測試1

2018年12月9日星期日

阿塞拜疆背包行Day6.2 - 熱心老伯有性格 (#過客列傳14)




上回講到比個司機玩完一輪之後,終於好攰咁來到Sheki的民宿
誰知女主人返緊工唔係屋,只得友善但溝通唔到的老爺爺開門比我,咁當然就咩旅行資料兼地圖都無啦
個人習慣,去每個新地方都要有張紙地圖先心安,何況我呢度無電話卡上唔到網呢
唔緊要,我係google map “ tourist information”,見到街口轉角就係,就將佢當做遊覽Sheki的第一站啦!



按圖索驥,來到google map指住既地點 ------ ee呢度咪岩岩我同個司機唇槍舌劍既地方? 頭先攪左咁耐都唔覺有information centre wor!!!!
但左睇右睇都的確point左係呢度,唔通又有鬼鼠路??
終於都係忍唔住試下問街邊d人,但無一個明白
到我問緊一個坐係街邊既大哥時,佢一臉苦惱,突然揚一揚手叫停一位路過的老伯,再嘰呢咕嚕同佢講左一輪
老伯同樣對住我個google map一臉狐疑,沉默片刻,突然祭出傳說中既最強武器Nokia 3310!
Wa……… 高手嚟wor,睇嚟會有不得了既事發生了……..

2018年11月26日星期一

阿塞拜疆背包行Day6.1 - 司機傻更更 (#過客列傳13)



你無睇錯呀! 個標題真係換左呀
難得嚟到高加索,我點會咁乖剩係留係格魯吉亞呀~
正如資料集   (http://garcia-in-germany.blogspot.com/2018/08/blog-post.html) 所講要玩齊高加索3國,行走次序必先去阿塞拜疆Azerbaijan,而一般旅客去襯10個有9個都只會去首都巴庫Baku,但佢位於全國最東面既裏海,由第比利斯出發幾乎都要89個鐘,我今次旅程時間緊迫,唔想浪費呀!
揾下揾下,發現阿塞拜疆西北方有一個叫 "舍基Sheki" 既歷史古城,聽聞係個重點旅遊地方,距離第比利斯都係4-5小時車程,並且超級少資料關於呢個地方!就去睇下去乜料啦!





2018年11月7日星期三

格魯吉亞背包行Day5.2 - 一支公hostel天台BBQ



經過facebook「#場邊小故事」所講地獄般既4個鐘Mini-bus,夜晚8點我終於返到Tbilisi啦!
第一件事當然係去今晚既住宿放低背囊先啦~
今晚既hostel叫Hostel Mountain 13,係網上見佢有不錯既評價,地點又幾近Rustaveli,都係兩三個街口je,仲可以順利探索多d Shota Rustaveli Ave大街,就試下你啦





(夜晚既Shota Rustaveli Ave大街,氣氛唔錯wor~)

點知原來係大中伏呀!!!!!!!!

2018年10月25日星期四

格魯吉亞背包行Day5.1 - 係咁ee睇下Kutaisi



終於都要離開Mestia了!
個天亦都如無意外地係我走果日先嚟藍藍天空多高願伸手可觸到......算啦我都慣左佢係咁玩野ga la.......
一般backpacker離開Mestia後只會去兩個地方,一係去最西部既格魯格亞第二大城巴統Batumi,否則就返第比利斯,兩者坐minibus同樣差不多要8-9小時,同樣要超早7-8點出發,民宿可代辦兼架車會嚟到門口接你
我係後者,所以係呢度要同韓國少女Summer暫別了,遲d再見啦~

2018年10月13日星期六

格魯吉亞背包行Day4 - 烏樹故里,那僻遠村落中的僻遠村落


上回講到尋晚開始作病訓唔好,不過今朝起身食埋個豐富早餐又好似好好多wor,再加上有民宿的韓國少女Summer同遊烏樹故里,即刻雄風再現大師級表現! 出發啦~~~~~~~


2018年9月30日星期日

格魯吉亞背包行Day3.2 - 冰川獨行@Mestia


續上回,坐上民宿主人Yuri的古老吉普車,在雨中經過千山重重美景,我地嚟到Mestia的重要景點Chalaati Glacier
去Chalaati Glacier好多backpacker都會選擇行路,因為沿途風景真係好風靚,除左不知名及不同顏色的巨木山林,轉角遇到雪的感覺亦非常有feel~
不過下晝兩點幾先出發既我再行3粒鐘先到冰川入口真係蚊都訓,都係乖乖課金50 gel = $156比Yuri車我來回算啦
係有d貴,不過渣車都要近40分鐘係算耐的,有d錢係要比人賺的



2018年9月25日星期二

格魯吉亞背包行Day3.1 - 雪山下的仙境民宿


上回講到我離開第比利斯,坐上overnight train向Zugdidi前進
正常嚟講,交通工具搖下搖下咁我係非常好訓的,但我竟然一晚醒左3次…..
1點……涼涼地wor,都係蓋返件褸訓啦
2點……凍wor,要換返長袖衫長褲訓
3點……好x凍ar喂! 即刻挖返件heattech著埋襪先訓到!
望下錶 --- 5度???
尋晚入車廂時明明仲諗「咁Q熱窗又開唔到焗死人咩」,而家就係「咁Q凍暖氣都無凍死人咩」!
但係咁都證明,開始進入山區了~

2018年9月17日星期一

格魯吉亞背包行Day2.3 - 半山城+初試格魯吉亞菜



浸完溫泉叉足電,又可以繼續上路,向山頂女神像進發啦~~~~
去探女神既方法有二 : 係溫泉區行上去or返Rike Park坐纜車上
前者約行半小時,後者單程都只係比約10零蚊港紙,用Metro張卡do就得~
我呢d懶人,梗係纜車啦~



2018年9月11日星期二

格魯吉亞背包行Day2.2 - 公共浴場奇異見聞錄


續上回行到隻積咁,但仲未完,下個目的地係山上的女神像呀!!! 纜車係果邊~~~衝ar~~~~~~~~~
等等先……….對腳好似……有d軟wor……..
一般嚟講腳軟唔係我style,之不過我好似由12點到而家6點連續行左6粒鐘無坐過,平時又缺乏女朋友shopping訓練係咁ga la
好啦! 臨時改變行程,過橋行去對面浸溫泉啦~~~~~~~~~~





2018年9月4日星期二

格魯吉亞背包行Day2.1 - 漫步第比利斯


尋晚成4-5點先訓,今日真係訓到幾乎check out 12點先起身!
第一件事唔係出去玩,係坐地鐵去第比利斯火車站買今晚去Zugdidi既過夜火車,超驚無位呀!
之後再返Liberty Square食個KFC先officially 開始我既第比利斯探索之旅~
但當時已經係下晝2點………………
算啦~ 慢慢散下步,無目的地行到邊睇到邊啦~


2018年8月21日星期二

格魯吉亞背包行Day1 - 夜遊第比利斯


格魯吉亞遊記正式展開!
11/5/2018朝早9點45分,我坐上哈薩克的航空公司Air Astana向格魯吉亞前進
都唔知有幾耐無坐過非廉航了,又有拖鞋又有戲睇又有飛機餐食,咁好服務真係有d唔係好慣~
波音767既舒適程度都ok,至少我訓到死左一樣~ 但關唔關d戲全部無雞腸字幕我要齋聽英文就不得而知了……….


2018年8月12日星期日

格魯吉亞背包行 - 出發前資料大全集

應該每個去格魯吉亞旅行既朋友都會聽過呢句說話 :

「格魯吉亞? 邊度嚟 ga? 係咪瓦努阿圖d friend?」

當你同個friend講完係高加索地區,佢都仲要問係咪非洲好危險時,不如真係慳返淡氣暖肚算啦,又或者好似旅遊界前輩Sonya所講「土耳其東北邊,伊朗西北邊」會易明d
講真又唔怪得其他人ge,我唔係上年去伊朗時睇Google Map見高加索3國好似幾近幾過癮,分分鐘而家都仲以為Georgia係美國既50份之一ar
作為旅行人,我不嬲既宗旨都係「越少人去既地方就越要去睇下」
儘管格魯吉亞唔係話咩好冷門既國度,但聽聞高加索山脈一帶風景靚到嚇死人,咁岩又有平機票,一於以佢作為我2018年既首個long trip啦! (可能都係唯一一個……….)





(同時呢個trip係「Share積fund去旅行」第三回,善款全數捐左比奧比斯,詳情可參考呢度 https://goo.gl/SwXwNW,最終籌得善款既Post係呢度 https://goo.gl/SCyyvr)

========================

簡單Background


2018年8月2日星期四

東京雜記5 - 那夜凌晨,我坐上了東京開往大阪的巴士

喂~ 來往東京大阪既通宵巴士大把人坐過啦,使鬼你講咩~
唔係ar……..雖然我係世界各地既巴士坐足一晚真係當食生菜,比肥佬責、行李冧當、美女投懷送抱等等古怪情況有咩咁大支野未見過ar
但真係估唔到,係日本呢個咁common既地方做件咁common既事會有d咁古怪既經驗…….

時間上係2017年9月北陸之行既last day,岩岩睇完我女人係東京巨蛋既夢幻級演唱會,真係遠比想像中精彩得多,唔止全場大合唱氣氛一流,仲係我面前換左成10幾套靚衫,encore時仲坐埋熱氣球嚟討我歡心,人又靚歌又甜又溫柔又可愛,點解會有咁好既女仔ga………好きだよ……..
OK STOP 啦!!!!!!!!!!!!!!!!!!!!!!!!!!!!!!!!!!!
返返正題~
總之就睇完concert當晚直接返大阪join阿哥啦,JR pass期已過坐唔到新幹線,最平最實惠既方法都係坐通宵巴士慳返一晚住宿啦~


2018年7月24日星期二

東京雜記4 - 日本第一炸豬扒


受網友啟發 :「一場嚟到東京,梗係去tabelog 最高分果d食肆試下啦!」
係wor,點解我從來無諗過ga呢........香港果個飲食網頁就話打手橫行je,日本既應該點都有返d信心保證!
而小弟一向都好鐘意食豬扒 (真係一塊塊食物果隻),就襯在東京的某個下晝無野做,揾左呢間2018年The Tabelog Award炸物類最高分,兼唯一一間上到年度銀獎既既炸豬扒名店,現分數4.14高到嚇死你既"成藏",試下佢既炸豬扒係咪傳聞中咁堅啦!



wa 有無咁誇張呀!!!!????????未見過日本食肆要排咁長龍,仲要8成都係日本人囉!!!!

2018年7月17日星期二

汶萊小記4 - 帝國級日落


汶萊遊記的最後一篇,當然係寫令我最難忘既汶萊景點 ----- 世界著名的六星級酒店「汶萊帝國酒店」The Empire Hotel and Country Club
講真,開頭我同其他對呢間酒店認識唔深既朋友諗法一樣 ----- 「酒店g ma,除左維多利亞有咩未住過? 有乜咁好睇? 仲要得登坐的士過去?」
不過上一篇果d行程有興趣既我幾乎都攪掂哂,Andrew都話帝國酒店係應該一去既,咁就去行個圈啦!

前往既交通我係汶萊小記1都講左,唔再重覆了
正門落車後已經覺得我一身既短褲踢拖既造型同d咁貴氣既地方非常不合,正想同門口bellboy講「你唔係咁都睇唔出,我呢一身打扮係邊齣戲既造型呀?」點知佢地都無咩側目,可能已見慣見熟啦~
話時話,雖然入口大堂又大又靚,但又未去到有「wa乜真係咁誇張ga咩?」既感覺,好似澳門有d酒店仲強勁law.....…….


2018年7月2日星期一

汶萊小記3 - 首都景點一篇睇哂!

講完交通講完住宿,係時候講下汶萊呢個傳聞無野玩既地方究竟有咩玩啦~

1. Omar Ali Saifuddien Mosque (奧馬爾•阿里•賽義夫丁蘇丹清真寺)
唔使諗,市中心最觸目就係佢!
全白色金頂既湖上清真寺,係汶萊最出名既景點兼最重要既地標! 更被譽為亞太地區最壯觀的清真寺之一!
基本上係碼頭邊離遠已經可以感受到佢既宏大氣勢!
之不過………我發現左自己出現一個大問題…….
去完伊朗之後我覺得所有清真寺都平平無奇呀!!!!!!!!
大鑊啦!! 繼教堂麻木症後又奶多樣野啦!!!!!


2018年6月12日星期二

汶萊小記2 - 完美的水上民宿

係為數不多的中文汶萊遊記中,有一位師兄曾講過「可以的話應該要住係水上人家的民宿」,但就無任何further information,其他人問佢都未有回應,所以我開頭都係睇過就算
當我比果幾百萬間酒店住宿既價錢嚇親而轉投airbnb既懷抱時,劈頭第一個選擇竟然就係一家水上人既民宿!
睇相,唔太特別 ; 睇comment,d好評多到如黃河泛濫一發不可收拾! 點睇都唔似做假,咪一試無妨law~
結果,兩日兩夜,簡直係我旅行生涯其中一個最佳既住宿體驗! 甚至可以話呢間河上小屋令我的汶萊之旅變得溫馨難忘! 我住左係間dream house呀!
儘管無得到屋主Andrew同意,但係對唔住啦,容許我寫幾隻字讚下你間屋啦~



2018年5月28日星期一

汶萊小記1 - 汶萊交通懶人包+中伏記

汶萊幾乎可以話係東南亞最少旅客到訪暨最少人認識既國家 (僅次於東帝汶)
個名會聽過ge,但一般只會同石油及吳尊拉上關係,係街求其問人汶萊係咩位置的話,都幾sure 10個有8個都係亂up
無他既,綜合各方旅遊人士既意見,一致認為汶萊係一個超級無野睇無野玩既國家!
不過,睇開我個Blog都知我包拗頸ga la~ 你地話無野玩je,我就偏偏要用自己對腳行過睇下乜料!
計過機票時間假期都ok,兼且蘇師傅話今年屬鼠既農曆3、4月去南方會有桃花運! (呢個先係最重點!)
所以,人生中既第40個國家,我萊萊~萊萊萊萊~萊萊萊萊萊萊~萊萊萊萊萊萊萊啦!!!!



2018年4月27日星期五

韓國雜記2 - 釜山的男人私房活動

話去韓國,相信十個男人有9個都叫救命!
一個人去又唔知玩乜on居居 ; 同女朋友去,佢掃街掃衫掃化妝品時,你行其他野又比人鬧,睇其他女又比人鬧,只可以係後面做小桂子抬戰利品,仲要閒閒地一抬就抬10粒鐘起跳,真係去旅行慘過做咕呢……..
以上係我不少男性朋友既血的申訴,與我無關,因為 ------- 哪有女!!!!!!!!!!?????
所以今次就特登分享我去釜山時既一d非女性向,兼有返咁上下剛陽豪氣,甚至一支公都仍能逍遙自在既男性私房活動,比各位兄弟係旁邊果位血拼時可以抖下氣,造福下苦海中既羔羊!
唔係wor…….不嬲釜山都無首爾咁商業咁多野賣ga wor……..
你真係咁諗?…….
呢個世界,連原力都阻唔到女人shopping ga…....


1. 實彈射擊場

唔記得聽邊個講話,南北韓其實到而家都未簽過任何條約,所以根據國際法兩國仍然屬於「戰爭狀態」,希望呢兩日金仔同寅拖完手會好返啦~
我懶得去fact check流定堅,只知實彈射擊呢件事係韓國真係好普遍!
北韓就簡單啦,只係板門店大叫「食蕉啦人造人19號」就試到 ; 南韓都無問題,係釜山,海雲台海灘10分鐘步行範圍內已經有兩三間消遣用既實彈射擊體驗店~
我就跟住hostel既地圖,嚟到呢間「海雲台實彈射擊場」


間店個門口………..我只能講真係好大陸feel ar……
店內空間都頗大,且燈光昏暗兼一個人都無,更加似大陸d死城ar……
牆上則放滿槍械同有關介紹,感覺有d專業,但點解我會有置身保齡球場既感覺ge???

2018年4月14日星期六

韓國雜記1 - 福岡釜山坐船來回全攻略

呢個係我2016年「Share積fund去旅行 – 九州紅葉篇」的其中一段旅程
(詳細請參考下面~)


一直都想寫呢個旅程,點知2017年頭去得太多旅行又峴港新加坡又伊朗攪到寫唔切,於是拖到而家
唔緊要,韓國一百幾廿萬人去過,排隊都未到我介紹,所以我只會輕寫兩篇about釜山,講少少我認為值得分享下既小事~
好啦~ 新國家,開波!

=================================

而家無再教書wor,難得11月有假放wor,梗係要去睇紅葉啦!
原本想去羅馬尼亞或者西雅圖,但條數點都計唔掂,咁岩睇到UO去福岡特價唔使1K,有d心郁,但又係日本???
「福岡有船去釜山,幾個鐘ja wor」同事漫不經意地說
Ee~ 一trip兩地,件事又真係有趣左wor!
於是就開始瘋狂資料搜集,發現資料的確唔算多,香港的更幾乎無乜見過,更奇怪既係近2年後既今日竟然都仲未有blogger寫相關事宜!?
係……我知…….文字息微……好似我咁純自由無錢收既blogger插水式減少緊嗎……
但點都好啦,我仍然未想放棄以文字記下遊蹤~
不過我呢段旅程的確有拍片,懶的話可以飛落下面齋睇片的~

前言講完,入題啦~
由福岡直航來回釜山的船大致可分為兩種 : 快同慢
兩者都係同一個碼頭出入:
福岡係「博多港国際ターミナル」 (Hakata Port International Terminal),由博多站坐88號巴士約25分鐘至終站,中洲川端則坐80號約18分鐘,記得唔好去錯博多港!
釜山則是Busan Port International Passenger Terminal,由釜山火車站步行大約10分鐘



2018年4月5日星期四

北陸之行8 - 用電動單車逍遙於琵琶湖吧!

琵琶湖係日本no.1大湖,位於中部滋賀縣,大約係京都旁邊,JR都只係兩個幾鐘,非常之適合望下山望下海one day旅行~
但係,睇襯d遊記講都係環湖一周,真係好恐怖!
唔係做唔到,我都想咁玩呀,只不過唔係個個都有咁多時間同咁多體力ga嗎!
想one day trip快速盡睇琵琶湖美景,最好方法,似乎都係用電動單車踩一小個分段~
聽聞湖既北方岸線,即JR余吳駅至近江中庄駅一段風景係最靚的,就睇下係咪傳聞中一樣咁強勁啦!


2018年3月14日星期三

北陸之行7 - 5小時快閃金澤

原本唔想寫呢一篇,因為金澤對我嚟講實在有d失望,而且我只係嚟行左幾個鐘only,好多野未夠深刻體會
只不過呢個blog既風格就係實事求是+純自我感受,儘管有d不如意只係我既黑仔+主觀,仍然想寫幾隻字做個記錄~
好啦~ 承上回由冰見市回高岡站坐JR,離開富山縣來到石川縣,5個鐘既快閃金澤市之旅開始!

1. 巴士
富山縣同石川縣兩個地方基本上係一齊玩的,所以比較佢地既首府富山市vs金澤市就成日出現
就呢兩日所見,富山偏向鄉下,反而金澤雖有綽號「小京都」,市中心卻明顯大城市現代化得多!
只係見到個JR站門口都嚇死人! 有無咁大舊ar喂!



2018年2月23日星期五

北陸之行6 - 隱世日出溫泉旅館

一直都認為最無敵既睇日出地點必須具備以下條件:
1. 天青海澄,銀白雪景
2. 露天溫泉,愛人抱住
3. 左手斟酌,另一隻手也不閒著
但以上所有野今次都係無ga!!!~~~~
唔緊要! 所謂打邊爐最緊要有個爐,睇日出就最緊要有個咸蛋黃je!
儘管種種要求打個兩折扣返80%,係呢間旅館浸住溫泉睇既日出依然係咁靚!
日本九月微涼的清晨,赤身泡在溫熱的泉水中,靜看太陽由雨晴海岸線上緩緩升起,金光穿透雲層,閃亮了湛藍的大海……面對如絲美景,佛都會動心啦

2018年2月4日星期日

北陸之行5 - 雨晴海岸真面目

當初做資料搜集時見到冰見市雨晴海岸的相片,真係靚到嚇親!
湛藍海水映襯遠方白雪山脈,十足瑞士一樣的美景,點解會名不經傳ga??
所以set行程時,我求神拜佛都希望到埗時天清氣朗!
果然! 而家藍藍天空高掛我的夢呀!!!!! 今次仲唔一掃黑氣!!!
但事實又係咪真係咁如我所願呢………….

2018年1月18日星期四

北陸之行4 - 叮噹故鄉半日行程推薦

時間線上應該係接「北陸之行2」去完環水公園離開富山市,嚟到西邊的高岡市~
普通列車要一粒鐘,有JR pass坐新幹線就超高速10幾分鐘only,呢個嚴格嚟講都屬於鄉下既地方有一樣野極度出名 ----------
無錯! 呢度就係叮噹作者藤子‧F‧不二雄的出生地! 係除左東京川崎市多摩區外日本最多叮噹裝飾既城市~ (多摩區係叮噹作畫的地方,有藤子‧F‧不二雄博物館) 最近仲有期間限定既叮噹列車同藤子‧F‧不二雄原畫展tim! 簡直係超級叮噹迷人生必到既朝聖地~
我決定唔理阿哥無乜興趣,夾硬要佢跟住我睇哂咁多景點啦wahahahahahhaha~~~~

========================

1. 高岡おとぎの森公園
係空地呀!!!!!!!!!! 係叮噹既空地,6個主角齊人既空地呀!!!!!!!!!!!!!!!!!!! T_T”
雖然藤子‧F‧不二雄博物館內都有水管場景,但呢度真係有草地兼四周有花有樹,真實感大增!
技安坐係水管自信地向牙擦仔吹噓,靜宜同叮叮開心咁傾偈,再加埋叮噹大雄向你揮手迎接~
平凡既空地即刻變成真實的童年回憶! 好感動呀!!!!!!!


2018年1月4日星期四

北陸之行3 - 呢間野食乜ga??

(此店已因清拆而關門,太可惜了........updated at 17/01/2020)
這是一間必需要記下的小店

事源於由宇奈月溫泉去到富山市過一晚(北陸之行1),係酒店職員介紹下去左富山城商店街「總曲輪」搵野食,之但係行嚟行去見d店都係三幅被,都係無d特色既魚魚魚魚魚,一d興趣都無
苦惱之際,於街內某十字路口轉角位,有一大型寫住”BAN”的黃色招牌令我地駐足不前
本身我同阿哥就對黃色招牌不感興趣,吸引我地目光既係招牌下方banner的一大塊吉列炸物,形狀奇特又有d核突,重點係我地完全唔知呢塊究竟係咩嚟!?
係日本生活多年既阿哥望左陣個menu ------- 「我完全唔知呢d係咩嚟!」
咁神秘???????????
我地兩兄弟都係好奇心旺盛怪,再見到店外放住幾張大排檔feel方型摺枱,幾個大叔大杯酒大聲笑豪氣干雲,咁好feel,晚餐就來一趟獵奇之旅啦!



雖然話大膽嘗試,但無理由一開始就叫個滿漢全席出嚟ga!
試探性點左一個老闆推薦既冷盤同湯,再手指指banner果塊古怪野,以上~
等待上菜期間,我地咩新奇古怪食物都估過,炸小棠菜炸兔仔頭炸鯉魚旗…………
10分鐘後,上菜了,樣子真係同banner上相差無幾wor……