4年前阿哥話帶我lai日本食烤雞串時,我嗤之以鼻
因為係我印象中,烤雞串係日式放題裡一pat厚厚既甜醬”漿”住一團烚熟鞋肉既恐怖食品,完全唔明點解會有人鐘意食
點知係南蛮亭食完後,方知香港果知連S都不如! 雞肉料理原來係可以好食到咁!
由於實在太好食啦! 唔食過我真係唔忍心離開大阪! (雖然根本就唔想走)
所以儘管只有一個多小時的空餘,都要即刻走lai難波高島屋對面條巷仔,搵返呢間亳不起眼的燒鳥店,再嘗那震撼人心的美味!


(放張12年既相先~)
南亭

你可能會覺得我個intro有無咁浮誇呀?
但我想講,當我17:15到達呢間5點正開門的小店時,間野已經full house左兼門口已經坐左一大排寒風中等緊位的日本人! 而呢間店係大約有1/3個籃球場咁大ga!
名店je,都唔使咁誇張ar!?
根據經驗所得,一間食肆門口多人等位不外乎3個原因 :
1. 新屎坑
2. 好Q好食
3. 追債
以一間開於市中心地段屹立多年,仍有咁多本地人在寒冷街頭排隊既食肆,我都幾肯定係第3點無誤!
唔好輸賠! 點都排埋一份!


 photo 2722 - P3203519.jpg

點知唔夠10秒鐘,店員知道我係一支公,就捉左我去後鋪唯一一個bar台角落位坐低
我想講,個位真係好迫好迫好迫……..仲迫過繁忙時段既澳牛ar…….
只不過有得食已經好好了,而且坐bar台可以睇住師傅專注力100%咁精心燒烤,只係個feel都已經夠哂滿足~
同埋,我真係無見過會同時間有3個師傅係度燒野食……呢間店會否真係忙得太過份ar…….



問店員囉英文menu,佢反問我係唔係要中文menu,一時口快話好,佢就比左份簡體字既我,而自始佢既神態就好似多左一份輕視……希望只係我多心啦
聽阿哥講,以前呢度既老闆好鐘意請中港台留學生做part-time,理論上就唔會太有歧視的
不過,以前迪士尼樂園條街夠唔會有便便出現啦,10年前香港人都好鐘意去菲律賓玩ga
世事既野,好難講ge


(網絡圖片)

留意下個menu,無睇錯,係有3款生食ga!
呢個都係南蛮亭既名物-----雞胸肉刺身、生雞脾肉同雞腎刺身
無好話點解雞內臟都有生食咁恐怖,日本人整刺身有幾咁奇? 牛舌刺身都有啦,生勾勾同隻牛打茄輪wor!
同埋如果要搵一個地方可以令你放心試食新奇古怪既,我相信全世界只有日本
頭尾兩樣我上次食過,雞胸肉刺身似食濃味帆立貝,雞腎刺身則滑而爽脆,同樣非常不俗!
今次我就試左生雞脾肉,估唔到上菜竟然係”半生雞脾肉沙律”!?
雞脾肉以灸燒帶出輕微的雞油焦香,粉紅色的中央仍是鮮甜彈牙,配以沙律菜、海帶絲、白蘿蔔蓉、炸蒜片、生洋蔥及大量青蔥花,最後以檸檬汁作整合調和
吃下時輕盈香脆,雞肉嫩滑,各種香味係口內大爆發,正呀!!!!!!
不過呢個沙律有一個好嚴重既問題----------
大佬頭盤lai je,使唔使Ruby Tuesday咁大兜ar! 食完我飽左一半,點食其他野ar???



三國志記載,姜維被殺後,士兵「剖其腹,其膽大如斗」
而我唔知日本d雞同姜維有乜關係,可能同我而家講既野一樣都係無關係,但點解個串燒雞肝可以大到成粒荔枝咁,仲要軟嫩到好似綢緞一樣,完全無渣的!
係香港,最高級的日式串燒店都未必做到ar!



主角鎮店之寶-------汁燒雞串
上文都講過,香港既燒雞串只係一pat醬汁肉,而呢度,係真係有雞ga!!!!!!!!
……………………
有咩咁值得驚訝呢……….燒雞有雞同西多士有屎一樣有幾大不了ar……..
但令人回甘既醬汁,與蔥香雞香合而為一,果種滋味真係一世難忘!
對比起香港放題店既急凍甜醬肉,就好似平時電視睇開陳偉霆反白眼覺得好正常,有一日轉台見到湯漢斯嗌Wilson先知呢個世界咩叫好演技!!!
雖然一碟成300幾yen好似好貴,但每串都係兩隻手指厚,過15cm長的足料大烤肉! 仲要足足3串咁多!
細食既女士可以一碟已經ko! 再考慮埋質素,簡直係超值tim la!



食完上面3碟基本上已經飽哂,不過我唔記得我仲叫左炸雞………仲要我原本係想叫”南蠻炸雞”而叫錯左”唐揚雞”……..
Anyway,係差左個南蠻沙律醬je,分別都唔算大,之不過,可唔可以唔好咁大碟ar!!!?????
我見到有6個兵乓波係碟上面呀!!!
但果陣炸雞獨有既油香又令人食指大動……..唉都係食一兩舊啦
有時,真係好邪門,一入豪門深似海,最後我食哂6舊,個胃比兵乓炸雞炸爆左………
喂! 外外脆內軟就梗局ga啦,但D肉汁趵突泉咁標出嚟就實在太過份啦!!!



就係咁樣,我食到懷疑會超重上唔到機,連啤酒埋單大約3000yen
睇落唔平,不過唔好忘記得呢度幾乎係二人份量來的!
講真呀我係呢個blog都介紹過唔少日本小店,每間都各有特色,但以食肉計,呢間既味道真係最強中的最強!
同類型的鳥貴族(東京散心Day1.4 – 宵夜篇,鳥貴族280円之今時唔同往日)係好食,但同南蛮亭一泊埋就好似MOS Burger vs BurgeRoom高下立見!
所以結論就係「性價比超高! 嚟大阪一定要食!」

Hey~我寫得呢篇野,都預左我有個咁既結論ga la~
不過岩岩介紹既全部都係雞,如果話我唔係好食雞咁點算呢?
咁其實蕃茄沙律、汁燒洋蔥都係南蛮亭既名菜來的,亦都有烤豬五花肉及烤牛肉出現
但係,邊有人去KFC死都要食吉野家牛肉飯ga??????
更重要既係,你唔食雞既話又做乜要lai呢度ar???????



====================

《南蛮亭》
大阪府大阪市中央区難波4-5-7 プラザレスパル 1F
https://tabelog.com/osaka/A2701/A270202/27010937/
南亭2

================

話咁快,10日既日本紀伊半島之旅至此正式完結~(快你個頭!寫左成年呀豬頭炳!)
呢個Trip係我返新工後既第一個旅行,名乎其實越是期待越是美麗,的確不負所望!
三重縣,和歌山縣,熊野三神社,熊野吉野國立公園的海岸……通通都靚到不得了! 仲試左幾項日本本地人既日常玩樂體驗tim,總算不枉此行~
希望呢個紀伊半島系列會對有興趣去果邊玩既朋友有幫助啦!
好啦~
下篇開始新連載之前,要寫少少責任義務性質既文章先,對我嚟講都係一個新挑戰,因為要係公式同個人風格之間保持平衡係好困難的!
點都好,希望大家會繼續支持呀!!!!!!!



================

My Facebook Page : www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com
請各位繼續多多支持呀!!!!!!!!!!!!!!!

ging
始終都係整唔到Facebook Plugin Page,唯有用photolink頂任先!

日本紀伊半島Day10.1 - 獨欠櫻花的櫻之宮

問10個香港人「香港腳發作點算?」10個都會答妳「用愛x堅啦!」
同樣,問10個大阪人「睇櫻花去邊好?」10個都會答妳「去櫻之宮啦!」
儘管天氣仍然鬼死咁凍預左未開花,不過難得3月來到日本,last day去搏一搏睇下有無一兩棵都好呀!



櫻之宮位於大阪城北面,最方便係由梅田坐JR大阪環狀線,順時針第二站就係櫻之宮,出站向南行就會到達毛馬櫻之宮公園
或者坐JR東西線、學研都市線到大阪城北詰駅出站就係



無碼宇都宮………ar唔係,毛馬櫻之宮公園其實係一個新月狀的河畔公園
冬去春來時份,一棵棵的櫻花爭研鬥麗,沿河岸堆砌出粉紅色的櫻海大道~wa呢個幻想幾咁美好呢~
不過正如古人智慧所示,所有粉紅色的事物都係可遇不可求的
以我既運氣,當然係除左粉紅色幻想外係乜Q都無啦! 應該話只係有光禿禿既樹枝樹幹,或一堆未開的啞色花蕾



咁係咪無野睇呢? 又唔係wor
雖然成個公園都係一堆柴,但我仍然覺得幾靚,而令到佢靚既,係人,係生命力
Wa阿鋒你做乜寫d野變到咁作狀ar??
唉大家誤會了……..我本來就係一個文質彬彬得lai帶點感性,感性得lai又帶d性感的文學人,平時d惡攪同胡言亂語都係扮野ga ja……….
桜之宮公園與其話係景點,不如話係一個本地人的生活加油站
在這裡,有練習跑步的中年人,有牽手散步的老夫婦,有推著BB車的少婦,有帶上耳機看書的學生妹,有在人工沙灘玩閃避球的學生妹,也有一群在自拍歡笑的學生妹,更有………
得啦夠啦!
總之就好似我地放工or食完飯行下觀塘海濱公園咁,係一個休憩放鬆的場所~
只有係呢d地方,先會見到當地人最真實的一面,只係呢一點已經夠我漫步細味了~



當然,天氣好都係好緊要的
於青藍天下漫步公園本就係賞心樂事~
好簡單搵張凳坐下睇下書食個cake,或者同三五知己係樹下吹下水玩下啤牌已經好開心~
相中的girl’s group正玩得不亦樂乎,有一剎那我都想走埋去join識下
靚女朋友~
但一陣就要上機,都係廢事比班靚女纏住走唔甩,唯有慨嘆大家有緣無份啦……(事實係我行過時佢地啤一啤我,我嚇姪左…….)


(點會無啦啦有隻鶴棟左係樹上面ga……..)


櫻之宮公園咁樣行一轉就差不多了~
雖然乜櫻花都無,但仍然係一個非常靚同舒服的休閒勝地~
係大阪想hea的話,不妨lai行個圈呀~
要預備返香港了!
不過走之前,仲有一個地方要去----------------
下回紀伊半島最終回!

================

返到嚟香港第二日,遲我兩日出發既好朋友fb post相「wa大阪既櫻花好靚呀!」
我%^$&^*&*%#$#$#&*^&(^%$^#!$^*&*%^#$................

================
My Facebook Page : www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com
請各位繼續多多支持呀!!!!!!!!!!!!!!!

ging
始終都係整唔到Facebook Plugin Page,唯有用photolink頂任先!