測試1

2016年10月17日星期一

歐洲隨筆007 - 土耳其烤肉卷

係歐洲生活,無食過土耳其烤肉卷döner kebap既人就同無睇過AV既男人一樣,唔係無,但100個都未必搵到1個
特別係德國,肉卷店就好似香港既茶餐廳,每街每巷不論大小社區都總有一間係左近,就算係李嘉誠,我都唔信佢無食過茶記啦~
幻想下, 一大束烤得啪啪聲的大肉卷(好似用錯擬聲詞),散發微微焦香後立刻被新鮮割下,配上各種新鮮蔬菜及乳酪蒜香醬汁,被一大塊燙熱薄餅包成長長一條,一啖咬下,肉的鮮美、蔬菜的爽脆、醬汁的香濃, 所有滋味一次過從口裡爆發而出!........
ee點解我寫寫下張抬濕哂ge?
Anyway~再加上係歐洲呢種肉卷都實在係平,連物價甚高的維也納都只係3€左右,最平見過應該係布達佩斯$18港紙唔使 (列支敦士登10€…………)
再再加上一卷野有肉有菜心理上好健康兼夠飽兼方便快手,in additions大多店都會開到深夜,所以深受我地呢種周圍走背包客同working holiday人既喜愛





係土耳其語döner係指旋轉,kebap就係烤肉,係pen apple pen既宇宙法則下--------------- 嗚呀!!!!!!!!!! -------döner kebap就係旋轉烤肉啦!!!
關於döner kebap既來源眾說紛紜,有個德國佬同我講話土耳其本身無呢樣野,係一個土耳其移民係德國創出嚟後流傳全世界的。於是我問問維基王,原來土耳其本身係有呢樣食物的,但而家一般係歐洲以至世界流行既Kebab版本的確係由一名土耳其人於70年代係柏林發明的 ; 等於壽司係日本國寶,但立於頂點既紅豆壽司則由香港發揚光大咁解



話之佢~我只知係德國,一般會將döner kebap分拆開做Döner同Kebab (最尾字由p改成b,讀法可能係德文發音而讀”ki巴”唔讀”ka巴”)
Doner就係我地平時食時用薄餅包住一條長條形果d,Kebab則係用圓形麵包代替薄餅攪到成個burger咁樣,香港我暫時未見過,兩者材料係完全一樣的,不過Doner會比Kebab貴大約50cents至1€



但就好似某旅遊網站既廣告名句 ----- 同樣既內容,點解會有唔同價錢ge?
根據土耳其烤肉專員鋒加西亞無數次實地測試過後,發現Kebab的肉量會少大約1/4,另外最大既分別應該係口感 :
Kebab係普通三文治漢堡包feel,厚實感同飽肚感強 ;
Doner則因為皮薄,所以更能突出餡料及醬汁的味道
對於食餸多過食飯既我嚟講當然係Doner岩心水d啦,但現實係working holiday時要慳錢,10次有9次都係Kebab……



叫得烤肉就講下舊肉啦
分為雞牛羊3樣就大家都知,不過係歐洲多數都係得雞牛兩種,而我地多數都會叫雞
唔係因為有需要,係因為大多數店所謂既「牛」,都只係一大團黐得幾實下既免治肉,入口帶爽脆,有少少似午餐肉,即係話你真係唔會知道果團肉究竟係乜肉,就算真係牛肉都唔慌新鮮得去邊
但要雞就真係會食到有雞味,雖然三鹿奶粉都會有奶味,但觀感上同心理上都好似安落d


(後面果圈就係牛,網絡圖片)

切肉都大有學問,一般都係用長刀叉削肉還母,切之前仲要扮勁磨兩野tim ; 現代d既會用熨斗刀將已烤好既表層肉一條一條咁刨落嚟,雖然食落口分別不大,不過總係覺得刀削店會正宗d好味d



至於配料就真係八仙過海了,一般都係生菜青瓜洋蔥紅蘿蔔絲蕃茄走唔甩,有店舖會加紫椰菜,我係Wurzburg HBF食過加醃辣椒tim
醬汁方面一般有2-3個選擇, garlic sauce, chili sauce同普通yogurt ,或者有d店會就咁溝d特色醬叫Kebab sauce攪掂(有錯請指正!)
我最常要garlic sauce,反正個人本身都口臭ga la無乜所謂~嗜辣既朋友就唔好對chili有太大期望啦,歐洲人食得辣極有限~
同埋土耳其人好似無乜混醬既概念,我次次叫襯”garlic and chili mix”都眼甘甘望住我,抵死在佢啤完我都只係會落一種醬ar ma……


(超級多醬ver. from Heidelberg)

炸薯條(pommes)都係非常重要既食物,有時我地夜mama口痕要搵野下酒,就係去Kebab店2歐元左右一大盒,新鮮即炸,再落d紅色既調味粉兜兩兜(我懷疑係紅椒粉,但一d辣味都食唔出…….)天寒地凍邊行邊食不知幾爽~


(網絡圖片)

係歐洲仲有樣叫Doner Box既物體係香港so far未見過的,說穿了就係搵個電視見得多既鬼佬中餐外賣盒將d薯條or蔬菜or both塞塞塞塞塞,放一堆肉係面再加pet汁,盤菜一樣撈撈撈撈撈lai食,即係唔要包皮齋食餡,味道都同無加麵包係一模一樣既!
d鬼佬都幾利害,同樣果幾種材料竟然變化到咁多唔同名號出lai……ee我好似無意中話緊澳洲牛奶公司咁ge?


(攝於Freiburg)


大大話我係歐洲呢一年都食過不下30間大小不同既kebab店,但只有一千零一間我會每限encore!
「Mustafa's Gemuese Kebab」,全柏林無人不識,公認最最最最好食既土耳其烤肉卷店! 呢間亦都係我上星期係RTHK「繽紛旅程」節目內講過,全柏林唯一一間需要排隊既食肆!


(呢張係網絡圖片,下面果d先係自己的~)

(順便宣傳下我上星期受訪既節目,同時再次多謝詩敏既邀請~)
RTHK第5台繽紛旅程 :
第一集第二集


你可能會諗「我超!咪又係一堆肉一堆菜卷埋塞入口,有幾咁巴之閉!」
少年你太年輕了,需知道呢個世界除左部隊鍋之外所有食物既頂點都有用腳一排的價值
Mustafa's Gemuese Kebab成功既秘密在於除左一般既常見蔬菜,仲加入羊奶芝士、檸檬汁及一大堆德國少見的炒蔬菜!
將薯仔粒、青紅椒、翠玉瓜、茄子、洋蔥等等炸熟,加上胡椒、茴香、豉油、是拉差醬及其他調味料置於肉卷下的鐵盤炒埋一碟,切肉時肉汁精華流下,令原本已滋味豐富的炒蔬菜更為惹味!
至於其他用料新鮮就唔在講啦~而且只係供應chicken kebab一種,感覺上更加可靠!
至於味道,見我上面寫左咁多都唔使多講啦下話~
由於客流量大,所有肉都係熱辣辣切熱辣辣包熱辣辣食,無話外面d無人買既店舖切定一堆係度攤凍哂,
一啖咬下,肉汁充滿成個包,加上羊奶芝士的粘糯,蕃茄的juice,洋蔥蘿蔔的爽脆,炒蔬菜的微辣濃香,令味道同口感更富層次,每一嚼都在感受kebab在口中的無窮變化! 當覺得味道太濃太膩時,突然又會嘗到檸檬汁既清神酸味來醒醒味蕾!
Wa我而家一邊打都一邊頂唔順!!!!好想食呀!!!!!!



其實我每次離開柏林,甚至返香港前都必定要食一次先心足!
Doner沙煲拳頭咁粗一卷都只係4.3歐! Kebab同純素食版本更加只係3歐左右! 味道又係頂級中既頂級,排隊買都抵呀!
「排幾耐先?~」
「1個鐘起跳啦」
唔係掛!!!!!!!!??買個Kebab排一粒鐘!!!
鬼叫佢地得3-4個員工做野,仲要唔係分工合作,係每人幫一個客做一卷兼收錢,大約2-3分鐘先完成到一份,係香港,咁既速度上菜仲唔比人x交叉y到妳開花!?
但睇返Tripadvisor既comments,每一個人都係排成個鐘都亳無怨言兼話抵排ge~妳就知呢間野既魅力有幾咁強勁!
我個人就建議朝早10點至11點or下晝3-4點呢d非食飲時間去,試過等20分鐘就有得食超開心~
萬一真係要等ge,點你老友去旁邊Curry36買個咖哩腸食住先啦!~


(第一次同老友去食,驚為天人!)

(以後每次離開柏林前都一定會食,呢張就係Last day in Berlin 的lunch)

https://www.tripadvisor.com.tw/Restaurant_Review-g187323-d1341041-Reviews-Mustafa_s_Gemuese_Kebab-Berlin.html

可能味覺已被寵壞,係香港,無論點都搵唔返咁好食既Kebab
早前係上環同Soho都食過兩間,唔係話唔好食,只是不論味道同份量都差天同地,仲要起碼收我60個大洋
唉,唯有當係望梅止渴啦



======================

My Facebook Page : www.facebook.com/Garcia.in.Germany
Utravel Blog : http://blog.ulifestyle.com.hk/blogger/aeolusgarcia/
Instagram : https://www.instagram.com/fung_garcia/
DCFever - Fever Travel : http://www.dcfever.com/travel/utravelogue.php?id=799202
Email : funggarcia@gmail.com
請各位繼續多多支持呀!!!!!!!!!!!!!!!

沒有留言:

發佈留言