測試1

2016年3月13日星期日

日本紀伊半島Day3.2 – 千人混浴之仙人風呂


上回講到好心士多老闆娘特登車我嚟到今晚既民宿,亦係我Day3既最後一站 ------ 川湯溫泉仙人風呂!







一定會有眼尖既網友覺得.........喂......咁熟口面ge........好似係邊度見過.........好似係電視唔知邊個節目........
無錯,呢個就係杜如風係佢個關西攻略節目度強烈推薦既和歌山秘湯 ------- 位於河川中央既超大型露天混浴溫泉!!
講真ar,當我返到香港兩星期後,見到杜小姐既節目話會介紹呢度真係又興奮又難過.........
興奮既係英雄所見樂瞳,呢處的確係個會令人一見愛上既隱世秘境,可以同身邊人甚至身外人介紹絕對係一件樂事!
難過既係我做唔到第一個正式介紹此地既香港人無左頭啖湯ar!!!!!可惡+妒忌ar!!!!!!!~~~~~~
唉無計啦.........鬼叫人地真係早過我去咩,我自己寫野又慢.........
等等先,唔係掛阿鋒,你同杜如風比較?即係龜仙人對超級撒亞人je
得啦~~~~妒忌下寫兩句係咪唔得先~~我會努力有一日去到佢果個level ga!!!!!!
總之~~~而家就等我用第一身既文字圖片,率先為大家掀開此地既神秘面紗!(呢句真係好old school,不過我懶再諗其他句子........)


睇相都見到, 呢個川湯溫泉仙人風呂,位於馬路旁河川「大塔川」正中央,依山而建非常開揚
而仙人風呂又稱千人風呂,顧名思義可以比到一千幾百人一齊浸都無問題,好似有d誇大,不過我目測數百人一齊浸都真係無問題~
但點解我會諗起有個日本整蠱節目,一百個肥佬坐落錢湯既畫面ge……



https://youtu.be/Rb-UgzWVCr4?t=1m26s


細心一睇,溫泉範圍既斧鑿之痕極重,明顯係人工整出嚟的
原來每年12月至2月期間,本地村民就會夾手夾腳係呢條大塔川上用推土機+鐵鏟+爆碎點穴將地下溫泉水掘出嚟。
講到好複雜,其實即係冬天太凍想梳乎下咪整個寂姑池出嚟law
上年2015年正正就係仙人風呂同田邊市合併十周年紀念,由於太開心啦,所以特別延長開放到第二年3月21日,所以我嚟到時既3月頭都仲正常開放~
好彩ja...........如果唔係我呢d成日唔做功課check清楚既死懶鬼,一定會白行一趟喊都無謂..........







 
 






 
 

雖然話成千人都浸到咁鬼勁,但呢度既設施都真係幾簡陋,d村民求鬼其用塊木板就當做橋攪掂
不過,呢種簡單簡陋又形成另一種方便,基本上只要係開放時間內,你無聊行過除衫跳落去就得ga啦~ 完全唔需要日常溫泉既刷牙洗面沖涼捽頭
如果妳覺得當眾除衫尷尬ge,馬路另一邊有更衣室
如果妳係夠薑既,可以係come on baby式當眾除衫show身材的
我夠薑,但無身材,所以都係著返條褲,快快手手跳落泉驅寒算啦
係日本浸溫泉可以著衫既咩????
呢個係得ge~~ 話知妳著羽絨落水都無問題!
不過真係有部份日本人都係習慣全裸浸浴,加上水深甚淺,所以泉內周不時都有一班粵劇名伶任劍輝係度劍氣縱橫
殺氣太強,我都係擰轉面,望下岸上既鬼妹換衫先……………..
………………………………………………………….
Wei佢咁岩出現係我視線範圍je!!!!!唔係我特登望ga!!!!冤枉呀包大人!!!!!
唉可惜幾個外國人都係有男朋友同行,如果唔係去做下異國交流都好,更可惜既係佢地全部都著運動型泳衣………….
有無攪錯!!!!!根據我係歐洲縱橫江湖既經驗,點會有鬼妹落水係唔著比堅尼ga????
妳太令我失望!!!!!!!!!!!















































 

講到呢度,一定會有人問我,咁有無日本女性全裸先?~
我可以話比大家聽--------係真係有ga!
但見到位女士除衫果下,我真心驚一驚,望都唔夠膽望。
因為我係一個正人君子,絕對目不斜視!
不過如果閣下有頭風痛風等症狀ge話,我都建議望一望,傳聞話會有幫助…………






 
 

講返個泉水啦,果d咩水質種類有益健康返老還童既我一概不知~
我只係知絕對無想像中咁熱,池內估計只係32-35度左右,加上地點空擴散熱較快,如果個人唔浸哂落水係真係會覺得凍的
過癮的是,坐坐下你會feel到會有一剎那”辣”屁股,再認真d feel下個水流,係會發現一陣暖一陣凍,溫度非常不穩定
因為泉水其實係由地底湧上lai,但因水太熱,正接浸落去肯定會變德國名菜水煮香腸,所以村民就係角落位插條大水管,將旁邊大塔川的河水引入溝凍佢








 
 

雖然,因為咁樣令到個溫泉一忽凍d一忽熱d,有時又水面熱d水底凍d,但我又幾鐘意呢個feel wor~
尋寶地邊忽熱邊忽凍已經好玩,有時覺得太熱可以跳去凍果part,太凍又可以彈去熱果part,出出入入彈lai彈去吹得我脹ar~
更重要係部防水機浸熱水太耐都驚驚地有事,搵個凍水位安置佢就perfect la~
而且因為可以人體移動地調節體溫,所以浸幾耐都唔怕暈眩~Good!

















 
 

天色漸暗,差不多上水時,見到有一pair美國+日本人既朋友組合在邊飲Sake邊輕鬆傾偈
出於好心,我應該要提點一下佢浸溫泉飲酒會容易醉酒易嘔的
「Really? I don’t know. But do you wanna try?」美國人說完就成支大清酒遞比我
我猶豫左一秒 -------------「Sounds great~ XD」
Wahahahahahahahaha成功啦~~~~我擺到明就係借d ee搭訕呃酒飲啦~~~~~~~~~
浸住暖笠笠既露天溫泉,飲啖暖笠笠既Sake,個feel實在太正啦~~~今日幾辛苦既舟車勞頓全部都一掃而空~~~




















 
 
 

同兩位外國人傾下偈,知道佢地原來係幫日本一個新開既旅遊網站寫評論,現正在進行資料搜集
而我地大家都認同仙人風呂呢度真係一個超級正既地方,只可惜交通實在太唔方便啦
從佢地口中,先知道我下晝係熊野本宮大社既徬徨係完全不需要的,因為Information Centre其實可以租電動單車上落秋名山,兼且唔使回程,只要到達旅館後叫staff幫手還就得…….
點解咁有用既資訊我會而家先知道ga………………連呢度日常只開12月至2月都係佢地講我先知………..
唉作為一個backpacker,我仍然未合格呀…………
Anyway la,我真係好少可同男人肉帛相見地吹水,仲要係兩個,但真係傾得好開心~








 
 

夜晚食完飯抖一陣,百無聊賴,盡管外面下著細雨,終於都係決定再出去浸多轉!
反正都係濕ga la~~~~落雨又使乜怕wor~
而天色全黑下的仙人風呂又係另一感覺!
落雨使山區氣溫進一步下降,反而惹起一層層迷矇霧氣,從水面緩緩攀升,再折射幻化四周的澄黃射燈,使整個溫泉變為一神秘國度,莊嚴,且出世
到此時此刻,我先知道「仙人風呂」4字的真正含意
雖然睇唔到那讓我默默愛過的銀河星星係略為美中不足,但就憑此刻有如置身太虛幻境的感覺,「仙人風呂」亳無疑問係露天溫泉之極致























 

溫泉介紹就差不多啦,講下d硬件野啦
我住既溫泉旅館名為「明日之森」 (Ashita no Mori),係當地都頗有名氣
除左地點方便,正門過馬路就係仙人風呂外,單人一晚獨立房大約係$550,呢個地區嚟講算唔貴ga la
間房仲要望到正溫泉,個view真係無得輸~












(就咁坐係溫泉就見到自己間房,近到嘔)







 

另一樣出名既就係呢度老闆英文溝通無問題之餘仲非常友善!
我想去便利店買野,佢話最近既便利店都要2公里遠,於是就主動車我出去啦!
even深夜我超級seven地跌左條鑰匙係溫泉,老闆都借哂傘同大光燈比我慢慢搵返,仲主動幫我plan聽日既行程,實在係super nice呢!







(下晝買定既便利店宵夜,個大福真係好食到爆炸!!!!)


不過呢度有樣野唔好--------應該話成個地方都係咁,就係周邊除左仙人風呂外就乜都無!連餐廳都無!
最近既便利店就係上面話兩公里山路以外果間,收5點半
即係話你係局住要係旅館食埋,咁價錢當然唔平啦,仲要最遲晚上7點開飯,一個唔該夜晚肚餓真係唔知點算
可幸旅館既膳食的確非常唔錯,個心都算balance返d







(用料新鮮,外脆內軟,正!)



(豐富早餐包埋,不過朝早唔食得凍野既朋友like me就一半食唔到了)




 
 

講埋交通,由新宮市或紀伊半島另一邊既田邊市,甚至白浜都有巴士到達,川湯溫泉站落車就ok
但非常建議渣車,如果唔係下下要等個幾鐘車作景點之間移動真係好浪費時間!甚至好似我咁完全困左係旅館tim!
但係情侶嚟到都問題唔大ge,因為明日之森旅館顧客太少,民宿主人都話兩個澡堂都可以變為私人family專用,內瀧仲幾企理,剩係係度都有排玩!
如果想知玩d咩,請參閱各大日本動作電影













wa一個唔覺意寫左成3000幾字! 我真係就嚟變長氣阿伯ga la! (其實已經變左..........)
總之仙人風呂呢度真係一個非常非常靚兼正既隱世秘湯!
雖然遠左d,但襯佢未被大量遊人攻佔,嚟緊12月快d嚟啦!

================================

住宿 : 明日之森 (Ashita no Mori)

http://www.booking.com/hotel/jp/ashita-no-mori.zh-tw.html



川湯溫泉官網 : 
http://www.hongu.jp/onsen/kawayu/senninburo/


=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia/

 

Email : funggarcia@gmail.com

另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!

 
 
 
 






沒有留言:

發佈留言