之不過今次竟然係以前教書既舊同事約去夜行鳳凰睇日出!
其實我未行過夜山，於是抱住囉個經驗等第日夜mama可以約女仔上山.......唔係!係為左同一班好同事聚舊，一於試試佢!
2015-11-28，九龍灣放工後飛入東涌都真係遠，去昂平既巴士已收工，唯一方法係call的士，約$170啦
我地既行程係先於昂平既YHA昂平戴維斯青年旅舍BBQ訓一晚，凌晨3，4點先出發由昂平上鳳凰山頂再由伯公坳下山，全程約4-5小時
咁做有個好處，首先由昂平上鳳凰山需時只約個半鐘，路徑亦不算困難，只係要不停上樓梯，傷膝人士要小心 ; 其次係抖夠食夠先上去，對初心者like me既負擔都無咁重～
而當晚我地係hostel BBQ時圍住火爐都凍到入左雪櫃一樣，天文台話氣溫只係10度以下wor，即係山頂接近零度啦!究竟第日新聞會唔會係“數名中年教師鳳凰山上扮雪條”呢？不過，天色非常清朗，月出皎兮，唯欠佼人僚兮，但睇日出應該無死啦掛～
好，凌晨3點，出發!
經過饒公既墨寶既心經簡林，暫未有機會參觀，聽聞氣氛亦不頗不俗，不過黑mama時，似乎恐怖多過莊嚴啦
而行左約廿分鐘已經高過寶蓮寺，大佛好遠好黑影唔到
到中段，基本上已經唔使用電筒，月光已足夠為我地引路
係香港，真係無乜幾可真正feel到真正既月影
身處野草茂盛的荒山野嶺，感受著受月色擁抱的和諧，我不禁想........點解無個小龍女係度同我練玉女心經ga呢？？？
話咁快，個零鐘後已經上到近頂，風勢突然增強極多!
凍到嘔之餘，我都唔知應唔應該慶幸自己肥左又重左，如果唔係被吹落山都有份......
不過，終點到望啦!!!!!
woo!!!!!!終於到啦!!!!
woo!!!!!!people mountain people sea呀!!!!!
點解鳳凰山頂會有咁多人ge!!!!
而最重點係---------明明一直天氣都好好ga，點解日出前會咁鬼大霧ga!!!!!!無事ge無事ge.........好多人都話日出會驅散霧氣，震撼咁隆重登場!而且有d雲霞日出會更靚tim!
好!於是笠好哂歐洲時既冬天裝備，霸定個好位，影住山下美麗既東涌夜景先啦
(山上超級多人，仲有好多中學生)
等呀等.....等呀等.....
ee天開始光啦!!!!!嚟啦!!!!嚟啦!!!!!!!!!
...............
「黎sir，果邊有忽仔紅色既野，你估係唔係日出ar la.....」
「睇怕都係啦阿鋒.........」
....................................................
喂咁就出左ga la!!？？？？唔好再流d!!？？？
我地訓得兩粒鐘咁辛苦爬上到嚟，只係睇到咁既level？？？？回水呀!!!!!!!!!!!
唉嗌回水都無用啦，睇日出真係要講運氣，所以讓戀愛終結都要講運氣
可以同班夾得來既同事一齊企係香港第二高峰都總係開心事～
而天光後亦慢慢現出雲海奇景，都總算係不枉此行啦～
(唔使諗，個亭針都插唔入)
但抵死既係，我地由伯公坳方向開始落山時，行不數步天色竟然極速轉晴!!!
即係整個旅程只有山頂日出最重要果段係天色昏暗bad weather!!好明顯我得罪左日出之神啦!!!!!!!!
我唔理呀!!!!落山呢一段好同我醒醒定定，將d海灣呀芒草呀照到金黃色靚一靚比我影夠佢呀!!!!!
(一落山，日就出了.......明係玩我la.......)
(好鐘意呢張芒草)
(完全金黃色的山坡)
(好鐘意既芒草no.2)
(老老實實，真係扮到富士山wor!)
哼～算佢知驚!
伯公坳落山呢段路真係好鬼靚，將睇唔到日出既不滿掃走哂!
心情變輕鬆，對腳都自然放鬆，於是就一時大意，左右開弓兩隻腳坳哂柴衰收尾!好彩距離終點前只有約10分鐘樓梯，同事們比哂兩支行山杖我蜘蛛咁撐落山，但我當時係有型化地幻想我係咁的-----
就係咁，於早上9點幾落到大嶼山公路結束呢次行程～
講真，睇過既山景，斯洛伐克Zdiar (第十六章) 都算無得彈，但香港既風景真係一d都唔輸（不用懷疑，呢一句我係特登講嚟回帶宣傳的～）
而大鄉里既我，開心大發現伯公坳呢個終點對面馬路原來就係大東山起點，搵日一次過行埋佢呀～～～（痴線，真係咁行ge話，儲定錢call飛行服務隊都得啦!）
(係東涌食個翠華早餐，唔係安慰，係增肥!)
===========================
IG果邊間中會有d和Blog及fb page不一樣的相片和story，大家有興趣既去follow下支持下啦~
=====================================
我既Youtube Channel正式開通啦!!!!
相關篇章 :
- 香港郊遊
《004 - 赤徑與鹹田灣，宛如沙巴的美麗海灣》
《005 - 沙田行去慈雲山，原來超級簡單》
《006 - 大埔三門仔，零難度的全海景輕遠足》
《007 - 西貢大灘郊遊徑，長者行山無問題》
- 發掘香港
《01 - 香港Staycation首選，皇家太平洋酒店住後心得》
================================
- Email : funggarcia@gmail.com
沒有留言:
發佈留言