測試1

2016年3月12日星期六

日本紀伊半島Day2.1 - 伊勢外宮有d平凡

伊勢神宮對日本人嚟講就好似伊斯蘭教徒既麥加,一生總要嚟一次,係個非常神聖既地方。剩係睇佢正式名稱只係得「神宮」兩隻字就知佢幾駕勢!
所謂行過城隍廟總要求支好籤,嚟到伊勢,無理由唔嚟睇下呢個全日本最強勁既神宮有幾巴閉有幾雄偉ga~
基本上成個伊勢市都係依呢座神宮而建,一出JR直行過條馬路已經係表參道,當然啦今時唔同往日,參道兩旁都變哂商店食肆lu




入宮前食左野先~
除左神宮同龍蝦之外,伊勢最出名既應該都係烏冬
其實小弟對烏冬一向普普通通,但又係果位超熱情hostel staff叫我一定要試下呢間“山田屋”既手打伊勢烏冬,話本地人都經常來食,咁就亂咁叫一碗試試啦
一試之下,又唔錯wor!
烏冬麵有手指尾咁粗,淋滑且彈牙,每一條都有濃濃既麵粉香(係麵粉掛~) ,醬汁濃而不膩剛剛好,配埋青蔥入口,香到不得了!肉片反而變得多餘了
¥680一碗,唔平,但絕對值得幫襯!



食飽飽,係時候入神宮散下步拜下神啦~
接下來,我將會用小學3年班中文作文學過既“步移法”嚟寫下我係神宮既所見所聞 :

過橋

洗手鞠躬入鳥居















。。。。
。。。。。。。。
。。。。。。。。。。。。。。。。。

雖然話我寫文咁耐都比人打過無數次,但呢一篇出街後我會唔會死無全屍呢?(汗)
咁既野都夠膽寫出嚟!!!!!!!!!!你白痴ga!!!!!!!!!!!!
但神宮內真係只係得樹呀嗎!!!!!!!!!我又唔想打兩隻字一堆相就當一篇blog!咪夾硬寫d野law~~係咪好有良心呢~~~~~~XD
唔係ga其實我而家都係打兩隻字一堆相就當一篇blog...........所以都係睇相啦........


當穿過一堆樹直行到最入就會見到伊勢神宮既「正宮」豐受大神宮
外觀並不華麗,甚至可說樸實,唔講都唔會知呢個神宮係咁高地位同出命靈驗的!
沿途所見不少學生係著住水手校服嚟參拜的,相信佢地一定係嚟祈求自己可以變美少女戰士ga je!
好,我都求下自己要變禮服蒙面俠先!
入到去,扔個5円,兩拜兩拍一鞠躬,誠心禱告.......桃花ar.......我要桃花ar........唔係要一棵棵果d桃花ar!!!!!桃花ar........桃花日文究竟點講ga!!!?


(日本人相信鳥居後就係神明既居所,所以內裡禁止拍照。岩ge,我都唔想影到佢地........)


之後每一間別宮都拜哂,就出返去表參道啦
望望錶,1個鐘都唔使???係咁ga啦??好似無咩特別有d平凡wor!
不過我知道,我地始終唔熟悉日本文化,唔可能明白哂呢間no.1神宮背後的代表意義。等於同女人講模型講機械人,佢地會得個“哦”字 ; 女人同你講韓劇,你會講個“x”字
嚟到行個圈後,再望住「伊勢神宮外宮」呢6隻字,就會明白呢度係一個日本人的信仰象徵,而非一個為取悅遊客而設的美輪美奐景點

外宮??
我呆一呆,望望地圖,東面4公里外大大隻字寫住「伊勢神宮內宮」.............抵死……又無做功課ar la………..
似乎,我有機會太早下定論了!
區區4公里,騎住係hostel租既烈火戰車,高速向未完既伊勢神宮前進啦~



下回繼續~

================================

p.s. 寫呢篇時先做資料搜集,原根據維基王個百科所講,伊勢外宮既正宮「豐受大神宮」所供奉既係「豐宇氣毘賣神」(日語:トヨウケビメノカミ),主要係管食物的
幾個月後既而家,我可以好肯定咁話比大家知,呢座神宮真係好靈!

鋒‧加西亞,寫於磅重之後

=====================

好多靚靚地相片及無聊小故事的Facebook Page :
My Facebook Page : www.facebook.com/Garcia.in.Germany
Instagram : https://www.instagram.com/fung_garcia/
請多多支持呢~

沒有留言:

發佈留言