測試1

2021年3月1日星期一

上窰郊遊徑+曝罟灣堤圍︱超強打卡+輕鬆行山首選【香港郊遊12】

我去「上窰郊遊徑」的目的,原本只為IG上有d紅的「曝罟灣堤圍」,誰不知條路驚喜處處!

不但短途且平坦易行,除曝罟灣堤圍外更有紅樹林、無人碼頭等打卡點,終點萬宜水庫西壩的日落更係靚到嚇親人!!! 

如果係社交媒體狂熱者,呢條郊遊徑真係分分鐘打卡打到手軟!

廢話少講,開始介紹啦~


上窰郊遊徑,曝罟灣堤圍


文章概要:

  1. 前往方法
  2. 北潭涌自然教育徑及上窰民俗文物館
  3. 起子灣紅樹林
  4. 起子灣小碼頭
  5. 曝罟灣堤圍
  6. 上窰郊遊徑
  7. 萬宜水庫西壩
  8. 回程方法


  • 前往方法

由西貢坐94、96R、289R,於「上窰」站落車,呢個係最近的入口點~

但如果想去個洗手間放低幾兩,又或買支水買串燒賣先,建議係「北潭涌」落車補給左先~

呢個地點既小賣店竟然仲有$10m一支維他水,算係非常有良心了!

總之攪掂後,出大馬路向左方前進,經過傷健樂園,約5-10分鐘就可以見到「北潭涌自然教育徑」的入口了~


北潭涌自然教育徑
(呢度得洗手間ga ja,睇真d,路牌係有箭嘴的)

北潭涌自然教育徑

北潭涌自然教育徑

北潭涌自然教育徑



wei阿鋒你玩野呀? 又話行上窰郊遊徑ge?

事實上一般香港行山友話行「上窰郊遊徑」,但事實上行既都係「北潭涌自然教育徑+上窰郊遊徑」crossover,先行前者再接後者,因為睇ge風景會靚左多左~

需知個道理等於蝦餃落豬肉會好味d,混血BB都會靚仔d,有時d野溝埋一齊個效果好好多~ 

如果大家死都要行上窰郊遊徑的,無問題~ 可以回程的時候行返去北潭涌的~



  • 北潭涌自然教育徑及上窰民俗文物館

一開波起行已見到清澈的北潭涌河口~ 好想跳落去游水ar~~~~

但點解我自動幻想左會有鱷魚出現ge???


北潭涌自然教育徑

北潭涌自然教育徑

北潭涌自然教育徑



行左唔夠10分鐘已到第一個check point「上窰民俗文物館」~

根據資料,上窰民俗文物館及灰窰於80年代初列為法定古蹟,內裡重現了古時客家村落的生活文化,等大家認識客家除左梅菜扣肉和釀豆腐仲有好深厚的歷史文化~

可惜疫情時暫時關閉,如果唔係入去行下應該都幾有趣~


上窰郊遊徑

上窰民俗文物館及灰窰

上窰民俗文物館及灰窰




  • 起子灣紅樹林

繼續前行會有數個分叉路

第一分叉路轉左會係「上窰家樂徑」或接「上窰郊遊徑」,sorry唔行呢條路~ 繼續前行plz~


北潭涌自然教育徑
(呢個鬼仔,我開始行時佢開始跑,我走人時佢都係跑緊,乜料)



第二分叉路向右係黃宜洲村,向左係起子灣~

黃宜洲村係私人地方死路來的,亦無咩野睇,所以都係直去起子灣啦~

點解我會知無野睇?

好明顯我中左伏啦~~~~ (網上有篇文話係轉右,我信左........)


北潭涌自然教育徑

黃宜洲村

北潭涌自然教育徑


走過一小片草原,到達起子灣紅樹林啦!!!

紅樹林周圍都有啦~ 赤徑鹿頸谷埔等等,我自己寫過的都唔少,有咩咁特別先~

特別在整個內海灣都係超矮身的紅樹林~ 

好似好多個小樹人企係海灘上勁得意~

只係岩岩開始行左唔夠半個鐘,已經令我覺得呢條郊遊徑無嚟錯!


==========================

延伸閱讀 :

赤徑與鹹田灣,宛如沙巴的美麗海灣【香港郊遊4】

粉嶺鹿頸至谷埔︱夕陽下的隱世蘆葦田【香港郊遊9】

==========================



起子灣紅樹林

起子灣紅樹林

起子灣紅樹林




  • 起子灣小碼頭

比紅樹林謀殺唔少memory後,係時候去下個影相點「起子灣小碼頭」~

前行5分鐘至另一歧路,左邊係繼續前進,右邊行多5分鐘就係起子灣小碼頭


北潭涌自然教育徑

上窰郊遊徑,起子灣小碼頭


無錯,起子灣小碼頭係要離開原路特登行去的,而且一定會有人話「都係一個乜都無既小碼頭je,有咩咁特別!?」

就係貪佢乜都無!!!

一個寧靜無人,腳下海水翠藍清澈,被群山360度圍繞的無人小碼頭,仲唔係影相擺pose既最佳地點???

呢度咪行山女孩bar top show身材既最佳地點law~

拜託........請不要幻想我著bar top..........


起子灣小碼頭

起子灣小碼頭

起子灣小碼頭

上窰郊遊徑,起子灣小碼頭

上窰郊遊徑,起子灣小碼頭

上窰郊遊徑,起子灣小碼頭

上窰郊遊徑,起子灣小碼頭




  • 曝罟灣堤圍

原路返回分叉路,繼續前行,進入樹林,開始有返d行山既感覺了~


上窰郊遊徑


曝罟灣堤圍雖然係我今次行程重點,但其實佢並非正式路段,路段被樹林隱密封閉,十幾廿年前根本無咩人會去tim

想落去,大概係從上面講的起子灣分叉路起計行約10分鐘,於林中有一無路牌的分叉路向右行直落

如果怕搵唔到,就認住呢幾條紫色紅色絲帶啦~


上窰郊遊徑

上窰郊遊徑



下行至曝罟灣呢條路的確比較難行

早段都叫有山路,到沿海去堤圍一段卻是側斜石路,如果對行石經驗不足,膝頭唔好,又或對鞋太弱既都係小心d好


上窰郊遊徑,曝罟灣堤圍

上窰郊遊徑,曝罟灣堤圍
(分叉路向右行就係堤圍方向)

上窰郊遊徑,曝罟灣堤圍

上窰郊遊徑,曝罟灣堤圍




終於到達我呢次郊遊最想去既地方「曝罟灣堤圍」啦!!!!

wa人都唔少wor~ 條堤會唔會冧ga!!!!!!

所以我都係岸邊影下相,等人地測試左塌唔塌先啦~


上窰郊遊徑,曝罟灣堤圍

上窰郊遊徑,曝罟灣堤圍

上窰郊遊徑,曝罟灣堤圍

上窰郊遊徑,曝罟灣堤圍


一如上圖所見,呢個曝罟灣堤圍呈半月形狀,係以前村民作養魚之用

如今人去樓空,堤圍亦日久失修無人打理,點估到幾廿年後呢度會變成打卡熱點~

試想像下--------

陽光在海面閃閃發亮,海中之路又狹又長,陳舊卻帶點殘破美,令人彷如置身動畫中的海上遺跡,在大海中心悠然漫步,唔係一件非常吸引人既事咩~


曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍



呢個曝罟灣堤圍實在非常特別! 不過有幾點卻要非常小心 :

  1. 堤圍非常狹窄僅容一個人通過,如果想超前的話,建議先練成跳高過一個人的技能
  2. 提圍有3處已斷裂,對平衡力無信心的朋友,可以坐住過、朋友拉你過,或者預備泳衣


曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍

曝罟灣堤圍


由於小弟太過鍾意呢度,hea到樂而忘返,幾乎唔記得行程只係行左一半,再唔走天黑ga啦........

到5點先急急腳由堤圍另一邊離開


曝罟灣堤圍



  • 上窰郊遊徑

呢個世界既定理就係 -------- 個人一急就出事!

因為趕住利,我去到分叉路位唔記得睇地圖,咁岩又撞到係堤圍幫手影過相的一家人,見佢地轉右我又跟埋轉右,仲因為腳步急而過左佢地頭

點知條路越行就越窄,d草越行就越高,到後來直情入左粟米田咁款,隨時有隻速龍出嚟吞左我!


曝罟灣堤圍





我開一開gps,google map無呢條路ge!!!????

仲要我行左15分鐘都仲係海邊兜緊,完全無上返上窰郊遊徑的意思!

咁我就知呢條路唔對路,立刻沿路返返分叉路!

回到分叉路我遇上另一家庭,父親似係行山老手,好心提醒我果條路連地圖都無的,雖然都去到終點西壩但又長又難行

所以我都係度好心提醒大家 ------- 由曝罟灣堤圍回上窰郊遊徑,分叉路記得認住絲帶轉左呀!!


上窰郊遊徑

上窰郊遊徑


轉左條路都唔算好行,但感覺上正路好多! 

只不過要上約10分鐘樓梯,算係今次行程最辛苦既一段

10分鐘後,終於可以接返上窰郊遊徑向萬宜水庫西壩前進~

行平路既感覺真係好呀~

而且沿路可以遠晀西壩,風景超一流!


上窰郊遊徑
(呢d先係路ga ma~)

上窰郊遊徑

上窰郊遊徑,西壩

上窰郊遊徑,西壩

上窰郊遊徑,西壩

上窰郊遊徑,西壩





  • 萬宜水庫西壩

根據路牌,由曝罟灣營地落返萬宜路要45分鐘,但根據小弟實測,由接返上窰郊遊徑開始,到終點落返萬宜路其實不用半小時~

總之,終於來到萬宜水庫西壩,行完了!!!


上窰郊遊徑


唔好完住~~~~ 西壩一樣有超正既風景~

就算唔得閒落去影白千層,水塘同我荷包一樣咁乾,望下右邊-------個日落正到痴線呀!!!!


萬宜水庫西壩

萬宜水庫西壩
(白千層,遠睇都覺得幾好)

萬宜水庫西壩

萬宜水庫西壩



萬宜東壩去得多,但西壩就真係比較少嚟~ 估唔到景色一d都唔輸比東壩wor!

如果仲有力既,我非常建議再向前行,去到正式西壩位置,欣賞以湖海群山為襯的日落晚霞~


萬宜水庫西壩

萬宜水庫西壩

萬宜水庫西壩

萬宜水庫西壩


時間體力所限,我無再落去天文公園月明亭果邊再玩了~

聽聞西壩係香港著名觀星地點,就搵個機會搵返幾個女仔一齊再嚟~

咩je~~~~ 唔通一班男人睇星咩! 睇星矢算啦!


(無敵既聖衣!)


  • 回程方法

一般網上既教法,都話離開可以行返上窰郊遊徑返去,真係見到都嚇一跳!
即係幾乎原路行返相同時間返去!?

唔係唔得,只係嚟到終點先話呢度係中間點,道氣都洩哂邊行到ar??

就算行馬路都要1個鐘,唔好玩啦!


上窰郊遊徑地圖


所以最佳方法都係call車~

甚至而家有d的士司機知道東西兩壩人多,會自己吉車入嚟接walk-in客

我就係截到架無蓋旗既綠的,輕輕鬆鬆10分鐘出返北潭涌~

做咩唔出西貢??

北潭涌已經有巴士出西貢、彩虹even沙田,由西壩至北潭涌綠的只係$30-$40,出返西貢市中心分分鐘起double

而且你慳左錢,的士佬慳左時間可以走多幾轉東西壩,大家win win何樂而不為?





上窰郊遊徑+曝罟灣堤圍的遊記就到呢度~

講真呀個風景真係超級靚得嚟又多樣化,又9成係平路,曝罟灣堤圍更係香港難得一見,無唔去既理由ar~ 我奇怪呢條路竟然唔太hit tim!

定係已經勁hit左係我唔知ja??




又無意中寫左好多字,不過最後都有d小貼士~

  1. 沿路都無洗手間,真心建議出發前係北潭涌解決先~
  2. 我呢個行程如果直衝,兩個鐘一定攪得掂~ 不過你見d風景咁鬼靚,計埋影相最好都係預要3-4小時好d。
  3. 有睇過文章話呢條路連傷健人士坐輪椅去都無問題,如果由起點至起子灣小碼頭我相信無問題的,但曝罟灣堤圍就一定無可能。而且就算唔落堤圍,起子灣至曝罟灣營地一段都係平路但多石,並非輪椅人士輕易攪得掂的。定係而家已經有越野用輪椅ga啦??


越野用輪椅
(Google完,真係有.........)



===========================


請大家Follow我Instagram啦~





=====================================


我既Youtube Channel正式開通啦!!!!


新影片已upload,快d Click入 「鋒加西亞 / 旅人瘋語」Subscribe 睇片再禁個like啦!~






=================================

相關篇章 :

  • 香港郊遊

004 - 赤徑與鹹田灣,宛如沙巴的美麗海灣
005 - 沙田行去慈雲山,原來超級簡單
006 - 大埔三門仔,零難度的全海景輕遠足
007 - 西貢大灘郊遊徑,長者行山無問題
008 - 飛鵝山芒草之行
009 - 粉嶺鹿頸至谷埔︱夕陽下的隱世蘆葦田
010 - 青衣自然徑︱馬灣海峽+青馬大橋無敵日落美景
011 - 大美督家樂徑︱4大隱世絕美風景


  • 發掘香港

1 - 香港Staycation首選,皇家太平洋酒店住後心得
2 - 城市步行︱鯉魚門的絕美日落
2.5 - 鯉魚門石礦場︱夕陽下的芒草群
3 - 己連拿利︱港島攝影秘景,宛如荒涼未來的異世界
4 - 香港的希臘小店,味覺的新衝擊


===============================


  • Email : funggarcia@gmail.com





文章同時刊於以下平台,請各位多多支持呀!!!!!!!!!!!!!












 

 

 




沒有留言:

發佈留言