測試1

2016年3月11日星期五

日本紀伊半島Day1.2 - 坂手島,純屬意外

會嚟坂手島,純粹係一個意外

離開松阪坐短短一個鐘JR,就會到達三重縣另一名城鳥羽,此處以水族館及海女表演聞名
但一支公唔想去水族館,而海女表演說穿了其實就係一班女性潛水員下海捉鮑魚,特登比錢睇班婆婆潛水又好似有d無謂,睇跑步就話有興趣je
縱然鳥羽海濱之風景的確係唔錯,但除此之外就乜都無了,行左1粒鐘左右我已悶到發慌。

(日本d地面好鐘意攪d咁既野,不過都幾靚ge)
(水族館外既郵筒,又幾cute)

唔理啦!鳥羽對出有一堆有人住既島嶼,一於求其上隻船唔理佢去邊啦!!!!!!!!
行到去碼頭囉出銀包時-------等等,都係問問回程船穩d
一輪雞同鴨講後 : “呢首船17:30到對岸,對岸17:45尾班船開返過嚟”
“如果miss左尾班船呢?”
“要陸路返嚟啦”
哦~~~有陸路咁好,睇睇google map先~


都係穿過去左愛知縣再兜返名古屋落返嚟je~我唔係一早book好住宿兼背囊鎖左係JR locker既分分鐘會咁做,但而家明顯就搵嚟玩啦!
好彩check一check先,如果唔係真係游水穿過伊勢灣餵龍蝦.......



好悶呀!!!!!!!!!!!!!!!!!!!!!我唔理呀!!!!!!!!去到另一個碼頭,問過邊個島夜晚7點幾仲有回程船就衝上去!!!
而果個島,就係坂手島


一般係鳥羽就算出島玩,都只會去答志島同菅島,因為比較大同多人聚居,此兩地我都見過有日本旅遊節目介紹,但坂手島真係到上船前一個moment我先係地圖上見到呢3隻字,更不用說做d咩資料搜集先出發啦!
不過,背包旅行,就係咁樣向未知出發先好玩嗎~
(後來google左陣,除左一位中國博客寫過兩句外,我似乎係第一個介紹坂手島既中文blogger......)

(坐船,坐上層係常識吧)

鳥羽港到坂手島只需15分鐘船程,單程220yen
而落船之後我既旅遊路線好簡單-----沿海向右行啦~因為呢個係一座山島,只有近海邊先有平路,地方亦不大,反正有時間就嚟慢慢行啦
行左一陣已經明白,旅遊節目無介紹坂手島是有原因的,因為呢度真係一個乜都無既純淨純樸小漁村
乜都無既意思係連餐廳、商店以至便利店都無,甚至廁所都係得碼頭前既小島詢問處內有兩格可供使用
有ge,只係最純樸既生活基本,就係房屋、學校、消防倉庫........um仲有結婚相談所..........



未知是否日已漸沉,街道上幾乎不見一人,甚至有moment我以為自己係里安納度迪卡比奧迷失於潛行凶間
收皮啦!阿鋒你同迪卡比奧相似既只有樣貌ja!
..............................
唔知呢句出左街後我個fb page既Like數會唔會跌得快過羅志祥呢?
登上防波堤,從略高處俯視坂手港口,在淡黃夕陽下,隱隱透出一種忘憂、閑適之感,
這個小島,絕非有甚麼奇岩怪石、靚人靚景,但我卻非常喜愛
旅行,就係要放鬆和休息吧



如果真係要特別景觀,一直向右沿路走約15分鐘到盡頭的坂手海水浴場應該岩心水
坂手海水浴場係一個人工堆砌出一個圓形缺口的沙灘,但人工得嚟又真係造得幾靚wor,有少少似克羅地亞Hvar果邊個Stiniva海灘的平面(第105章,我又夾硬回帶宣傳啦~)
夏天嚟浸下應該都幾寫意~至於冬天呢..................我既情況係一見到呢個view,WA一聲後即刻縮返埋草叢後!

(就係縮返係度,有草遮一遮好過無)

唔知發生咩事?因為我一行出草叢就好似有十把大排檔牛角扇full power向你狂風暴吹!仲要前面加冰!
我係即刻縮返埋草叢後zip外套囉頸巾戴手襪熱好身先夠膽再出去呀!!!!!
就算出到去,都大風到幾乎吹走我部影緊相既電話!!!連海鷗群起飛後都停頓左係半空,大家可以想像到有幾恐怖!
不宜久留!快手影多兩張渣渣臨走啦!
唉,慢慢enjoy下個view都無機會,真係好可惜ar.........

(班雀全部中哂定身咒)

根據指示牌,山上小學有一觀景台,但一來山路盤旋錯節難搵,二來我今日已經行到謝哂,再無乜心機慢慢探路,放棄了
落返碼頭,到左方睇埋個咸蛋黃跌落山就坐船返鳥羽了



坂手島呢一個完全無預計過既行程,完全無奇妙景觀既小島,卻令原本我覺得無聊透頂的鳥羽之行帶來無窮樂趣
也許讀者睇完後都唔覺呢度有幾咁精彩,可能係我既文筆水皮表達唔到啦,但我真係好鐘意呢個平靜既鄉村漁港
唉攪到我想去埋其他幾個島嚟比較下tim!可惜無時間
Anyway la,如果鐘意鄉下小漁村,此地絕對推薦!

下回繼續

======================================

好多靚靚地相片及無聊小故事的Facebook Page :
My Facebook Page : www.facebook.com/Garcia.in.Germany
Instagram : https://www.instagram.com/fung_garcia/
請多多支持呢~

沒有留言:

發佈留言