測試1

2017年9月7日星期四

伊朗獨行13th - 鏡宮聖陵,超出理解範圍的美麗

時間所限,係Yazd短短二日一夜,下晝就坐6個鐘巴士直奔中南部,嚟到另一個遊客必到既城市設拉子Shiraz
呢個地方我初想skip左佢,因為交通需時太耐,我會好大機會返唔切德克蘭返香港
但一做research就知道呢個地方逃不掉 -------- 幾個最靚最精彩既景點係哂呢度,甚至可以話唔嚟 Shiraz等於無嚟過伊朗!
所以我先會一狠心 cut走成個德克蘭行程留返d時間係度,但都係得一晚一朝唔夠24小時
唉走馬看花都無計,唯有放低背囊就即刻跑出去啦
晚上10點正,我來到伊朗極為著名的建築 -------- Shāh Chérāgh

Shāh Chérāgh中文多譯做「鏡宮聖陵」or「光明王陵墓」,維基則叫「燈王之墓」,係一座安葬左千幾年前什葉派伊瑪目穆薩·卡齊姆個仔Ahmad的大型墓室
根據網上所講,Ahmad叫「King of the Light」唔係因為佢識發光,而係因為「有人發現墳墓發出光,於是決定調查光的來源,發現一個全身穿著盔甲的屍體,戒指上的文字「驕傲屬於真主,穆薩的兒子艾哈邁德」證明,這是穆薩·卡齊姆兒子的埋葬地點。」(from維基百科)
總之,呢個就係伊斯蘭什葉派教徒心目中一個非常重要的神聖陵墓,基本上好多遊記資料都話非教徒係不能進入,就算入到都要搵人帶定係攪一堆手續咁.......好麻煩!
但唔知點解,我夜媽媽on居居又走得入去wor! 只有門口食蕉望兩眼我部相機就算,一路上通行無阻,繼續有返伊朗人一貫的親切微笑~




由入口廣場穿過左前方拱門來到陵墓正殿
Wa,使唔使咁靚ar?



不得不說伊朗人運用燈光有自己的一套美學~
陵墓被射燈映照得色彩繽紛,雖五顏六色+每半分鐘轉一轉,但仍毫無斑駁雜亂之感,唔似大陸鳳凰果d古城一pat光乜美感都無
殿前走廊則以黃色光線為主,柔和之餘亦顯得莊嚴,配以玉色大理石地板及巧奪天工的立體雕花,盡顯墓中人的華貴與氣勢



你以為咁已經好靚? 少年你太年輕了
因為進入陵墓內部,你就會立刻被眼前的閃光所震撼 ------ 原來牆身天花全用小鏡片凹凸貼成,綠色金色燈光在當中不停反射折射,令整座墓室變得像寶石一樣閃爍絢爛,明亮璀璨,又像洋溢在翠色銀河的星光之下,不自覺的走進了異空間……



更重要係呢個無限鏡反射設計,令到光線大幅增強,氣氛亦更為華麗架勢,完美咁彰顯左光明王之名!
但係,睇上面d相大家都知道,係呢個光線亂射的狹窄室內空間,我既攝影技術係完全無可能影到靚野,唔out focus都算係咁!
為左真確d表示呢度有幾靚,我借左少少google照片並附上原link比大家參考下
唉越來越覺得我要學下影相呢…….


(search from google - http://ebu-arts.tumblr.com/post/19346546094/sh%C4%81h-ch%C3%A9r%C4%81gh-is-a-funerary-monument-and-mosque-in and https://www.tumblr.com/search/sh%C4%81h%20ch%C3%A9r%C4%81gh, please tell me if i am infringing on the copyright.)

入口正前方的小房安放了相信是Ahmad的遺體,幾乎所有內進的伊朗人都會手碰房壁並口中唸唸有詞,應該係在禱告或祈求平安之類
下? 點解我都唔識波斯文都知?
…………唔會有人得登走去同黃大仙講「阿大仙我今朝份餐蛋治好正ar………」掛…….


(唔影墳墓,所以只係遠遠一張算了)

向左走進入偏廳,呢邊仍然會閃爆你對眼,不過改以白燈為主所以較為明亮,感覺上有d似水晶宮殿~
而呢邊亦都相對多人做跪拜或誦經,我唔係好敢亂影相打擾,靜靜地坐在一旁就算了~



如果細心既朋友應該會留意到某d相時間上係唔連貫的~
因為呢個鏡宮太靚啦! 我第二朝見天氣好,想望下日光透下會唔會有唔同感覺~
但結果係無分別的~窗戶太少了!
梗係啦邊有墓室係光殘殘ga!!!你想佢訓得唔舒服起身拉窗簾咩!!!!
而另外第二日入場時我就真係比人閘住反彈啦!
但主要原因似乎係我孭住大背囊而唔係我非穆斯林
係工作人員帶領下出側門免費寄存就ok了~


如果純計驚喜度,鏡宮聖陵都可算是伊朗之行既no.1了!
論喜愛及難忘,我甚至認為超過嚟緊會講既粉紅清真寺tim!
不過係寫呢個之前,係Shiraz既住宿經驗係絕對要用文字記低的…….
下一回繼續啦~

====================

p.s. 此標題源自一篇日本的旅遊文章「美しさが理解の範囲を超えるイランのモスク、シャー・チェラーグ廟」(http://netgeek.biz/archives/76493),覺得非常貼切,私下借來一用。如有冒犯還望告之,感謝!

=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言