測試1

2018年6月12日星期二

汶萊小記2 - 完美的水上民宿

係為數不多的中文汶萊遊記中,有一位師兄曾講過「可以的話應該要住係水上人家的民宿」,但就無任何further information,其他人問佢都未有回應,所以我開頭都係睇過就算
當我比果幾百萬間酒店住宿既價錢嚇親而轉投airbnb既懷抱時,劈頭第一個選擇竟然就係一家水上人既民宿!
睇相,唔太特別 ; 睇comment,d好評多到如黃河泛濫一發不可收拾! 點睇都唔似做假,咪一試無妨law~
結果,兩日兩夜,簡直係我旅行生涯其中一個最佳既住宿體驗! 甚至可以話呢間河上小屋令我的汶萊之旅變得溫馨難忘! 我住左係間dream house呀!
儘管無得到屋主Andrew同意,但係對唔住啦,容許我寫幾隻字讚下你間屋啦~





https://www.airbnb.com.hk/rooms/6265100?location=Brunei%20Muara%20District%2C%20%E6%B1%B6%E8%90%8A%E9%81%94%E9%AD%AF%E8%96%A9%E8%98%AD%E5%9C%8B&s=D44_-s4K



汶萊首都斯里巴卡灣,大致可簡單用汶萊河劃分為北邊的市中心及南方的water village ;
市中心係政治金融中心,即係中環 ; Water Village則類似貧民區(其實都唔係好窮,應該有錢過我……),房屋形式則有點似大澳
我地去大澳都要坐船啦,呢度又點會唔使呢~
正如上篇咁講,開頭都以為坐水上的士出入會好唔方便,點知原來係個好爽既體驗~
只要去到河邊棟係度揮一揮手,係河上穿梭既船家自然會飛過嚟,我最耐都只係試過等1分鐘~
而且呢d水上的士速度極快,雖無上篇講既暈浪大飛咁恐怖,但都有玩香蕉船既感覺,大約廿秒已可去到民宿所在的2號碼頭,收費1蚊汶萊幣=$6港紙 (汶萊人半價),方便非常!
唯一要留意既係碼頭近水既梯級滑得嚇人……..聽聞水上人家既排泄物係直落水ga喂…….



一上2號碼頭,直望第一間屋花呢碌,就係你啦!



第一晚去到時我on居居唔100% sure,成間屋黑媽媽,敲門又無人應,正想搵返張booking receipt出嚟時碼頭來左一家人,主動幫我開閘開門,仲介紹埋間屋+點我住邊間房
我當然以為佢係屋主啦,點知佢地話只係屋主既親戚! 純粹係屋主未返到又見我一個背包客on居居所以帶我入嚟安頓好先……..
Ar………正常都唔會比生保人入屋啦……何況仲要係人地屋企……都唔知話佢地太好人定太過信人好……
Anyway,阿姨媽走左之後,屋主又唔係度,間屋又明顯無其他住客……….即係我凌空翻騰3周半金絲雀眼睛想旅行都得啦~~~~~~~~~~




講下je~~~~~~~~~~
呢個時候最好就係慢慢研究下間屋影餐飽ga啦~
理論上貧民區應該殘殘地,仲有細個geog都有學,水上屋一定濕濕霉霉,仲有容易有蚊蟲tim
但呢間屋簡直係有遺自然定律,唔止整潔乾爽無蚊蟲,裝潢更係非常雅致~
地毯與大量不同形狀的沙發為大廳營造出溫暖感覺,牆身佈置更極具汶萊風格
咩係汶萊風格? 我鬼知~ 只知放左國王個大頭像都亳無違和感~
等於有人屋企放毛主席像而無問題,個裝修都一定好天安門!




(我最鐘意呢張半趟沙發,屋主都話佢成日係度訓著~)








房間非常簡約,有3-4間房,每間3張床,當然因為無乜旅客而唔會full啦~
無冷氣但有大風扇,何況水上村夜晚唔會太熱,當時日間35-36度,我呢個怕熱人夜晚開風扇都覺得有d凍,所以無問題的~




廚房廁所都乾淨企理無臭味,比好多歐洲hostel更掂!





「喂~碎料嚟ja wor~」
無錯,睇到呢度,都只係一般乾乾淨淨無乜病既普通住宿
放心,好戲在後頭!
全間屋最大既亮點係 ------------------- 屋外既開揚聽海大露台!
邊有海呀!!!!???????? 哎也是但啦~~~~
呢個能遠眺斯里巴卡灣市中心、皇宮及清真寺既露台,白天有旭日照射,能於藍天白雲下安享受日光浴(唔怕變炭的話),或於屋簷下避暑乘涼 ; 晚上則可邊輕酌一杯,邊隔河盡覽五光十色的夜景
等於你屋企有個大騎樓比妳推門就有維港夜景wor! 點會唔屈機??
又或好似我咁,大雨驟來,則安坐椅上,聽看風蕭雨嘯,如此詩情畫意,人生幾何呀
當然要chok下樣打下卡啦!!!~~~~~~~~~~

















呢間民宿另一大亮點,就絕對係超級友善好客既主人Andrew了!
話說我聽雨聽左成粒鐘,到9點幾佢都未見人,夾硬借街邊路人甲既電話call佢先話「我同fd食緊飯好夜先返,你當自己屋企得ga啦~」
喂~~~~~~都未免太過信任我呢個陌生人啦掛!!!!????? 我係猩猩王咁點算呀!!????
最後我出返市區食完飯再返嚟再hea多成粒鐘,差不多12點先見到佢真身!


Andrew係一個超級helpful熱情兼talk得既人!
我嚟汶萊基本上係無plan的,佢細心幫我plan之餘,仲會因應我既要求adjust行程細節
「聽講旅客多數會去紅樹林睇馬騮wor」「今日咁熱會好辛苦兼難睇到,同埋一個鐘左右攪掂而已,你唔去都無損失」
「我諗緊我只係兩日玩汶萊會唔會太少?好唔好係你度住多日」「汶萊真係無乜野玩,你兩日夠哂ga啦~」
「咁我聽朝9點起身啦」「唔得! 咁太晏了你會唔夠時間! 7半啦! 我煮早餐!」
就係咁…………明明係他條之旅,點會起得仲早過返工ga……..
而晚上Andrew仲會同你大傾得偈~
由佢口中,知道呢間屋原本係佢老婆既祖屋,我住緊既3人房以前係一家人住一間的,即係而家我眼中既”鬆動”其實係4-50年前係”籠屋”
後來汶萊漸漸有錢,成個家族都放棄祖屋搬哂出市區得返Andrew兩公婆,於是佢地就大肆裝修,最終變成而家民宿既模樣~
「咁你地唔係住呢度ga?」「我出面有3層樓,係有客人我先過嚟一齊住ga ja~」
Um………我究竟講d咩好呢…………
Anyway,係佢身上真係知多左好多汶萊既文化~ 而且佢既風趣幽默絕對唔會令你覺得講咁多野係苦差~
雖然後遺症係講到太夜唔太夠訓………..
Anyway,如果無一個咁既屋主,呢間民宿唔會咁出色,多謝你Andrew!

(兩晚都係度傾到2點幾)



價錢方面,話平又唔係好平,平均$350港紙一晚包早餐,係汶萊呢個咁乜貴既地方非常唔錯啦! 仲要咁高質素wor~
如果想再平d,我見airbnb有d single room都係百零蚊一晚,睇落都幾乾淨企理~


(原本係豐富10倍,係我自己要求蛋腸仔就夠,但仍然好飽)


奇怪wor,我平時唔係好鐘意住hostel ga咩?
其實係根據資料所講,全汶萊既hostel只有一間叫Pusat Belia既青年中心,仲要係成日唔開+full house+無得上網book,非常神秘兼無保障!
不過係我散步中途,偶然發現呢間即將開門既AE Backpackers Hostel~ 簡直係背包客既福音呀!!
不過佢個地址離市中心咁遠,我就唔係太睇好佢既生意啦……..



如果銀彈非常充足,其實我強烈建議住係汶萊最有名的帝國酒店The Empire hotel and Country Club
呢間六星級酒店竟然只係$1500港紙一晚,仲包妳係汶萊各地既接送,抵到爆炸啦!
兼且呢度更係汶萊一個必去既景點!
不過,唔講住,過兩篇先~


=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言