測試1

2020年1月21日星期二

漫遊保加利亞7 - 飄雪下的里拉修道院



經過尋晚又餓又凍的平安夜,聖誕節正日以一頓豐富的早餐開始!
點解一間港幣$80一晚床位既hostel會包埋自助早餐ga?????
芝士乳酪火腿沙樂美腸麵包cereal每項都有兩三種選擇,連雞蛋都可以按你要求即製太陽蛋奄列炒蛋,味道同質素比好多4星酒店更好!
我要食返尋晚飢饉30果份呀!!!!!!!!!!!!




食飽喝足,心滿意足,係時候諗下今日既行程了
保加利亞最有名的自然風光首選「七湖Seven Rila Lakes」,有睇過網上相片雪景極度極度靚! 但我到埗後問過不少本地人,得出既結果係冬天山路非常危險,如果無行雪山既裝備同經驗,基本上見到個湖前會先見到閻羅王
然而七湖附近有另一著名觀光景點 ------ 世界文化遺產「里拉修道院Rila Monastery」,此地同時係多數人行完七湖後的目的地~
食唔到主菜唯有side dishes頂住先啦~
估唔到既係,呢個side dish會係我呢次旅程見過最美的地方! 根本唔係次要,而係遊保加利亞既必到重量級旅遊景點呀!




Rila Monastery與Sofia及Plovdiv形成一個直角三角型,中學時代既我絕對可以sine law定cosine law計到個距離出嚟,但而家既我就真係唔知計嚟做乜~
因為近少少,所以一般嚟講都係由Sofia出發的~
去既方法可以好簡單,又可以好複雜
簡單的話,只要係我呢間hostel早一晚報名day tour,就會有私家車包接送來回直達門口,車程兩小時,3人成行,約50lev = $225
其實係好抵的,所以尋晚一到hostel我已經寫名book左,到今朝食食下早餐聰明左,突然諗起我今晚無打算返Sofia,唔知單程點計呢?
hostel職員說 :「單程都要收你50lev」
我 : 「咁我而家quit會唔會都好衰仔?」
hostel職員說 :「係ga,不過都無所謂ge,你quit啦」
於是自私又度縮既我,毫不猶豫地退錢走佬搵方法自己去,原本3人成行變成兩人成唔到行…………
對唔住呀……………

(就算hostel個staff係美女都阻唔到我唔比錢既決心ga!)


至於複雜既方法,就係要坐Tram 5號至Sofia市中心西南方的巴士站Bus and Coach Station Zapad - Ovcha Kupel (West Bus Station)轉坐巴士
聽落好簡單,但中間存在住3個問題:

1. 網上話架Tram係5號,但實際上有機會係5X,而且架車原來會經過Hostel Mostel正門口個站,即係話根本唔需要行去Palace of Justice背後的總站



2. 到Rila Monastery既巴士每日只有10:20一班,錯過左就係咁先,記得再預時間由市中心到巴士站,tram程都要幾廿分鐘的。當然出發之前,check定http://www.bgrazpisanie.com/en/mobile 穩陣好多!

3. 巴士有機會比官方時間早到早開車,而且唔一定係網上所講係大巴,我坐果架就變左格魯吉亞Marshrutka = Mini Bus,好彩在場有個識保加利亞文既女士我地班遊客先無錯過車ja! (這位女士的故事,遲d係 #過客列傳 再講~)




由於時間關係,唔使兩個鐘已經去到Rila~~~~~~Rila ja唔係Rila Monastery呀!
巴士佬會係呢個Monastery的山下小鎮抖大約45分鐘,大家可以襯呢段時間行個圈
不過吊詭既係,明明距離修道院只剩20分鐘車程,點解死都要係度停咁耐呢?……….
司機又唔係去食飯,呢個鎮d店舖又全部執哂唔似係想振興旅遊業…..
如果唔係我仲係呢度同大家講緊野,我真心以為扔我地係度餵喪屍要殺出個黎明ar……




 (殺出個--------)

(黎明)


Anyway等左一輪繼續出發,半個鐘都唔使,13:00終於嚟里拉修道院Rila Monastery啦!
相傳呢間修道院建於公元10世紀中期,屬新拜占庭建築風格,雖然搬過塌過,但千年來一直是保加利亞的文化和精神中心
而作為一個對東正教無乜概念既膚淺旅行者,我第一個感覺只會以為見到一間超級大屋既門口,有d新淨,畫左幾個有翼公仔同有樣既太陽,有點童話繪本的感覺







當一穿過大門 --------- wa!!!!!!!! 你使唔使咁靚ar!!!??????




里拉修道院是一座小型圍城,整體以純白色為主軸,配上棗紅木色花紋,給人一種純潔又壯嚴的感覺
被圍在正中央的東正教堂簡樸卻華麗,在飄雪之下帶出濃濃的浪漫氣氛
像童話世界? 我覺得更似中世紀冒險世界呢!
即係個勇者死左要拖佢入去先救得返果d教堂,但我諗個個都只會驚嘆座教堂有幾靚而唔記得救勇者law










教堂內部不能拍照,但外層走廊畫滿各種宗教故事,有個導遊既話應該幾個鐘都聽唔完
但我點會有呢,都係坐底影下相,感受下神聖氣氛啦~










穿過後方大門係修道院後花園,會有小橋、流水、麵包店、餐廳、墓地,仲有一個小型滑雪場tim!
有滑雪場咁正!? 係邊度!? 等我片返兩轉先!
咪落山坡果條斜路law,又斜又結冰又無扶手,唔跌返兩轉都唔好話冬天嚟過里拉修道院呀!
不過下坡後由低處望返上修道院又係另一種美,雪景下的護城河更係自拍好地方呢~



(呢個小斜坡係全冰來的,我平沙落雁左3次.........)












如果肚餓又太凍的話,的確可以入去餐廳食個飯
不過溫馨提示呢間野非常不知所謂,等左半粒鐘,夠膽死比碟pizza hut薯蓉錫紙兜咁大既意粉我,仲要原兜上,份量係平鋪個底,雞肉有兩粒仔,價格收15lev = $68,難怪google評論上竟然可以有驚天地鬼神既1.8分!
我睇google評論,隔離間麵包店的炸冬甩似乎幾唔錯! 可惜我去果日聖誕節正日無開門ar………





無啦~ 里拉修道院就係咁多野ja!
如果就咁直行直過睇完就算,半個鐘都比多你! 所以一般既tour都只會預嚟玩兩個鐘頭左右,多數人都會坐3點幾的回程巴士走人
不過咁靚既地方又點可能唔慢活細味下呢~
Rila Monastery有一個好大既特點 ---------- 係可以住宿ga!!!
如果想係修道院的僧侶房度過神秘而寧靜的一晚,又或想睇下有無機遇上山下智久咁靚仔既修道士的話,只需落車即到辦公室申請入住就得,價格大約30-40lev,想預約則只能直接打電話去院方辦公室
不過聽聞d房非常非常多,不用太擔心去到無得住呢個問題,擔心下夜晚四周乜都無要食樹皮好過啦……..




至於小弟,則因為行程太急趕而被迫放棄借宿一宵既諗頭,算啦呢度都無石原里美,我都係等下次嚟行完七湖落山再臨此地先住啦~
不過我都再hea多兩個鐘到5點尾班車先走人~
雖然睇唔到夜間點燈,但輕染晚霞的雪中修道院,的確別有一番風味~





至於回程就唔detail講了,離開Rila Monastery,巴士+的士,深夜到達下個目的地Bansko,為聽日另一重點行程預備~
好啦! 下回再講~




===================================


相關篇章 :

================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~




=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/






Email : funggarcia@gmail.com




另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









沒有留言:

發佈留言