測試1

2017年12月23日星期六

北陸之行2 - 世界最美Starbucks?

只要係網上打「世界最美Starbucks」呢幾隻字,必定會出現呢間位於富山市內的明星級咖啡店,而再睇落去,就會見到d人話「其實間店唔係特別靚……」
乜料? 矛盾對決定陰陽共濟ar?
點都好啦,富山市內無咩野睇,一場嚟到點都要會一會你ge~

呢間Starbucks位於富山駅北方的富岩運河環水公園內,由車站行去大約需要20分鐘,如果好似我咁由富山城既市中心行去則大約40分鐘
聽落好遠,但反正入黑後既富山無咩野做,食完飯去行下散下步都未嘗唔係一件好事ar~
之不過一路上鬼影都無隻,9月中又唔係寒冬,真心懷疑富山係咪無人住ga……..



由富山市總合体育館旁甚有參道感的大路向下斜路直走,就會見到富岩運河的盡頭,亦係一覽整個環水公園既地方
晚上的公園欠缺人氣,但在彩燈照射下仍然甚美,至少我覺得比幻彩詠香江有feel得多!
日本人操控燈光既質素有幾掂,妳懂的~




傳說中世界最靚既Starbucks就係正望運河橋的右方~
綠草小斜坡上建著一座木色+帶露台的小屋,並非華麗婉約,亦無巨大誇張,只有樸素簡約,略帶文青氣質,燈火從落地玻璃透出,為寂靜的園內添上一點熱鬧~



店內竟然意想不到的熱鬧!
岩岩先話一路上鬼影都無隻,而就好似全個富山d人都集中哂係呢間café咁! 仲要唔係遊客係本地人多wor!
學黃子華話齋 :「佢點嚟呢度ga???」



講真呀,就咁睇外觀,靚係真係好靚,但又真係未至於去到世界第一,至少我平時去開既新城市中央廣場店都有得fight~
不過一場嚟到又咁岩有露台位,點都應該買返杯熱朱古力好好坐下hea一hea ge~
望下燈望下女富山旅行,好好enjoy旅行的閑適,過左一個非常舒服既夜晚~



第二朝一早就離開富山,但我見天氣咁好,死唔信邪,上JR前一定要再去多次睇下所謂「世界第一」既魅力係邊!
今次,我明白了!



清透藍天之下,眼前的運河映成海般深藍,咖啡店則被青翠綠草所包圍,店內的全透明設計造出廣闊的空間,運河橋則為四周添上一絲摩登現代感
於是身在此地,可同時享受天空、流水、大地與建築的風景,不會受任何拘束,自身與四周美景融合為一,再喝一口溫暖的Green Tea Latte……..夫復可求呢……
如在春天時份,咖啡店更是被紅白櫻花包圍,景色更上一層樓,那「世界最美Starbucks」的名函,應該當之無愧了



講左咁耐,心水清既朋友應該都會發現,其實靚既係個公園,同間Starbucks關係真係唔大
呢個「富岩運河環水公園」靚到咁,我係度賣雞毛掃蚊怕水都客似雲來上報紙啦! 整返個「世界最美牛雜檔」一定發過豬頭!
不過Starbucks本身就好有呢種「係靚地方開店食佢個靚View」既生意觸覺,抵佢成功ge~
總之嚟到富山市,一定要來走一轉呀~



p.s. 注意富山站現時係唔可以南北直通的,一定要行地下通道兜遠路,如果睇googlemap既朋友一定要小心,特別當妳趕車果陣………

=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言