測試1

2018年12月9日星期日

阿塞拜疆背包行Day6.2 - 熱心老伯有性格 (#過客列傳14)




上回講到比個司機玩完一輪之後,終於好攰咁來到Sheki的民宿
誰知女主人返緊工唔係屋,只得友善但溝通唔到的老爺爺開門比我,咁當然就咩旅行資料兼地圖都無啦
個人習慣,去每個新地方都要有張紙地圖先心安,何況我呢度無電話卡上唔到網呢
唔緊要,我係google map “ tourist information”,見到街口轉角就係,就將佢當做遊覽Sheki的第一站啦!



按圖索驥,來到google map指住既地點 ------ ee呢度咪岩岩我同個司機唇槍舌劍既地方? 頭先攪左咁耐都唔覺有information centre wor!!!!
但左睇右睇都的確point左係呢度,唔通又有鬼鼠路??
終於都係忍唔住試下問街邊d人,但無一個明白
到我問緊一個坐係街邊既大哥時,佢一臉苦惱,突然揚一揚手叫停一位路過的老伯,再嘰呢咕嚕同佢講左一輪
老伯同樣對住我個google map一臉狐疑,沉默片刻,突然祭出傳說中既最強武器Nokia 3310!
Wa……… 高手嚟wor,睇嚟會有不得了既事發生了……..


老伯打完電話後恍然大悟!揚一揚手示意follow me
終於有人識點行啦!!!!!
向前行,轉個彎再轉彎,ee 呢度咪Sheki歌劇院既後門大閘?唔通呢度有條隱蔽小路!?

(Sheki歌劇院,原本想睇下有咩節目,點知呢兩日都係乜都無)

果然!我入到閘就見到有間房門口招牌寫住google map 果堆我睇唔明既異國文字~
Thank you very much !!!!.....................ee 點解阿老伯繼續行ge
老伯毫不理會我既thank you very much,帶我繼續走入劇院後場,直行,轉彎,上二樓,再行入d,順手開門入左一間office,房內T字型辦公枱的兩名中年女士呆左咁望住我,向老伯嘰呢咕嚕,好明顯就係問我係乜水啦
老伯卻一於少理,只示意我坐低,自己則邊回答兩位女士,邊走到房內餘下那唯一一張的獨立大班枱前,囉起電話call左一轉,收線,再打多第二個電話。兩位女士就面帶緊張地示意我安靜等等
咁我唔靜唔等都唔得啦…………大家語言不通,到而家我都唔知發生咩事,只係直覺老伯係用心幫緊我的........
於是我就好似一個等緊interviewfreshgrad咁成碌木坐係度,心諗「乜料呀?我想揾個information centre 囉張地圖je,做乜攪到咁大陣仗??」



不多久,老伯對個電話比我,聽筒內傳來一把悅耳的女聲 : Hello~ May I help you?」
oh my god !!!!!!!!!我成世人都未試過聽到英文會咁開心ga!!!!!由今朝坐兩轉的士到而家終於有個溝通到既人出現啦!!!!!!!
原來老伯自己都唔知tourist information centre係邊,亦唔明白我講d乜,於是就打比人問遊客中心電話,再直接打去揾個識英文既人嚟同我講!
咁遊客中心d人一定解決到哂我所有問題ga嗎,係醒目wor!!
同電話中既職員溝通一輪,先知道以前市中心的確係有tourist information centre,但已經執左笠(唔係掛?),而家Sheki唯一既遊客中心位於地標既皇宮遺址Palace of Shaki Khans之內 (同上篇講既最大酒店Sheki Palace個名似到爆炸......)
打個比喻,遊客係香港機場落機要揾旅遊資料出市區,但d資料放左係寶蓮寺..........
邊個天才諗出嚟ga.............

(向右果條一大直路其實係上山的斜路)

但點都好,總算知道個地址了,咁我只需要坐的士去就得啦~
謝過老伯後,我就起行了~
點知老伯笑住拖我行表示要送我出去,唉呀唔使咁客氣啦~
而似乎兩位女士都係咁諗,好驚惶咁揮手叫老伯唔使送,但老伯一於少理,力排眾議咁親切地送我出去
行返出大街既途中先後遇到兩位後生仔女,兩人都對老伯臉帶恭敬地點頭問好.........
再望真d呢位老伯,不論衣著、談吐、氣質都散發著一絲絲優雅,同時微微滲出莊重與威嚴,同路上所見的阿塞拜疆人大相逕庭!Even到而家我都未遇見過一個有相同特質既阿塞拜疆人!
究竟我係街上求Q其遇上既呢個老人係咩猛料呀????


仲未完呀!
出到劇院外,老伯向一個停係度等客既的士佬嚴肅認真地「訓話」,再轉頭向我豎起兩隻手指說 : 2 mamat」,再凶狠地向果個圓臉的士佬講多一次 : 2 mamat!
痴線! 原來佢幫我叫車不特止,仲怕我比人騙taxi fee於是幫我格埋價! 真係太好人啦!!! 完全將我因上回個傻更更的士佬而對阿塞拜疆人既壞印象完全洗清!
同樣友善兼盡心盡力去幫助我呢d陌生人既,遇過的真係只有伊朗人同日本人!
超級多謝你呀老伯!



圓臉的士佬於城內破舊的道路上風馳電掣左穿右插,10分鐘左右,我終於見到呢座位於山上既Palace of Shaki Khans
然而,事情未有咁簡單,圓臉的士佬完全無視城堡大門的「車輛禁止進入」雪榚筒,仲轉波比油,以「無人可以係我前面」既信念直剷入皇宮內部!
喂呢個Taxi driver法國人嚟ga!!!??? 車尾係咪起左定風翼呀???? 佢頭先係咪叫左聲”Ninja” ????????

(應該要睇過套戲先明我講咩~ Please refer to 經典既“Taxi2”Ninja!!!!!!)

一停車,錢都未比,圓臉的士佬就開我車門,自己落埋車手語示意follow me!
follow me?? 你係我今日遇見既第幾個terminator??
阿未來戰士幾乎拖住我隻手咁帶我進入一棟磚製大樓,穿過樓內市集,上二樓,轉彎,敲門,之後就DHL咁送貨交收將我送比房內的一名妙齡少女,真係搵件魷魚親自運送了
少女 : “Welcome! I think you must be Garcia! Nice to meet you!”
這時我就知道,上車前老伯交帶既唔只係2 mamat,仲要圓臉的士佬親自帶我入到tourist information centre交託比識英文既職員先准走!
如此細心,如此周到,我真係有d後悔無機會問到呢位神秘老伯係咩姓名及咩身份地位
我唯一可以做既,就係在心中致以最高敬意,遙遙祝福佢身體健康,事事順利!
多謝你呀老伯!!!!!!!!!!!!!!




用左兩篇嚟講人,到而家都未開始講呢個地方係咩樣有咩玩~
好啦好啦下篇有ga啦,不過預告下先,都仍然係過客列傳呢.........



======================

「旅途上總遇上很多過客,相聚也許只是一刻數秒,此生不復相見,卻在你的生命中留下永恆的印記」
#過客列傳       係小弟facebook page一個專寫旅途上一面之緣朋友小故事的系列,多數只係百零字講幾句,今次因為這些過客同行程經歷關係太大,所以再獨立成篇。
今次呢個故事由於太過長又同我個行程有太關係先放埋係度~
如有興趣,可以入下面呢條link睇下其他    #過客列傳  舊故事ga~ 
當然like埋我個page就最好啦!


======================

相關文章 :





=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言