測試1

2018年4月14日星期六

韓國雜記1 - 福岡釜山坐船來回全攻略

呢個係我2016年「Share積fund去旅行 – 九州紅葉篇」的其中一段旅程
(詳細請參考下面~)


一直都想寫呢個旅程,點知2017年頭去得太多旅行又峴港新加坡又伊朗攪到寫唔切,於是拖到而家
唔緊要,韓國一百幾廿萬人去過,排隊都未到我介紹,所以我只會輕寫兩篇about釜山,講少少我認為值得分享下既小事~
好啦~ 新國家,開波!

=================================

而家無再教書wor,難得11月有假放wor,梗係要去睇紅葉啦!
原本想去羅馬尼亞或者西雅圖,但條數點都計唔掂,咁岩睇到UO去福岡特價唔使1K,有d心郁,但又係日本???
「福岡有船去釜山,幾個鐘ja wor」同事漫不經意地說
Ee~ 一trip兩地,件事又真係有趣左wor!
於是就開始瘋狂資料搜集,發現資料的確唔算多,香港的更幾乎無乜見過,更奇怪既係近2年後既今日竟然都仲未有blogger寫相關事宜!?
係……我知…….文字息微……好似我咁純自由無錢收既blogger插水式減少緊嗎……
但點都好啦,我仍然未想放棄以文字記下遊蹤~
不過我呢段旅程的確有拍片,懶的話可以飛落下面齋睇片的~

前言講完,入題啦~
由福岡直航來回釜山的船大致可分為兩種 : 快同慢
兩者都係同一個碼頭出入:
福岡係「博多港国際ターミナル」 (Hakata Port International Terminal),由博多站坐88號巴士約25分鐘至終站,中洲川端則坐80號約18分鐘,記得唔好去錯博多港!
釜山則是Busan Port International Passenger Terminal,由釜山火車站步行大約10分鐘







(釜山站)


先講快船~
快船主要由「JR九州高速船Beetle」同「Kobee」營運,訂飛可以係下面呢個網址網上攪掂,開船個半鐘前去到港口既counter囉飛就得~
注意想早一日去囉都無用的,職員都預先比唔到你~

JR九州高速船Beetle
http://www.jrbeetle.co.jp/internet/index.html

Kobee
http://www.kobee.co.kr/html/





雖然即場買船飛都得,但個人建議都係網上買定穩陣,因為我見過有幾班船真係會full,而且網上不時會有discount~
由於我坐既係Beetle所以下面既介紹都係以此為basic (梗係啦我點坐兩次去程ar……)
票價方面有好多種,最平既單程約8900yen,來回則約11,800yen,唔使問阿貴都知來回抵勁多!
但包拗頸既我,偏偏就係要買單程! 我係要試哂快船慢船兩種呀吹咩~
所以咪交通費貴左勁多law………差唔多可以買多張機票ar……
另外注意博多離境要比多500yen離境稅,要自己去部自動售賣機攪掂





時間方面,高速船一日會有兩班,時間不定,多數都係早午各一,但有時會兩班都係早,全程約3個鐘~
至於隻船,我都無咩好講,舒服、企理,同去澳門太似啦! 咪一路過山車3個鐘law!
無咁誇張ge~日本人渣船好d,大概係滑浪飛船程度la~
其實我係唔太知道的……..因為我一上船就訓足3粒鐘,一醒已經係釜山港……










快船講完,其實呢篇慢船先係重點~
主要由Camellia Line營運,一日一班,可於下面呢個網址訂購

http://www.camellia-line.co.jp/

慢船分兩種,博多至釜山係中午船12:30 --> 18:00一睇就知時間非常差勁,食左成個下晝wor!
另一種則係overnight過夜船,20:00 --> 翌日07:30,即係上船舒舒服服訓訓豬,第日一訓醒就到,非常方便想慳一晚住宿既朋友~
自從當年阿爾巴尼亞去意大利果程之後,我都好多年無試過昨夜渡輪上了,就久唔久男人浪漫下啦~


至於價格就真係超級海鮮了
我當年最平係45,000+7,300=52,300圜,即係約$370港紙已經好抵 ; 寫呢篇文時再check,竟然最平只需要2,500yen,即係約$175港紙! 咩事ar仲平過住hostel????



時間方面都有調整,我當年既夜船的時間係由19:00 --> 07:30,check-in時間則係一個鐘前既18:00 ; 而家check-in時間則為19:00,即係話如果妳係釜山市中心,最好早一個鐘起錨啦!
當然好似我咁,上船前先去釜山站附近買個超級有名既「橋村炸雞」上船食也是一件賞心樂事~
(其實我寫到呢度時,隻手無意間打左300字關於個炸雞……同內文又好似唔係好match,所以決定係po文後3日內再介紹於facebook page既 #環球美食吐糟區 啦)





以下用返小弟當年既時間記述~
話說我好乖咁17:45去到碼頭再等18:00開counter check-in,之後就開始發現有少少伏啦………
原來佢係機場咁囉左飛要再等一大輪先有得入閘,我18:02已經攪掂,但要到19:00先有得走入禁區做checking,即係要係大堂再呆等多成粒鐘……..
仲有一樣更令我疑惑既係,水牌上寫住”check-in time 19:00-19:30”,但departure time係22:30???
忍唔住問下職員,原來所有人19:30要上哂船,但隻船會係3個鐘後即22:30先開!
What!????? 咁我咁早上船做乜Q呀????





後來就知,原來隻船係乘客上船後先開始填裝貨物,部份船上既設施例如餐廳會係9點半前收工,即係話d職員唔會跟船,係為左服侍你地班蛋散先特別上船做野ga ja~
我講得衰je,其實對d職員嚟講都係好事~






所以正常嚟講,上左船放低野後第一件事應該就係衝去醫肚ge!
但我下晝個烤肉同岩岩個炸雞都未落格,無所事事,又無理由8點鐘訓覺
於是,就出現左下面呢一條無乜剪接又有d無聊既船上設施冒險片啦~~~



好~~~~~拍左片就可以打少d字~~~~
懶睇片既朋友就睇下相啦~



如以上所見,隻船其實都幾多野玩,又澡堂又K房又遊戲機,唔會好似果陣亞德里亞海果隻乜都無仲要訓梳化
不過我咪又係一支公,唔通自己唱k劈酒咩~
都係去澡堂浸下舊豬腩肉,早d訓啦渠頸~

Zzzzzzzzz……..
5點幾就比同房人嘈醒(此事係facebook page再講),行出外面望下到邊…….
點解我會見到英文寫住Welcome to Fukuoka ge…………….



咩話原來隻船5點幾就一早泊左岸落緊貨! 但就要到07:30先會開門放人落船!
我又真係唔明點解要咁做啦……….可能係要等海關返工啦……..
即係話航程根本少於7小時,但就要困妳係船上超過12個鐘
無錯過夜船係慳左時間同金錢,但係呢個situation之下個time cost真係好高,建議大家接受到先好搭ar………



總括而言,坐船來回福岡釜山係比想像中方便的,價格都會比坐飛機平少少
快船輕鬆簡單,免卻機場複雜既手續,但單程偏貴,回程時間多於中午亦有礙行程
慢船可節省一晚住宿費,過程亦算舒適有趣,但time cost極高
我呢篇只係想介紹多一種玩法比大家,點揀就睇閣下既行程而定了~

=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言